គណបក្សសមរង្ស៊ី អាចដូរតំណាងរាស្ត្រមួយចំនួន
នៅថ្ងៃអង្គារនេះ លោក យឹម សុវណ្ណ អ្នកនាំពាក្យគណបក្សសមរង្ស៊ី បានប្រកាសថា គណបក្សប្រឆាំង អាចនឹងមានការផ្លាស់ប្តូរតំណាងរាស្ត្រខ្លះ ស្របតាមគោលការណ៍របស់គណបក្ស ដែលបានកំណត់ពីការធ្វើតំណាងរាស្ត្រពាក់កណ្តាលអាណត្តិ។ សេចក្តីប្រកាសនេះ បានធ្វើឡើង ក្រោយពីក្រុមបេក្ខជនតំណាងរាស្ត្រដែលត្រូវចូលកាន់តំណែងជាតំណាងរាស្ត្ររបស់គណបក្សសមរង្ស៊ី ចំនួន ៨ រូប បានធ្វើញត្តិ ដាក់ទៅកាន់លោក សមរង្ស៊ី កាលពីថ្ងៃទី២២មករា។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហូរពីភ្នំពេញ
ការ បញ្ជាក់ពីលទ្ធភាព ដែលអាចដោះដូរតំណាងរាស្ត្រមួយ ចំនួន របស់គណបក្សសមរង្ស៊ី បានធ្វើ ឡើងភ្លាមៗ បន្ទាប់ពីក្រុមបេក្ខជនតំណាងរាស្ត្ររបស់បក្សប្រឆាំង បានធ្វើញត្តិ ជម្រុញឲ្យលោក សម រង្ស៊ី ដែលកំពុងស្ថិតនៅក្រៅប្រទេស កុំឲ្យបំភ្លេចពាក្យសន្យានៃការផ្លាស់ប្តូរតំណាងរាស្ត្រ នៅពាក់កណ្តាលអាណត្តិ។
ក្នុងសន្និសីទកាសែត នៅព្រឹកថ្ងៃអង្គារទី២៥មករានេះ លោក យឹម សុវណ្ណ អ្នកនាំពាក្យគណបក្សសមរង្ស៊ី បានបញ្ជាក់ដោយរបៀបស្ទាក់ស្ទើរថា គណៈកម្មាធិការអចិន្ត្រៃយ៍ចំនួន ១៥ រូប របស់បក្សប្រឆាំង បានដាក់ចេញនូវដំណោះស្រាយសមស្របមួយ។ ជាដំណោះស្រាយ ដែលគ្រប់ៗគ្នា នឹងអាចទទួលយកបាន ដើម្បីផ្តល់នូវតួនាទីសមរម្យ ទៅដល់បេក្ខជនអ្នកតំណាងរាស្ត្រ ដែលមិនបានជាប់បោះឆ្នោត កាលពីឆ្នាំ២០០៨។
យ៉ាងណាក៏ដោយ លោកតំណាងរាស្ត្រ យឹម សុវណ្ណ មិនបានបញ្ជាក់ឲ្យបានច្បាស់លាស់ពីការផ្លាស់ប្តូរតំណាងរាស្ត្រពាក់កណ្តាលអាណត្តិរបស់គណបក្សសមរង្ស៊ីនោះឡើយ។ តែអាចមានតំណាងរាស្ត្រខ្លះ ត្រូវដោះដូរ ហើយដំណោះស្រាយរួមនោះ នឹងធ្វើឡើងក្នុងពេលឆាប់ៗខាងមុខ។
ចំពោះញត្តិតវ៉ារបស់ក្រុមបេក្ខជនតំណាងរាស្ត្រ ដែលទាមទារឲ្យមានការអនុវត្តគោលការណ៍ផ្លាស់ប្តូរតំណាងរាស្ត្រពាក់កណ្តាលអាណត្តិរបស់គណបក្សសមរង្ស៊ី ត្រូវបានលោក យឹម សុវណ្ណ ចាត់ទុកថា ជាការសំដែងមតិ មិនមែនជាការបែកបាក់ផ្ទៃក្នុងឡើយ។ សេចក្តីសំរេច នៃកិច្ចប្រជុំគណៈកម្មាធិការអចិន្ត្រៃយ៍គណបក្សសមរង្ស៊ី កាលពីថ្ងៃទី៩ ដល់ថ្ងៃទី១១ ខែឧសភា ឆ្នាំ២០០៨ បានលើកឡើងពីការអនុវត្តគោលការណ៍បែងចែកការបំពេញការងារ ជាអ្នកតំណាងរាស្ត្រពាក់កណ្តាលអាណត្តិ មិនមែនធ្វើឡើងចំពោះតំណាងរាស្ត្រគណបក្សសមរង្ស៊ីទាំង ២៦ រូបទេ។ ប៉ុន្តែសម្រាប់តែតំណាងរាស្ត្រនៅមណ្ឌលបន្ទាយមានជ័យ មណ្ឌលកំពង់ចាម មណ្ឌលកំពង់ស្ពឺ មណ្ឌលកំពង់ធំ មណ្ឌលកណ្តាល មណ្ឌលភ្នំពេញ និងមណ្ឌលព្រៃវែង។
តាមសេចក្តីសំរេចនោះ បេក្ខជនតំណាងរាស្ត្រគណបក្សសមរង្ស៊ីបានព្រមព្រៀង អនុវត្តគោលការណ៍បែងចែកការបំពេញការងារជាអ្នកតំណាងរាស្ត្រពាក់កណ្តាលអាណត្តិ តាមលក្ខខណ្ឌ ដោយប្តូរទាំងបេក្ខជនលំដាប់លេខរៀងទី១ ប៉ុន្តែលើកលែងតែលោក សម រង្ស៊ី នៅមណ្ឌលកំពង់ចាម លោក យឹម សុវណ្ណ និងលោក សុន ឆ័យ នៅមណ្ឌលភ្នំពេញ។
ចំណែកលោកស្រី ជូឡុង សូមួរ៉ា ភរិយារបស់លោកសមរង្ស៊ី ដែលជាប់ឆ្នោតតំណាងរាស្ត្រ នៅមណ្ឌលភ្នំពេញ លំដាប់លេខរៀងទី១ ក៏ត្រូវផ្លាស់ប្តូរដែរ។ តំណាងរាស្ត្រពាក់កណ្តាលអាណត្តិរបស់គណបក្សសមរង្ស៊ី ត្រូវដល់កំណត់នៅថ្ងៃទី២៤ ខែមីនា ឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ