សហគមដែលមានជម្លោះដីធ្លីដាក់ញតិ្តសុំអន្តរាគមន៍ពីសហភាពអឺរ៉ុប
ក្រុមអ្នកភូមិបឹងកក់ បុរីកីឡា និង ថ្មគោលប្រមាណជាង ១០០ នាក់នៅព្រឹកថ្ងៃព្រហស្បតិ៍ទី27 មីនានេះ បានដាក់ញតិ្តស្វែងរកការអន្តរាគមន៍បញ្ហាដីធ្លីពីសហភាពអឺរ៉ុប។ ការដាក់ញតិ្តនេះបានធ្វើឡើងស្របពេលដែលគណៈប្រតិភូសហភាពអឺរ៉ុប ៧នាក់កំពុងធ្វើទស្សនកិច្ចនៅកម្ពុជារយៈពេលបួនថ្ងៃ។ក្នុងញតិ្តនោះ ក្រុមអ្នកមានជម្លោះដីធ្លីបានសុំឲ្យសហភាពអឺរ៉ុបជំរុញឲ្យរដ្ឋាភិបាលកម្ពុជាពន្លឿនការដោះស្រាយបញ្ហាដីធ្លីឲ្យបានឆាប់ និងសុំដោះលែងសកម្មជនដីធ្លី និង សហជីព ២១ នាក់ដែលកំពុងជាប់ពន្ធនាគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ក្រុមអ្នករងគ្រោះដោយសារបញ្ហាដីធ្លី អ្នកភូមិបឹងកក់ បុរីកីឡា និង ថ្មគោល ប្រមាណជាង ១០០នាក់បានប្រមូលផ្តុំគ្នានៅព្រឹកថ្ងៃព្រហស្បតិ៍នេះនៅពីមុខស្ថានឯកអគ្គរដ្ឋទូតសហភាពអឺរ៉ុបប្រចាំទីក្រុងភ្នំពេញ ដើម្បីដាក់ញត្តិសុំអន្តរាគមន៍ពីប្រតិភូសហភាពអឺរ៉ុបដែលកំពុងធ្វើទស្សនកិច្ចនៅកម្ពុជា។
សកម្មជនដីធ្លីភូមិបឹងកក់ អ្នកស្រី ទេព វន្នី បានថ្លែងប្រាប់វិទ្យុបារាំង RFI នៅព្រឹកថ្ងៃព្រហស្បត្តិទី 27 មីនានេះ ថា ក្រុមអ្នកភូមិបឹងកក់ បុរីកីឡា និង ថ្មគោល បានស្នើសុំការអន្តរាគមន៍ចំនួនពីរចំណុចពីសហភាពអឺរ៉ុប។ ទីមួយ គឺ សុំឲ្យសភាអឺរ៉ុបជម្រុញឲ្យរដ្ឋាភិបាលកម្ពុជាបញ្ចប់ការដោះស្រាយបញ្ហាដីធ្លីឲ្យបានឆាប់ដល់ពួកគាត់ និងទីពីរ សុំឲ្យសភាអឺរ៉ុបជួយអន្តរាគមន៍ដោះលែងអ្នកដែលកំពុងជាប់ឃុំទាំង២១នាក់នៅក្នុងពន្ធនាគារត្រពាំងផ្លុង ខេត្តកំពង់ចាម។ អ្នកស្រី ទេព វន្នី សង្ឃឹមថា សភាអឺរ៉ុបនឹងជួយធ្វើអន្តរាគមន៍តាមការស្នើសុំរបស់ក្រុមអ្នកមានបញ្ហាដីធ្លីទាំងនេះ ដោយសារសហភាពអឺរ៉ុបជាម្ចាស់ជំនួយធំរបស់កម្ពុជា។
ក្បួនហែរញតិ្តរបស់ក្រុមសហគមមានទំនាស់ដីធ្លីនៅថ្ងៃនេះ មិនមានការរារាំង ឫ រំខានពីសំណាក់អាជ្ញាធរនោះឡើយ។ តំណាងសហភាពអឺរ៉ុបក៏បានទទួលយកញតិ្តពីសហគមទាំងនោះរួចហើយដែរ។
ជម្លោះដីធ្លីរបស់អ្នកភូមិបឹងកក់ បុរីកីឡា និង ថ្មគោល គឺជាបញ្ហាដីធ្លីដ៏រ៉ាំរ៉ៃ និង ស្មុគស្មាញដែលរាជរដ្ឋាភិបាលកម្ពុជា ក៏ដូចជាអាជ្ញាធរពាក់ព័ន្ធនៅមិនទាន់បានដោះស្រាយបញ្ចប់នៅឡើយ។ ការណ៍នេះ បង្កឲ្យក្រុមអ្នករងគ្រោះដោយបញ្ហាដីធ្លីទាំងនេះតវ៉ារហូតមានការបង្ក្រាប និងចាប់ខ្លួនពីសំណាក់អាជ្ញាធរជាញឹកញាប់នាពេលកន្លងមក។
សូមបញ្ជាក់ថា គណៈប្រតិភូសភាអឺរ៉ុបមួយក្រុមដែលមានគ្នា៧នាក់កំពុងធ្វើទស្សនកិច្ចផ្លូវការចំនួន៤ថ្ងៃនៅប្រទេសកម្ពុជា។ គណៈប្រតិភូនេះបានជួបពិភាក្សាជាបន្តបន្ទាប់ជាមួយមន្ត្រីជាន់ខ្ពស់គណបក្សប្រជាជនកម្ពុជា ថ្នាក់ដឹកនាំគណបក្សសង្គ្រោះជាតិ ថ្នាក់ដឹកនាំរដ្ឋសភាជាតិ និងតំណាងសង្គមស៊ីវិលផងដែរ។
គោលបំណងនៃទស្សនកិច្ចនេះគឺដើម្បីស្វែងយល់អំពីបញ្ហានយោបាយ និងបញ្ហាជាច្រើនទៀតក្នុងក្របខណ្ឌនៃទំនាក់ទំនងទ្វេភាគីរវាងសហភាពអឺរ៉ុបជាមួយកម្ពុជា។ យ៉ាងណាក៏ដោយ នៅមិនទាន់មានការឆ្លើយតបអ្វីនៅឡើយទេចំពោះញត្តិសុំអន្តរាគមន៍របស់សហគមអ្នកមានទំនាស់ដីធ្លីទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ