លីកាដូ៖ ចំនួនអ្នករងគ្រោះដោយបញ្ហាដីធ្លីកើនលើសពីកន្លះលាននាក់
នៅក្នុងរបាយការណ៍ដីធ្លីរបស់ខ្លួនដែលចេញផ្សាយនៅថ្ងៃទី១មេសានេះ សម្ព័ន្ធខ្មែរជំរឿននិងការពារសិទ្ធិមនុស្ស(លីកាដូ) បានកត់ត្រាឃើញថាចំនួនអ្នករងគ្រោះដោយបញ្ហាដីធ្លីនៅកម្ពុជាបានកើនលើសពីកន្លះលាននាក់។ អង្គការនេះក៏បានកត់សម្គាល់ទៀតថា ករណីរំលោភដីធ្លីបានកើនឡើងឥតឈប់ឈររយៈពេល១៣ឆ្នាំកន្លងទៅនេះ ជាពិសេសនៅដើមឆ្នាំ ២០១៤ នេះរលកនៃការរំលោភដីធ្លីបានកើតឡើងជាថ្មីដែលធ្វើឲ្យប៉ះពាល់ដល់ពលរដ្ឋជាង ២០០០ គ្រួសារ។
ចុះផ្សាយនៅថ្ងៃ៖
ស្តាប់ - ០២:២៦
គិតមកត្រឹមខែមិនាចំនួនគ្រួសារដែលរងគ្រោះដោយសារជម្លោះដីធ្លីដែលពាក់ព័ន្ធនឹងរដ្ឋក៏ដូចជាភ្នាក់ងាររដ្ឋនៅក្នុងប្រទេសបានកើនឡើងលើសកន្លះលាននាក់ហើយ។ នេះបើយោងតាមរបាយការណ៍ជម្លោះដីធ្លីដែលអង្គការលីកាដូបានផ្សព្វផ្សាយនៅថ្ងៃអង្គារទី១មេសានេះ។
របាយការណ៍បន្តថា ជម្លោះដីធ្លីបានកើនឡើងយ៉ាងឆាប់រហ័សក្នុងរយៈពេល ១៣ ឆ្នាំកន្លងទៅនេះ ជាពិសេសរយៈពេលប៉ុន្មានខែដើមឆ្នាំ២០១៤ រលកនៃការរំលោភដីធ្លី ដែលមានអំពើហិង្សាផងនៅតែបន្តកើតមានឡើងនិងបានបង្កផលប៉ះពាល់អាក្រក់ដល់ប្រជាពលរដ្ឋជាង ២០០០ គ្រួសារនៅស្ទើរគ្រប់ខេត្ត។ កំណើនករណីរំលោភដីធ្លីត្រូវបានអង្គការក្រៅរដ្ឋាភិបាលមួយនេះហៅថាជាបរាជ័យរបស់រដ្ឋាភិបាលក្នុងការដោះស្រាយបញ្ហាដែលកំពុងបន្តកើតមានទាំងនោះ។
លោកស្រី ណាលី ពីឡូក នាយិកាអង្គការ លីកាដូ បានមានប្រសាសន៍ថា៖ “តួលេខចុងក្រោយទាំងនេះគឺពិតជាគួរឲ្យភ្ញាក់ផ្អើលនិងគួរឲ្យខ្មាស់អៀនពីព្រោះថាពលរដ្ឋរងគ្រោះទាំងនោះតំណាងឲ្យជីវិតដែលត្រូវបានបំផ្លាញយ៉ាងខ្លាំង ហើយពួកគេត្រូវប្រឈមមុខនឹងការលំបាកខ្លាំងនិងរយៈពេលយូរ។ លីកាដូបានអំពាវនាវឲ្យរាជរដ្ឋាភិបាលគួរតែធ្វើសកម្មភាពដើម្បីបញ្ឈប់ជំងឺនៃការរំលោភដីធ្លីដ៏រីករាលដាលនេះ។
របាយការណ៍ក៏បានលើកឡើងអំពីវិធានការរបស់រដ្ឋាភិបាលដែរដូចជាកាលពីខែឧសភាឆ្នាំ ២០១២ រដ្ឋាភិបាលបានបញ្ជាឲ្យផ្អាកការផ្តល់ដីសម្បទានសេដ្ឋកិច្ចថ្មីនិងឲ្យមានការត្រួតពិនិត្យឡើងវិញនូវដីសម្បទានដែលបានផ្តល់រួចហើយ។ ម្យ៉ាងទៀត លោកនាយករដ្ឋមន្ត្រីក៏បានប្រើប្រាស់ក្រុមនិស្សិតជាង ២០០០ នាក់ឲ្យចុះវាស់វែងដីនិងចែកប័ណ្ណកម្មសិទ្ធិជូនពលរដ្ឋផងដែរ។ ប៉ុន្តែ វិធានការទាំងនោះត្រូវបានលីកាដូចាត់ទុកថាគ្មានប្រសិទ្ធភាពទេដោយសារតែការងារគ្មានតម្លាភាព។
កាលពីពេលថ្មីៗនេះ អង្គការអាដហុកក៏បានកត់សម្គាល់ពីការកើនឡើងនៃទំនាស់ដីធ្លីផងដែរ។ អង្គការនេះថែមទាំងបានប្រកាសជួយផ្នែកច្បាប់ដល់ប្រជាពលរដ្ឋដែលមានទំនាស់ដីធ្លីរ៉ាំរ៉ៃក្នុងការដាក់ពាក្យបណ្តឹងផងដែរ។
ក្រៅពីការបង្ហាញផែនទីដើម្បីបញ្ជាក់ពីចំណុចដែលកំពុងកើតមានបញ្ហាដីធ្លី លីកាដូបានផ្តល់យោបល់ដល់រដ្ឋាភិបាលឲ្យបញ្ឈប់ការបណ្តេញពលរដ្ឋពីដីធ្លី ឲ្យគោរពសន្យាក្នុងការត្រួតពិនិត្យឡើងវិញនូវដីសម្បទានសេដ្ឋកិច្ច និងឲ្យបន្តការចែកប័ណ្ណកម្មសិទ្ធិដីធ្លីដល់ប្រជាពលរដ្ឋតាមរយៈស្ថាប័នមានសមត្ថកិច្ចរបស់រដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ