សហរដ្ឋអាមេរិក៖អាពាហ៍ពិពាហ៍រវាងបុគ្គលភេទដូចគ្នាកាន់តែមានការទទួលស្គាល់ដោយច្បាប់
ចុះផ្សាយនៅថ្ងៃ៖
ស្តាប់ - ០៤:១៦
រដ្ឋាភិបាលអាមេរិកបានប្រកាសកាលពីថ្ងៃសុក្រកន្លងទៅថានឹងទទួលស្គាល់អាពាហ៍ពិពាហ៍ភេទដូចគ្នានៅក្នុង៧រដ្ឋបន្ថែមទៀត សរុបគឺ ២៦ លើ ៥០រដ្ឋ ព្រមទាំងរដ្ឋធានីវ៉ាស៊ីនតោនផងដែរ។ ការប្រកាសនេះ ធ្វើឡើងបន្ទាប់ពីការបដិសេធរបស់តុលាការកំពូល ដើម្បីអន្តរាគមន៍ពិភាក្សាលើបញ្ហាច្បាប់ ទាក់ទង នឹងអាពាហ៍ពិពាហ៍រវាងបុគ្គលភេទដូចគ្នាក្នុងរដ្ឋចំនួន៥ កាលពីថ្ងៃច័ន្ទទី៦ខែតុលា ពីរសប្តាហ៍មុន។
ក្នុងរយៈពេលប៉ុន្មានសប្តាហ៍ចុងក្រោយនេះ អាពាហ៍ពិពាហ៍រវាងបុគ្គលភេទដូចគ្នា ជាប្រធានបទដ៏ក្តៅ គគុកមួយក្នុងសង្គមអាមេរិច។ ពិសេសបន្ទាប់ពីមានសេចក្តីសម្រេចរបស់តុលាការកំពូល បដិសេធមិន ពិនិត្យលើ ចំនោទសួរបញ្ហាច្បាប់ស្តីពី អាពាហ៍ពិពាហ៍រវាងបុគ្គលភេទដូចគ្នា។ សេចក្តីសម្រេចនេះធ្វើ ឡើងបន្ទាប់ពីមានការប្តឹងសារទុក្ខលើសាលដីការបស់សាលាឧទ្ធរណ៍ នៃរដ្ឋ សហព័ន្ធ ដែលបានសម្រេចពីអធម្មនុញ្ញភាពនៃច្បាប់ដែលហាមឃាត់អាពាហ៍ពិពាហ៍រវាងបុគ្គលភេទ ដូចគ្នា ក្នុងរដ្ឋចំនួនប្រាំគឺ Utah, Indiana, Oklahoma, Virginie និង Wisconsin។
ការមិនយល់ព្រមពិនិត្យលើអង្គសេចក្តីនៃបណ្តឹងរបស់តុលាការកំពូលនេះ ត្រូវបានគេបកស្រាយថា នាំឲ្យ មានការអនុញ្ញាតដោយតណ្ហីឬដោយជាក់ស្តែង (De facto) ចំពោះអាពាហ៍ពិពាហ៍ភេទដូចគ្នាក្នុងរដ្ឋទាំង ៥ នោះ ដោយសារថាសាលដីកាសាលាឧទ្ធរណ៍ទាំងនោះមិន ត្រូវបានបដិសេធចោលដោយតុលាការកំពូល។
គួរំលឹកផងដែរថា វិស័យអាពាហ៍ពិពាហ៍ស្ថិតក្នុងដែនសមត្ថកិច្ចនៃរដ្ឋនិមួយៗដែលអាចធ្វើច្បាប់អនុញ្ញាត ឬហាមឃាត់លើអាពាហ៍ពិពាហ៍។ ទោះបីជាច្បាប់របស់រដ្ឋសហព័ន្ធ មិនមានចែងពីលក្ខខណ្ឌច្បាប់នៃ ការរៀបអាពាហ៍ពិពាហ៍ក្តី តែច្បាប់របស់រដ្ឋសហព័ន្ធចែងពីសិទ្ធិ និងទំនួលខុសត្រូវ រវាងសហព័ទ្ធ និងពីលក្ខណៈខុសគ្នាតាមផ្លូវច្បាប់ រវាងសហព័ទ្ធមានអាពាហ៍ពិពាហ៍និងគ្មានអាពាហ៍ពិពាហ៍។ ហើយ តុលាការសហព័ន្ធក៏មានសមត្ថកិច្ចក្នុងការសម្រេចពីធម្មនុញ្ញភាព ឬអធម្មនុញ្ញភាពនៃច្បាប់ ទាំងនេះ ក្នុង ករណីមានបណ្តឹងកើតឡើង។
កាលពីឆ្នាំកន្លងទៅនេះ តុលាការកំពូលរដ្ឋសហព័ន្ធ ក៏ធ្លាប់បានប្រកាស ផងដែរពីអសុពលភាពនៃច្បាប់សហព័ន្ធលើផ្នែកមួយដែលបានចែងថា អាពាហ៍ពិពាហ៍អាចធ្វើឡើងតែ រវាងស្ត្រីនិងបុរស។ ការសម្រេចបែបនេះបានបើកផ្លូវសម្រាប់សហព័ទ្ធភេទដូចគ្នា ដែលបានរៀបការ ដោយស្របច្បាប់ក្នុងរដ្ឋដែលទទួលស្គាល់អាពាហ៍ពិពាហ៍ភេទដូចគ្នាចំនួន១៩ ឲ្យទទួលបាននូវជំនួយ ប្រាក់ឧបត្ថម និងអត្ថប្រយោជន៍ផ្សេងទៀត ពីរដ្ឋសហព័ន្ធ។
យ៉ងណាមិញបានមិនដល់ពីរសប្តាហ៍ផងបន្ទាប់ពីសេចក្តីសម្រេចមិនពិនិត្យរបស់តុលាការកំពូល ពោល គឺកាលពីថ្ងៃសុក្រទី១៧តុលាសប្តាហ៍កន្លងទៅនេះ ស្រាប់តែរដ្ឋាភិបាលអាមេរិក បានប្រកាសថានឹង ទទួលស្គាល់អាពាហ៍ពិពាហ៍ភេទដូចគ្នានៅក្នុងរដ្ឋចំនួន ប្រាំពីរទៀតថែមលើ រដ្ឋចំនួន១៩ដែលមានច្បាប់ ទទួលស្គាល់អាពាហ៍ពិពាហ៍ភេទដូចគ្នា។ រដ្ឋទាំងប្រាំពីរនោះគឺមានរដ្ឋទាំងប្រាំដែលពាក់ព័ន្ធនឹងសំនំុរឿង ខាងលើ បូកនឹងរដ្ឋពីរផ្សេងទៀតគឺ Colorado និង Nevada។ ដូចនេះ សរុបគឺ ២៦រដ្ឋលើ៥០ ព្រមទាំងរដ្ឋធានីវ៉ាស៊ីនតោនផងដែរ ដែលផ្តល់សុពលភាពលើ អាពាហ៍ពិពាហ៍ភេទដូចគ្នា។
បើយើងក្រលេកមើលពីការវិវត្តន៍ក្នុងរយៈពេលដប់ឆ្នាំចុងក្រោយនេះ យើងសង្កេតឃើញថាការគាំទ្រលើ អាពាហ៍ពិពាហ៍ភេទដូចគ្នានេះបានកើនឡើងយ៉ាងខ្លាំង។ ពោលគឺ ការគាំទ្របានកើនឡើងពី ៣២% នៅក្នុងឆ្នាំ២០០៣ ដល់ទៅ ៥៣% នៅក្នុងឆ្នាំ ២០១៣ នេះបើយោងតាមការអង្កេតមួយដែលបានធ្វើដោយ វិទ្យាស្ថានស្រាវជ្រាវសាសនាសាធារណៈ លើប្រជាជនអាមេរិចចំនួន ៤៥០០នាក់។
ទាំងនេះបញ្ជាក់ពីមតិសាធារណៈជនអាមេរិចភាគច្រើន កាន់តែអំណោយផលចំពោះកំនែទំរង់ផ្នត់គំនិត សង្គម លើបញ្ហាដ៏សំខាន់នេះ ព្រោះសូម្បីតែចំណោមក្រុមអ្នកកាន់សាសនាធំៗ ក៏កាន់តែយល់ស្រប ចំពោះមតិនេះដែរ។ ជាក់ស្តែង ការអង្កេតសិក្សាដដែលនេះ បានបញ្ជាក់ថា ៨៣% នៃជនអាមេរិច សាសនាជ្វីហ្វ ៦២% នៃអាមេរិចកាំងប្រូតេស្តង់ ៥៨%នៃអាមេរិចកាំងកាតូលិកស្បែកស និង៥៦%នៃពួកកាតូលិកនិយាយភាសាអេស្បាញ គាំទ្រលើ អាពាហ៍ពិពាហ៍ភេទដូចគ្នា។ យ៉ាងណាមិញកាលពីថ្ងៃច័ន្ទទី១៣តុលា ដើមសប្តាហ៍មុន ពីក្រុង វ៉ាទីកង់ សម្តេចប៉ាប ហ្រ្វង់ស្វ័រ ក៏បានប្រកាសគំាទ្រលើសហព័ទ្ធភេទដូចគ្នាផងដែរ ដែលនេះជាការប្រកាសលើកដំបូងបង្អស់ជាប្រវត្តិសាស្រ្តនៃថ្នាក់ដឹកនាំកំពូលក្នុងរដ្ឋបាលសាសនា កាតូលិកក្រុងវ៉ាទីកង់ ។
ដូចនេះអាចមិនមែនជារឿងចំឡែកទេ ដែលតុលាការកំពូលអាមេរិកសម្រេចប្រកែកមិនពិនិត្យលើចំណោទសួរដ៏រសើបមួយនេះ ដែលមានលក្ខណៈជានយោបាយ ជាជាងលក្ខណៈច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ