យុទ្ធនាការលាងសម្អាតប្រព័ន្ធយុត្តិធម៌កម្ពុជា
ចុះផ្សាយនៅថ្ងៃ៖
ស្តាប់ - ០៤:១៤
ក្រោយពីយុទ្ធនាការកណ្តាប់ដៃដែកបំបែកក្រុមមន្ត្រីខិលខូចនៅក្នុងតុលាការខេត្តពោធិ៍សាត់ និងក្នុងជួរប៉ូលិសគ្រឿងញៀនរួចមក អង្គភាពប្រឆាំងអំពើពុករលួយបានចាប់ខ្លួនចៅក្រមពីរនាក់ទៀតនៃតុលាការសាលាដំបូងខេត្តកណ្តាលកាលពីល្ងាចថ្ងៃសុក្រម្សិលមិញក្រោមបទចោទប្រកាន់ថាបានទទួលលុយពីគ្រួសារជនជាប់ចោទជាថ្នូរនឹងការដោះលែង។ យុទ្ធនាការនេះត្រូវគេមើលឃើញថា មានសារៈសំខាន់ណាស់សម្រាប់កែទម្រង់ប្រព័ន្ធយុត្តិធម៌នៅកម្ពុជាប៉ុន្តែ តម្លាភាព និងសមភាពនៃចំណាត់ការរបស់អង្គភាពប្រឆាំងអំពើពុករលួយនៅតែជាសញ្ញាសួរមួយនៅឡើយសម្រាប់ក្រុមអ្នកតាមដានព្រឹត្តិការណ៍នយោបាយកម្ពុជា។
អំពើពុករលួយនៅក្នុងតុលាការគឺជាជំងឺរ៉ាំរ៉ៃមួយដែលធ្វើឲ្យប្រព័ន្ធយុត្តិធម៌កម្ពុជាធ្លាក់ទន់ខ្សោយ និងបាត់បង់ជំនឿចិត្តពីមហាជនជាទូទៅ។ អ្វីដែលអាក្រក់បំផុតគឺចៅក្រមដែលជាអ្នកស្វែងរកយុត្តិធម៌បែរជាបណ្តោយខ្លួនឲ្យលង់ក្រោមឥទ្ធិពលទឹកប្រាក់យ៉ាងងប់ងល់ទៅវិញ។ គឺជារឿងគួរឲ្យតក់ស្លុតណាស់នៅពេលដែលមន្ត្រីតុលាការប្រើប្រាស់ឆន្ទានុសិទ្ធិរបស់ខ្លួនធ្វើឲ្យរឿងសក្លាយជាខ្មៅ និងរឿងខ្មៅក្លាយជាស។ តើមានមនុស្សប៉ុន្មាននាក់ដែលទទួលរងភាពអយុត្តិធម៌ដោយសារតែមន្ត្រីតុលាការខិលខូចមួយចំនួនទាំងនោះ? តើអ្នកដែលទទួលរងអំពើអយុត្តិធម៌ទាំងនោះឈឺចាប់ប៉ុណ្ណា? តើអយុត្តិធម៌សង្គមដែលបង្កឡើងដោយមន្ត្រីតុលាការខិលខូចទាំងនោះបង្កផលប៉ះពាល់ប៉ុណ្ណាដល់មុខមាត់ប្រទេសកម្ពុជា? សំណួរទាំងនេះគ្រប់គ្រាន់ដើម្បីបញ្ជាក់ពីភាពចាំបាច់នៃប្រតិបត្តិការកណ្តាប់ដៃដែកប្រឆាំងនឹងមន្ត្រីពុករលួយនៅក្នុងប្រព័ន្ធតុលាការកម្ពុជា។
កាលពីឆ្នាំមុន ការចាប់ខ្លួនព្រះរាជអាជ្ញាតុលាការខេត្តពោធិ៍សាត់ លោកតុប ចន្ទសិរីវុឌ្ឍន៍ បានធ្វើឲ្យកក្រើកប្រព័ន្ធតុលាការម្តងរួចហើយ។ បន្ទាប់មកទៀត មន្ត្រីប៉ូលិសប្រឆាំងគ្រឿងញៀនមួយខ្សែក៏ត្រូវបានចាប់ខ្លួនបញ្ជូនទៅតុលាការដែរ។ ឥឡូវនេះឈានដល់ចៅក្រមតុលាការខេត្តកណ្តាលវិញម្តង។ នេះជាស្នាដៃធំៗរបស់អង្គភាពប្រឆាំងអំពើពុករលួយដែលកាលពីមុននេះមានមនុស្សតិចតួចប៉ុណ្ណោះដែលជឿថាអាចធ្វើរឿងនេះបាន។ ក្រៅពីនេះ យុទ្ធនាការប្រឆាំងអំពើពុករលួយនៅក្នុងចំណោមមន្ត្រីពន្ធដារដើម្បីទប់ស្កាត់ការយកកម្រៃលើសចំនួនកំណត់ក៏ជាស្នាដៃគួរឲ្យកត់សម្គាល់មួយដែរ។
នៅកម្ពុជា អំពើពុករលួយកើតមានស្ទើរតែគ្រប់វិស័យ ប៉ុន្តែ វិស័យតុលាការ និងប៉ូលិសត្រូវបានរបាយការណ៍សិក្សារបស់សង្គមស៊ីវិលមួយចំនួនរកឃើញថា មានអំពើពុករលួយខ្លាំងជាងគេ។ អំពើពុករលួយនៅក្នុងវិស័យសំខាន់ៗទាំងពីរនេះគឺជាគ្រោះថ្នាក់ធំធេងពីព្រោះវាជាប្រភពនៃអយុត្តិធម៌សង្គមដែលបង្កឲ្យមានការឈឺចាប់នៅក្នុងចំណោមមហាជន ជាពិសេសអ្នកក្រីក្រគ្មានខ្នងបង្អែកតែម្តង។ ដោយមើលឃើញបញ្ហានេះហើយ ទើបរដ្ឋាភិបាលបានដាក់ចេញគោលនយោបាយកំណែទម្រង់ប្រព័ន្ធយុត្តិធម៌ និងច្បាប់នៅកម្ពុជា។ នៅក្នុងក្របខ័ណ្ឌនៃកំណែទម្រង់នេះ អង្គភាពប្រឆាំងអំពើពុករលួយត្រូវបានបង្កើតឡើង។ ថ្វីដ្បិតតែការសង្ស័យអំពីប្រសិទ្ធិភាព និងតម្លាភាពនៃការអនុវត្តច្បាប់របស់អង្គភាពនេះនៅតែជាបញ្ហាធំធេងមួយប៉ុន្តែ ប្រតិបត្តិការដែលបាននិងកំពុងកើតឡើងនៅពេលចុងក្រោយនេះគឺជាសញ្ញាវិជ្ជមាន គួរឲ្យលើកទឹកចិត្ត។
វិលមកនិយាយអំពីការចាប់ខ្លួនចៅក្រមតុលាការវិញ ព្រឹត្តិការណ៍នេះជាសូរជួងដាស់ស្មារតីមន្ត្រីអនុវត្តច្បាប់ទាំងអស់ឲ្យបញ្ឈប់អំពើពុករលួយ និងងាកមកគោរពច្បាប់ឲ្យបានត្រឹមត្រូវ។ បើពុំដូច្នោះទេ ពួកគេនឹងទទួលទោសដូចមានជាឧទាហរណ៍ស្រាប់។ នេះជាអត្ថន័យយ៉ាងសំខាន់ដែលស្តែងចេញពីយុទ្ធនាការរបស់អង្គភាពប្រឆាំងអំពើពុករលួយ។ ប៉ុន្តែ ប្រតិបត្តិការនេះអាចរក្សាអត្ថន័យដ៏សំខាន់នេះបានទាល់តែចំណាត់ការរបស់អង្គភាពប្រឆាំងអំពើពុករលួយត្រូវបានអនុវត្តស្មើភាពគ្នានៅចំពោះមុខជនពុករលួយទាំងអស់ដោយមិនរើសមុខ។ នេះជាអ្វីដែលគេកំពុងតាមដានមើល និងក៏ជាគន្លឹះសម្រាប់កំណត់ពីជោគជ័យនិងភាពជឿជាក់ទៅលើអង្គភាពប្រឆាំងអំពើពុករលួយ។
សរុបមកវិញ សង្គ្រាមប្រឆាំងមន្ត្រីពុករលួយដើម្បីឈានទៅរកកំណែទម្រង់ប្រព័ន្ធយុត្តិធម៌នៅកម្ពុជាបានចាប់ផ្តើមហើយ និងកំពុងបន្តវាយលុកទៅលើគោលដៅសំខាន់ៗជាពិសេសក្នុងប្រព័ន្ធតុលាការ និងមន្ត្រីប៉ូលិស។ សម្រាប់ក្រុមអ្នកសង្កេតការណ៍ វាដល់ពេលហើយដែលត្រូវបំបាត់ចោលអយុត្តិធម៌សង្គមដ៏គ្រោះថ្នាក់នេះ។ ប៉ុន្តែ តើដាវអាជ្ញាសឹករបស់អង្គភាពប្រឆាំងអំពើពុករលួយអាចសម្រេចគោលដៅនេះបានដែរឬទេ? នេះជាសំណួរដែលត្រូវរកចម្លើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ