លោក ម៉ៅ មុនីវណ្ណ លាឈប់ពីតំណាងរាស្ត្រខេត្តកំពង់ចាមជាផ្លូវការ
នៅព្រឹកថ្ងៃអង្គារនេះ លោក ម៉ៅ មុនីវណ្ណ បានដាក់លិខិតលាលែងចេញពីតំណែងជាតំណាងរាស្ត្រមណ្ឌលកំពង់ចាមជាផ្លូវការ។ ក្រៅពីរិះគន់ពីការដឹកនាំបែបគ្រួសារនិយម លោក ម៉ៅ មុនីវណ្ណ ក៏បានថ្លែងទៅកាន់អ្នកកាសែត ដោយជម្រុញឲ្យគណបក្សសមរង្ស៊ី គោរពនូវគោលការណ៍តំណាងរាស្ត្រពាក់កណ្តាលអាណត្តិ។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ ពីភ្នំពេញ
បន្ទាប់ពីដាក់លិខិតលាលែងពីតំណាងរាស្ត្រ នៅព្រឹកថ្ងៃអង្គារនេះ លោក ម៉ៅ មុនីវណ្ណ បានថ្លែងទៅកាន់អ្នកកាសែតនៅមុខវិមានរដ្ឋសភាថា ការសម្រេចចិត្តរបស់លោក ដើម្បីធ្វើជាគំរូឲ្យមេដឹកនាំគណបក្សសមរង្ស៊ីគោរពសន្យា ចំពោះការធ្វើតំណាងរាស្ត្រពាក់កណ្តាលអាណត្តិ។
តាមគម្រោង តំណាងរាស្ត្រពាក់កណ្តាលអាណត្តិរបស់គណបក្សសមរង្ស៊ី ត្រូវអនុវត្ត នៅថ្ងៃទី២៤មីនា ឆ្នាំ២០១១។ ប៉ុន្តែ កាលពីខែកុម្ភៈ គណៈអចិន្ត្រៃយ៍គណបក្សសមរង្ស៊ី បានសម្រេចពន្យារពេលមួយឆ្នាំទៀត តាមការសម្របសម្រួល នាំឲ្យបញ្ហានេះបានស្ងប់ស្ងាត់មួយរយៈ។
នៅព្រឹកមិញ លោក ម៉ៅ មុនីវណ្ណ បានលើកឡើងថា ថ្នាក់ដឹកនាំគណបក្សសមរង្ស៊ី បានលេបសម្តីខ្លួនឯង ហើយបែរជាស្តាប់សម្តីអ្នកមានឥទ្ធិពលក្នុងគណបក្សតែពីរគ្រួសារ គឺគ្រួសារលោក យឹម សុវណ្ណ និងគ្រួសារលោក អេង ឆៃអ៊ាង។ យោងតាមលោក ម៉ៅ មុនីវណ្ណ គ្រួសារពីរនេះមានចំណងពិសេសជាមួយគ្រួសារលោកសមរង្ស៊ី ហើយមានឥទ្ធិពលលើសេចក្តីសម្រេចធំៗរបស់គណបក្សសមរង្ស៊ី។
លោក ម៉ៅ មុនីវណ្ណ ក៏បានជម្រុញឲ្យគណបក្សសមរង្ស៊ី កែទម្រង់ផ្ទៃក្នុង និងអំពាវនាវ ឲ្យសកម្មជនគណបក្សសមរង្ស៊ី រួមដៃជាមួយលោក ដើម្បីរំដោះលោកសមរង្ស៊ី ចេញពីគំនាបរបស់គ្រួសារនិយម។ បើមិនអាចធ្វើបានទេ លោកនឹងដឹកនាំអ្នកគាំទ្រ ទៅរួមដៃជាមួយអ្នកប្រជាធិបតេយ្យណាមួយ។
ការធ្វើសេចក្តីប្រកាសជាលាយលក្ខណ៍អក្សរ និងដោយផ្ទាល់មាត់យ៉ាងដូច្នេះ ត្រូវបានលោក ម៉ៅ មុនីវណ្ណ អះអាងថា ដើម្បីស្តារប្រជាប្រិយភាពគណបក្សសមរង្ស៊ី ហើយរៀបចំមូលដ្ឋានគណបក្សប្រឆាំងនេះ ឲ្យឈានទៅរកជោគជ័យក្នុងការបោះឆ្នោតខាងមុខ។
ទោះជាយ៉ាងណា លោក ម៉ៅ មុនីវណ្ណ បានគូសបញ្ជាក់ថា ពេលនេះ លោកប្រកាសលាលែងចេញតែពីតំណាងរាស្ត្រប៉ុណ្ណោះ តែមិនបានលាឈប់ពីតួនាទីក្នុងគណបក្សសមរង្ស៊ី ដែលជាសមាជិកគណៈកម្មាធិការអចិន្ត្រៃយ៍ និងជាប្រធានគណបក្សសមរង្ស៊ី ប្រចាំខេត្តតាកែវឡើយ។
ចំពោះការបរិហាររបស់លោកម៉ៅ មុនីវណ្ណ នៅថ្ងៃនេះ ត្រូវបានលោក យឹម សុវណ្ណ អ្នកនាំពាក្យគណបក្សសមរង្ស៊ី ចាត់ទុកថា ជាសម្តីរបស់អ្នកជំទាស់នឹងគណបក្សសមរង្ស៊ី ដែលក្រោយមក អ្នកនោះនឹងទៅចុះចូលជាមួយគណបក្សប្រជាជនកម្ពុជា។ ម្យ៉ាងទៀតគណៈអចិន្ត្រៃយ៍គណបក្សសមរង្ស៊ី នឹងប្រជុំពិនិត្យលើខ្លឹមសារសម្តីរបស់លោក ម៉ៅ មុនីវណ្ណ មុននឹងចាត់វិធានការ។
លោក យឹម សុវណ្ណ ក៏បានច្រានចោល ចំពោះការលើកឡើងពីបញ្ហាគ្រួសារនិយមក្នុងគណបក្សប្រឆាំង ហើយថា រាល់សេចក្តីសម្រេចក្នុងគណបក្សសមរង្ស៊ី មិនមានបុគ្គលណាម្នាក់ មានឥទ្ធិពល ឬមានអំណាចទេ។ អ្វីៗត្រូវសម្រេចជារួម ដោយគណៈកម្មាធិការអចិន្ត្រៃយ៍ និងសម្រេចដោយគណៈកម្មការនាយក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ