ទស្សនកិច្ចលោកប្រធានាធិបតីវៀតណាម Truong Tan Sang នៅរុស្ស៊ី
ក្នុងក្របខ័ណ្ឌទស្សនកិច្ចនេះ ដែលប្រព្រឹត្តទៅពីថ្ងៃទី២៦ដល់៣០កក្កដា លោកប្រមុខរដ្ឋវៀតណាមថ្ងៃនេះទទួលជួបចរចា ដោយសមភាគីរុស្ស៊ីលោកប្រធានាធិបតីពូទីន នៅឯនិវេសនដ្ឋានគាត់ជាយក្រុង Sochi មាត់សមុទ្រខ្មៅ ចម្ងាយ១.៦៨០គ.ម. ខាងត្បូងពីម៉ូស្គូ។ ប៉ុន្តែតាំងពីរសៀលថ្ងៃ២៦កក្កដាម្សិលមិញម៉្លេះ លោកTruong Tan Sang បានជួបប្រស្រ័យជាមួយលោកនាយករដ្ឋមន្ត្រីមេដវេដេវ ដែលឆ្នាំមុនក្នុងឋានៈជាប្រមុខរដ្ឋរុស្ស៊ីពេលបំពេញ ទស្សនកិច្ចនៅក្រុងហាណូយរដ្ឋបុរសទាំងពីរធ្លាប់បានជួបពិភាក្សាគ្នាទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
ថ្លែងទៅកាន់លោកប្រធានាធិបតីវៀតណាម Truong Tan Sang នាយករដ្ឋមន្ត្រីរុស្ស៊ី លោកមេដវេដេវ សង្កត់ធ្ងន់ថា រុស្ស៊ីនិងវៀតណាមជាមិត្តដ៏ជំនិតនឹងគ្នាណាស់ និងជាដៃគូយុទ្ធសាស្ត្រ ដែលប៉ុន្មានឆ្នាំចុងក្រោយ ចេះច្រានឲ្យបានឆ្ងាយទៅមុខ កិច្ចសហប្រតិបត្តិការខ្លួននៅតាមមុខព្រួញបែបយ៉ាង វិស័យសេដ្ឋកិច្ច វិស័យមនុស្សធម៌ វិស័យអប់រំ។ ប្រទេសទាំងពីរតែងធ្វើសំវាទនឹងគ្នាជារឿយៗជុំវិញគ្រប់បញ្ហាដែលកើតមាន។ ទំនាក់ទំនងរុស្ស៊ី-វៀតណាមឈរលើគ្រឹះដ៏សែនរឹងមាំ។
លោកប្រមុខរដ្ឋវៀតណាម Truong Tan Sang ពីចំណែកខ្លួនវិញ សំដែងនូវជំនឿថា ក្រោមការដឹកនាំរបស់លោកប្រធានាធិបតីពូទីន, លោកនាយករដ្ឋមន្ត្រីមេដវេដេវ និងបក្សកាន់អំណាច“ប្រទេសរុស្ស៊ីរួមធ្លុងមួយ” ប្រជាជនរុស្ស៊ី មុខជាសម្រេចបានយ៉ាងជោគជ័យនូវការធ្វើទំនើបកម្មប្រទេសជាតិឲ្យបានគ្រប់ជ្រុងជ្រោយ។
លោកបានសំដែងអំណរគុណដល់ប្រទេសរុស្ស៊ីចំពោះការគាំទ្រវៀតណាមឲ្យការពារបានជាប់ម៉ឺងឯករាជ្យជាតិនិងការបង្រួបបង្រួមទឹកដីវឿតណាមឲ្យចូលជាសាច់មួយឡើងវិញ។ លោកបានសំដែងនូវក្តីសោមនស្សន៍ចំពោះការអភិវឌ្ឍន៍នៃភាពជាដៃគូយុទ្ធសាស្ត្រ រវាងវៀតណាមនិងរុស្ស៊ី ដោយទំនាក់ទំនង វាងប្រទេសទាំងពីរតែងឈរលើការជឿទុកចិត្តគ្នាកម្រិតខ្ពស់។
រីឯនាកិច្ចចរចាកំពូល ថ្ងៃ២៧កក្កដានេះ តាមដែលវិមានក្រេមឡាំងប្រកាសឲ្យដឹងលោកប្រធានាធិបតីរុស្ស៊ីពូទីនធ្វើការពិភាក្សា ជាមួយសមភាគីវៀតណាម លោកTruong Tan Sang គឺ បញ្ហាស៊ីជម្រៅសំវាទនយោបាយ ផ្ទៀងមើលគោលជំហរម្ខាងៗ ចំពោះស្ថានការណ៍អន្តរជាតិ បញ្ហាពង្រីកសហប្រតិបត្តិការសេដ្ឋកិច្ច ដែលនាំជាគុណប្រយោជន៍ទៅវិញទៅមក។
ទាក់ទងនឹងចំណុចចុងក្រោយ ភាគីរុស្ស៊ី បានលើកយកមកបង្ហាញ គឺតួលេខដែលថា ក្នុងឆ្នាំ ២០១១កន្លងទៅ ទំហំពាណិជ្ជកម្ម រវាងរុស្ស៊ីនិងវៀតណាម បានឡើងដល់ទឹកប្រាក់ ជាង ៣.០០០ លានដុល្លារអាមេរិក គឺកើនឡើង៥៥%បើប្រៀបទៅនឹងឆ្នាំមុន។
បច្ចុប្បន្ននៅវៀតណាមកំពុងសមិទ្ធិ គឺគម្រោងចំនួន ៧៨ ដែលមានវិនិយោគទុន ពីខាងរុស្ស៊ីក្នុងទឹកប្រាក់១.០០០លានដុល្លារ។ នៅរុស្ស៊ីវិញ កំពុងសមិទ្ធិ គឺគម្រោងចំនួន ១៤ ដែលមានទុនពីខាងវៀតណាម ទំហំ៧៨លានដុល្លារ។
មិនតែប៉ុណ្ណោះ នៅលើទីផ្សារវៀតណាមសព្វថ្ងៃ ដំណើរការយ៉ាងជោគជ័យ គឺក្រុមហ៊ុនឧស្ម័ន ក្រុមហ៊ុនប្រេងកាត ក្រុមហ៊ុនអគ្គិសនីនានារបស់រុស្ស៊ី។
ចាប់ពីថ្ងៃទី១មករាឆ្នាំ២០០៩មក វៀតណាមបានលុបទិដ្ឋាការជាឯកតោភាគីសម្រាប់ជាតិរុស្ស៊ីណាដែលធ្វើដំណើរចូលទឹកដីវៀតណាមសម្រាប់រយៈពេលដល់១៥ថ្ងៃ ហេតុដែលបានជម្រុញឲ្យចំនួនទេសចររុស្ស៊ីដែលទៅទស្សនាវៀតណាមក្នុងឆ្នាំ២០១១កន្លងទៅ ឡើងដល់ ៧ម៉ឺន ៨ពាន់នាក់ ហើយគ្រាន់តែក្នុង៥ខែដំបូងឆ្នាំ២០១២នេះ ឡើងដល់៨ម៉ឺន៧ពាន់នាក់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ