សំណុំរឿងលោកម៉ម សូណង់ដូ ជាលទ្ធផលនៃនយោបាយ«ទឹកនិងប្រេង»
ចុះផ្សាយនៅថ្ងៃ៖
ស្តាប់ - ០៤:១៨
ការកាត់ទោសលោក ម៉ម សូណង់ដូ ឲ្យជាប់ពន្ធនាគារ ២០ ឆ្នាំ ពីបទបង្កើតតំបន់អបគមន៍ គឺជាសំណុំរឿងដ៏រសើបមួយទៀតសម្រាប់ឆាកនយោបាយប្រទេសកម្ពុជា។ សំណុំរឿងនេះបានទាក់ទាញការចាប់អារម្មណ៍យ៉ាងពីសំណាក់សហគមន៍អន្តរជាតិ។ លោក ម៉ម សូណង់ដូ ដែលជាអ្នកហ៊ានរិះគន់រដ្ឋាភិបាលដោយឥតសំចៃមាត់តាមរយៈវិទ្យុសំបុកឃ្មុំរបស់លោកធ្វើជាឧបករណ៍បំពងសំឡេងនោះ ត្រូវបានចាប់ខ្លួននិងផ្តន្ទាទោសក្នុងសំណុំរឿងព្រហ្មទណ្ឌដ៏ធ្ងន់ធ្ងរ។ ប៉ុន្តែ បញ្ហានេះបានទទួលការរិះគន់ជាទូទៅថាជារឿងបំបិទមាត់សំឡេងប្រឆាំង។ តើសំណុំរឿងលោកម៉ម សូណង់ដូ អាចឆ្លុះបញ្ចាំងយ៉ាងដូចម្តេចខ្លះពីស្ថានភាពនយោបាយប្រទេសកម្ពុជា?
សំណុំរឿងលោកម៉ម សូណង់ដូបាននិងកំពុងដុតកម្តៅសារជាថ្មីឆាកនយោបាយប្រទេសកម្ពុជាបន្ថែមពីលើសំណុំរឿងលោកសម រង្ស៊ី មេដឹកនាំបក្សប្រឆាំង។ មិនត្រឹមតែតានតឹងនៅក្នុងប្រទេសប៉ុណ្ណោះទេ ប៉ុន្តែ សំណុំរឿងនេះក៏បានទាក់ទាញចំណាប់អារម្មណ៍យ៉ាងខ្លាំងពីសហគមន៍អន្តរជាតិផងដែរ។
ជាក់ស្តែង ការសម្តែងក្តីព្រួយបារម្ភរបស់ប្រធានាធិបតីអាមេរិក លោក បារ៉ាក់ អូបាម៉ា ចំពោះករណីលោកម៉ម សូណង់ដូ និងការចូលសួរសុខទុក្ខលោកម៉ម សូណង់ដូ ដល់ពន្ធនាគារ នៅក្នុងសប្តាហ៍នេះ របស់លោក សូរិយា ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា រួមទាំងក្តីព្រួយបារម្ភរបស់អង្គការសិទ្ធិមនុស្សអន្តរជាតិនានាគឺជាផលវិបាកនៃសំណុំរឿងមួយនេះនៅលើឆាកអន្តរជាតិ។
នៅក្នុងប្រទេសវិញ សំណុំរឿងមួយនេះក៏បានធ្វើឲ្យរំជើបរំជួលឆាកនយោបាយមិនតិចដែរ។ ក្រុមអ្នកគាំទ្រលោក ម៉ម សូណង់ដូ បានហៅការចាប់ខ្លួន និងផ្តន្ទាទោសរបស់តុលាការថាជារឿងនយោបាយ។ ចំណែកឯអាជ្ញាធររដ្ឋាភិបាលបានចាត់ទុកករណីនេះជាសំណុំរឿងព្រហ្មទណ្ឌសុទ្ធសាធ។ ការប្រទាញប្រទង់គ្នាអំពីបញ្ហានេះបានបង្ហាញពីភាពរសើបនៅនៃសំណុំរឿងលោក ម៉ម សូណង់ដូ។ រសើបដោយហេតុថា លោក ម៉ម សូណង់ដូ គឺជាតួអង្គដែលត្រូវបានគេឲ្យតម្លៃផ្សេងៗគ្នា៖ ជាអ្នកសារព័ត៌មាន អ្នកនយោបាយ ឬជាសកម្មជនសិទ្ធិមនុស្ស។ មូលហេតុដែលលោក ម៉ម សូណង់ដូ មានរូបភាពច្រើនបែបនេះគឺដោយសារតែលោកបានធ្វើសកម្មភាពខ្លាំងក្លាក្នុងការរិះគន់«ប្រឆាំងរដ្ឋាភិបាល»។
ជាការពិត សកម្មភាពជាច្រើនរបស់លោក ម៉ម សូំណង់ដូ បានធ្វើឲ្យរដ្ឋាភិបាលសម្លឹងមើលរូបលោកហួសពីអ្នកសារព័ត៌ ឬសកម្មជនសង្គមស៊ីវិល ជាពិសេសនៅពេលដែលនាយកវិទ្យុសំបុកឃ្មុំរូបនេះបានព្យាយាមឆ្កឹះកកាយបញ្ហាជាច្រើនដើម្បីវាយប្រហារតាមរលកធាតុអាកាសទៅលើលោកនាយករដ្ឋមន្ត្រីក្នុងអំណាច។ ដូច្នេះសំណុំរឿងដីធ្លីក្នុងខេត្តក្រចេះដែលក្នុងនោះសមាជិកសមាគមប្រជាធិបតេយ្យរបស់លោក ម៉ម សូណង់ដូ មួយចំនួនបានចូលពាក់ពន្ធ័ គឺជាឱកាសដែលអាជ្ញាធររដ្ឋាភិបាលត្រូវចាត់ការតាមផ្លូវច្បាប់ទៅលើលោកម៉ម សូណង់ដូ ទោះជាមានភស្តុតាងដាក់បន្ទុកស្តួចស្តើងក៏ដោយ។ គេអាចនិយាយបានថា នេះគឺជាលទ្ធផលនៃ«នយោបាយទឹកនិងប្រេង»ដែលនៅតែមានអត្ថិភាពនៅឡើយ ។
ជាការពិតណាស់ ប្រសិនបើគេពិនិត្យមើលសាវតានៃនយោបាយកម្ពុជា គេអាចកត់សម្គាល់ថា នៅពេលមានភាពតានតឹងខ្លាំង អ្នកនយោបាយខ្មែរ ឬគូបដិបក្ខដែលមិនចុះសម្រុងគ្នា មិនសូវចូលចិត្តស្វែងយល់ពីគ្នា ឬពិភាក្សាដើម្បីស្វែងរកការយោគយល់ឡើយ ប៉ុន្តែ ពួកគេបែរជាប្រឹងរកវិធីដើម្បីយកឈ្នះរៀងៗខ្លួនទោះដោយមធ្យោបាយណាក៏ដោយ។ ការយកឈ្នះតាមបែបប្រជាធិបតេយ្យគឺជារឿងធម្មតាប៉ុណ្ណោះ ប៉ុន្តែ ការយកឈ្នះដោយល្បិចកលគឺជារឿងដ៏គ្រោះថ្នាក់ដែលគួរតែបញ្ចប់។
អាចចាត់ទុកថា មានការវិវឌ្ឍន៍មួយគួរឲ្យកត់សម្គាល់ដែរក្នុងបញ្ហានេះ នោះគឺ សង្គ្រាមដណ្តើមឈ្នះក្នុងសង្វៀននយោបាយបានត្រូវបានបង្វែពីការប្រើអាវុធ ឬកម្លាំងបាយ មកប្រើវិធីត្រជាក់វិញ គឺប្រពន្ធ័ឃោសនាមហាជន និងប្រពន្ធ័តុលាការ។ ប៉ុន្តែ ទោះជាមធ្យោបាយណាក៏ដោយ ក៏ផលវិបាករបស់វានៅតែធ្ងន់ធ្ងរដដែល។ លទ្ធផលគឺ អ្នកខ្លាំងនៅតែឈ្នះ ចំណែកអ្នកចាញ់គឺចូលពន្ធនាគារ។
ក្រុមអ្នកវិភាគនយោបាយប្រទេសកម្ពុជាបានមើលឃើញថា ដើម្បីផ្លាស់ប្តូរស្ថានការណ៍នេះ ការប្រកាន់នយោបាយតឹងតែងជ្រុលគួរត្រូវបានកាត់បន្ថយ។ អ្នកនយោបាយប្រឆាំង សកម្មជនសិទ្ធិមនុស្ស និងរដ្ឋាភិបាលមិនមែនត្រូវតែឈរនៅម្ខាងម្នាក់មិនអាចរលាយចូលគ្នាបានដូចទឹកនិងប្រេងនោះឡើយ។ ផលវិបាកដែលស្តែងចេញពីសំណុំរឿងលោក ម៉ម សូំណង់ដូ អាចចាត់ទុកថាមានអ្នកឈ្នះនិងអ្នកចាញ់រវាងភាគីទំនាស់ទាំងពីរ ប៉ុន្តែ បើនិយាយពីបរិបទនយោបាយប្រទេសកម្ពុជាទាំងមូល សំណុំរឿងនេះគ្មានឡើយអ្នកទទួលផលចំណេញ គឺមានតែការខាតបង់តែប៉ុណ្ណោះ ហើយជាការខាតបង់ធំធេងទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ