ក្រោយបរាជ័យការបោះឆ្នោតតំបន់ប៊ែរឡាំង លោកស្រីមែរកិលទទួលស្គាល់កំហុសនយោបាយអន្តោប្រវេសន៍
គណបក្សកាន់អំណាចរបស់លោកស្រីមែរកិល បានជួបបរាជ័យជាថ្មីទៀត ក្នុងការបោះឆ្នោតតំបន់នៅប៊ែរឡាំង កាលពីថ្ងៃអាទិត្យ។ គណបក្សCDU របស់លោកស្រី បានទទួលសម្លេងតែ១៧,៦ភាគរយប៉ុណ្ណោះ ខណៈបក្សស្តាំជ្រុលនិយមក្មេងខ្ចី AfD បន្តឡើងកូត ក្នុងប្រទេស ដោយទទួលបានសម្លេងឆ្នោត១៤,២ភាគរយ។ ថ្ងៃចន្ទនេះ លោកស្រីមែរកិល បានទទួលស្គាល់ពីកំហុសនយោបាយអន្តោប្រវេសន៍របស់បក្សកាន់អំណាច ដោយលើកឡើងថា រដ្ឋាភិបាលមិនបានត្រៀមខ្លួនគ្រប់គ្រាន់ក្នុងការទទួលជនភៀសខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ថ្ងៃចន្ទនេះ ប្រមុខដឹកនាំអាល្លឺម៉ង់ អាន់ហ្កឺឡា មែរកិល មិនបានចេញដំណើរទៅចូលរួមកិច្ចប្រជុំអង្គការសហប្រជាជាតិនៅក្រុងញូវយកទេ។ លោកស្រីមែរកិល សុខចិត្តនៅក្នុងស្រុក ដើម្បីថ្លែងទទួលស្គាល់ពីកំហុសបក្សកាន់អំណាចCDU ក្នុងនយោបាយអន្តោប្រវេសន៍ទទួលជនភៀសខ្លួន។ គេរំពឹងថា ដោយសារនយោបាយអន្តោប្រវេសន៍នេះ បក្សកាន់អំណាចCDU បានជួបបរាជ័យក្នុងការបោះឆ្នោតតំបន់ជាបន្តបន្ទាប់។
បក្សកាន់អំណាចទើបបរាជ័យ ក្នុងការបោះឆ្នោតនៅ Mecklembourg-Poméramie តំបន់ភាគ ខាងជើងប្រទេស កាលពីថ្ងៃ៤កញ្ញា ប៉ុណ្ណោះ។ ដោយសារបក្សកាន់អំណាចបរាជ័យឆ្នោតតំបន់នៅប៊ែរឡាំង កាលពីថ្ងៃអាទិត្យ បក្សCSU ជាបក្សដៃគូបានទាមទារអោយរឹតបន្តឹងនយោបាយអន្តោប្រវេសន៍អោយកាន់តែខ្លាំង។
ថ្ងៃចន្ទនេះ លោកស្រីមែរកិលលើកឡើងថា បើសិនជាអាច លោកស្រីនឹងរុញពេលវេលាអោយដើរថយទៅក្រោយវិញអោយបានច្រើនឆ្នាំ ដើម្បីអោយបក្សកាន់អំណាចត្រៀមដោះស្រាយស្ថានភាពដែលបានកើតឡើង កាលពីចុងរដូវក្តៅឆ្នាំ២០១៥ អោយបានប្រសើរជាងនេះ។
កាលពីខែកញ្ញាឆ្នាំ២០១៥ អាល្លឺម៉ង់បានបង្ហាញទង្វើមនុស្សធម៌ ដោយបានបើកទ្វារព្រំដែន ទទួលយកជនភៀសខ្លួន ពីសង្គ្រាមស៊ីរីសន្ធឹកសន្ធាប់។ កន្លងមក លោកស្រីមែរកិលបានអួតច្រើនដងថា អាល្លឺម៉ង់មានសមត្ថភាពបណ្តុះបណ្តាលជនភៀសខ្លួនអោយចូលចុះក្នុងសង្គម។
ហេតុការណ៍បំពានភេទស្រីៗ បង្កឡើងដោយជនភៀសខ្លួន ក្នុងថ្ងៃបុណ្យចូលឆ្នាំសកល កន្លងទៅ បូករួមនឹងការវាយប្រហារភេរវកម្មក្នុងស្រុក កន្លងមក បានធ្វើអោយប្រជាជនអាល្លឺម៉ង់លែងពេញចិត្តនយោបាយអន្តោប្រវេសន៍ជាតិតទៅទៀត។ ពេលនេះ លោកស្រីមែរកិលលែងអួតអាងពីនយោបាយអន្តោប្រវេសន៍ទៀតហើយ លោកស្រីប្រែសម្រួលពាក្យពេចន៍ទៅវិញថា ក្នុងពិភពលោក អាល្លឺម៉ង់មិនមែនជាជើងឯក ជួយអោយជនអន្តោប្រវេសន៍រស់នៅចុះក្នុងសង្គមទេ។
បក្សកាន់អំណាចកំពុងភ័យខ្លាចបរាជ័យការបោះឆ្នោតសភាឆ្នាំក្រោយនេះ។ បក្សស្តាំជ្រុលនិយម AfD ដែលទើបតែបង្កើតឡើងនៅឆ្នាំ២០១៣ កំពុងឡើងប្រជាប្រិយភាព ក្នុងស្រុក អាចបំបែកសម្លេងឆ្នោតបក្សផ្សេងៗបាន។ បក្សស្តាំជ្រុលបាន ទទួលសម្លេងឆ្នោតលំដាប់ទី២ ឈ្នះបក្សលោកស្រីមែរកិល ក្នុងការបោះឆ្នោតតំបន់ Mecklembourg ភាគខាងជើង កាលពីដើមខែ។ បក្សស្តាំជ្រុល ប្រហែលអាចទទួលបានកៅអីសភា ជាលើកដំបូង សម្រាប់ការបោះឆ្នោតឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ