លោក ម៉ៅ មុនីវណ្ណ សម្រេចលាឈប់ពីតំណាងរាស្ត្រគណបក្សសមរង្ស៊ី ប្រចាំខេត្តកំពង់ចាម
លោក ម៉ៅ មុនីវណ្ណ អ្នកតំណាងរាស្ត្រ របស់គណបក្សសមរង្ស៊ី ប្រចាំមណ្ឌលកំពង់ចាម បានសម្រេច ដាក់ពាក្យលាឈប់ពីតំណាងរាស្ត្រ ដើម្បីគោរពតាមគោលការណ៍តំណាងរាស្ត្រពាក់កណ្តាលអាណត្តិរបស់គណបក្ស សមរង្ស៊ី។ នៅថ្ងៃនេះ លោក យឹម សុវណ្ណ អ្នកនាំពាក្យគណបក្សសមរង្ស៊ី បានអះអាងថា គណបក្សគាំទ្រ និងគោរពតាមការសម្រេចចិត្តរបស់លោក ម៉ៅ មុនីវណ្ណ ហើយថា គណបក្សប្រឆាំងនេះ មិនបានបង្ខិតបង្ខំឲ្យអ្នកតំណាងរាស្ត្រណាម្នាក់ លាលែងតំណែងឡើយ។
ចុះផ្សាយនៅថ្ងៃ៖
លោក ម៉ៅ មុនីវណ្ណ អ្នកតំណាងរាស្ត្រមណ្ឌលកំពង់ចាម និងអតីតប្រធានក្រុមការងារគណបក្សសមរង្ស៊ី ប្រចាំខេត្តកំពង់ចាម បានសម្រេចចិត្ត ដាក់ពាក្យលាឈប់ពីតំណែង អ្នកតំណាងរាស្ត្រ ចាប់ពីថ្ងៃទី៣០មីនានេះ។
សេចក្តីរាយការណ៍ បានលើកឡើងថា លោក ម៉ៅ មុនីវណ្ណ បានដាក់លិខិតសុំលាឈប់ពីអ្នកតំណាងរាស្ត្រមណ្ឌលកំពង់ចាម ទៅកាន់ថ្នាក់ដឹកនាំគណបក្សសមរង្ស៊ី កាលពីដើមខែនេះ។ ចំណែកការឈរឈ្មោះ ជាបេក្ខភាពសមាជិកព្រឹទ្ធសភា សម្រាប់ការបោះឆ្នោត នៅឆ្នាំ២០១២ លោក ម៉ៅ មុនីវណ្ណ មិនឈរឈ្មោះទេ។ ក៏ប៉ុន្តែលោក ម៉ៅ មុនីវណ្ណ នៅតែកាន់តួនាទីជាប្រធានគណបក្សសមរង្ស៊ី នៅខេត្តតាកែវ តាមការសម្រេចរបស់គណបក្ស។
នៅរសៀលថ្ងៃទី១១មីនានេះ វិទ្យុបារាំងអន្តរជាតិ មិនអាចទាក់ទងលោក ម៉ៅ មុនីវណ្ណ ដើម្បីសុំអត្ថាធិប្បាយបានទេ ដោយអ្នកលើកទូរស័ព្ទរបស់លោកអះអាងថា អ្នកតំណាងរាស្ត្ររូបនេះ បានធ្វើដំណើរទៅកាន់ខេត្តមណ្ឌលគិរី។
ក៏ប៉ុន្តែលោក ម៉ៅ មុនីវណ្ណ បានថ្លែងប្រាប់អ្នកយកព័ត៌មានរបស់វិបសៃត៍ CEN ថា ការសម្រេចលាឈប់ពីតំណែងអ្នកតំណាងរាស្ត្រ ដោយសារតែលោកគោរពសន្យា ជាមួយសកម្មជនគណបក្សនៅខេត្តកំពង់ចាម ក្នុងរឿងតំណាងរាស្ត្រពាក់កណ្តាលអាណត្តិ។
លោក ម៉ៅ មុនីវណ្ណ បានបន្តថា លោកបានយល់ព្រមប្រគល់កៅអីសមាជិករដ្ឋសភា ទៅឱ្យបេក្ខជនអ្នកតំណាងរាស្ត្រ លំដាប់លេខរៀងទី៧ របស់គណបក្សសម រង្ស៊ី។ តំណាងរាស្ត្រថ្មី នឹងចូលកាន់តំណែង ចាប់ពីថ្ងៃទី៣០មីនា រហូតដល់ការបោះឆ្នោតជាតិ នៅខែកក្កដា ឆ្នាំ២០១៣។
ចំពោះបញ្ហានេះ លោក យឹម សុវណ្ណ អ្នកនាំពាក្យគណបក្សសម រង្ស៊ី បានលើកឡើងថា គណបក្សសម រង្ស៊ី មិនបានបង្ខំឲ្យនរណាម្នាក់ លាលែងចេញពីតំណាងរាស្ត្រទេ ពីព្រោះកន្លងមក គណបក្សមានរូបមន្តដោះស្រាយ ដែលទាំងអស់គ្នាអាចទទួលយកបាន។ នោះគឺការពន្យារពេលតំណាងរាស្ត្រពាក់កណ្តាលអាណត្តិមួយឆ្នាំទៀត ហើយតំណាងរាស្ត្រ ដែលមានវ័យចំណាស់ ទៅធ្វើជាបេក្ខជនព្រឹទ្ធសភា។ ក្នុងការបោះឆ្នោតព្រឹទ្ធសភា ខែមករា ឆ្នាំ២០១២ ខាងមុខ គណបក្សសមរង្ស៊ី រំពឹងថា បានយ៉ាងតិច ១១ កៅអី។
យ៉ាងណាក៏ដោយ លោក យឹម សុវណ្ណ បានអបអរសាទរ និងគាំទ្រចំពោះជំហររបស់លោក ម៉ៅ មុនីវណ្ណ។ តាមការព្រមព្រៀង ការបែងចែកបំពេញការងារជាអ្នកតំណាងរាស្ត្រពាក់កណ្តាលអាណត្តិរបស់គណបក្សសម រង្ស៊ី ដែលមាន ២៦ កៅអី សម្រាប់រដ្ឋសភានីតិកាលទី៤ នឹងត្រូវចាប់ផ្តើមពីថ្ងៃទី២៤ ខែមីនា ឆ្នាំ២០១១នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ