ក្រុងគៀវឈប់ផ្តល់ហិរញ្ញប្បទានដល់ដែនដីដែលត្រួតត្រាដោយ ពួកភេរវជនរុស្ស៊ី
សេចក្តីនេះ ប្រកាសរសៀលម្សិលមិញ ដោយលោកនាយករដ្ឋមន្ត្រីអ៊ុយក្រែន អារសេញី យ៉ាត់សេញុក ក្នុងកិច្ចប្រជុំនៃគណៈរដ្ឋមន្ត្រី។ ប៉ុន្តែ ព្រមជាមួយនេះ គាត់កត់សម្គាល់ ថា ប្រាក់រ៉ឺត្រែត និងប្រាក់វិភាជន៍សង្គមនឹងត្រូវបញ្ជូនដល់រាល់តែពលរដ្ឋណានៅទីនោះ ដែល មានឧបការគុណទទួល។ ចំណែកសហភាពអឺរ៉ុប ប្រកាសថានឹងពុំដកឬសម្រាលទៅវិញឡើយ ទណ្ឌកម្មទល់នឹងរុស្ស៊ី ដែលទទួលស្គាល់ការបោះឆ្នោតខុសច្បាប់ នៅតាមដែនដីបះបោរនោះ។
ចុះផ្សាយនៅថ្ងៃ៖
ស្តាប់ - ០២:២៦
តាមសម្តីលោក អារសេញី យ៉ាត់សេញុក ប្រមុខរដ្ឋាភិបាលអ៊ុយក្រែន ទាយជ្ជទាន ដែលក្រុងគៀវផ្គត់ផ្គង់ដល់ ដែនដីកាន់កាប់ដោយ ពួកភេរវជនរុស្ស៊ី សម្រាប់ករណីខេត្តដូណេតគឺមានទំហំ ១.៥០០លានដុល្លារ ហើយករណីខេត្តលូហ្កាន់ គឺទំហំ ១.១០០លានដុល្លារ។ រដ្ឋាភិបាលសម្រេចថា ឈប់ផ្តល់ហិញ្ញប្បទាន ដល់ពួកភេរវជនទាំងនោះទឿតឡើយ។
ជាការកត់សម្គាល់ លោក យ៉ាត់សេញុក មិនគ្រាន់តែហៅពួកឧទ្ទាមផ្តាច់ទឹកដីនៅ ប៉ែកខាងកើត អ៊ុយក្រែន ថាជា ពួកភេរវជន ប៉ុណ្ណោះទេ តែក៏ប្រើទាំងគុណនាម ”រុស្ស៊ី” ទៅផង។ មូលហេតុមក ពី គាត់ចងគំនុំខ្លាំងណាស់នឹងរុស្ស៊ី ដ្បិតក្រោយពី មានការផ្លាស់ប្តូរអំណាចនៅក្រុងគៀវ កាលពី ខែកុម្ភៈមក ហើយរូបគាត់ត្រូវបានរបបថ្មី តែងតាំងជានាយករដ្ឋមន្ត្រី គាត់បានព្យាយាមភ្ជាប់ខ្សែ ទូរស័ព្ទ អស់ជាច្រើនលើក ជាមួយលោកនាយករដ្ឋមន្ត្រីរុស្ស៊ីមេដវេដេវ ប៉ុន្តែមិនបានសម្រេច ដូចចិត្តឡើយ មកពីម៉ូស្គូចាត់ទុក រូបគាត់ ថាបានតំណែងនេះ គឺតាមផ្លូវរដ្ឋប្រហារទេតើ។
ក្នុងកិច្ចប្រជុំរដ្ឋាភិបាលរសៀលម្សិលមិញ លោក យ៉ាត់សេញុក ក៏បានឲ្យដឹងថា ៖ រាល់តែ ប្រាក់រ៉ឹត្រេត ប្រាក់វិភាជន៍សង្គម មានគិតទុកជាស្រេចទៅហើយសម្រាប់ ពលរដ្ឋម្នាក់ៗ នៅទីនោះ។ នៅចាំតែឱកាស ដែល ពួកភេរវជនរុស្ស៊ី ចាកចេញពីដែនដីដូណេតនិង លូហ្កាន់ យើងនឹងបង់ប្រាក់ទាំងនេះភ្លាម ទៅឲ្យរាល់អ្នកណាដែលមានឧបការគុណទទួល។
លោកនាយករដ្ឋមន្ត្រីអ៊ុយក្រែន ក៏លំអិតថា ឧស្ម័ននិងអគ្គិសនី ជាប្រភពនៃកំដៅ នឹងនៅតែបង្ហូរ ទៅដែនដីនោះដដែល ទោះបីពីទីនោះឥតមានផ្ទេរមកក្រុងគៀវនូវប្រាក់បង់ថ្លៃថាមពលនោះក្តី។ មូលហេតុមកពីរដូវរងាចាប់ផ្តើមជាបណ្តើរៗទៅហើយរួចចង់ឬមិនចង់ អ្នកស្រុករស់នៅទីនោះ គេ ជាពលរដ្ឋអ៊ុយក្រែនតែម្តង។
ថ្លែងនៅក្រុងប៊ែរឡាំង ថ្ងៃ៥វិច្ឆិកាលោកស្រី Angela Merkel នាយករដ្ឋមន្ត្រីប្រទេសអាល្លឺម៉ង់ ប្រទេសជាក្បាលម៉ាស៊ីនសហភាពអឺរ៉ុប បានឲ្យដឹងថា ទណ្ឌកម្មទល់នឹងរុស្ស៊ី ដែលទទួលស្គាល់ ការបោះឆ្នោតខុសច្បាប់ នៅខេត្តបះបោរប៉ែកខាងកើតអ៊ុយក្រែន គឺមិនទាន់អាចបន្ធូរទៅវិញឡើយ កុំថាដល់ទៅលុបវាទៅវិញ។ តាមសម្តីគាត់ទណ្ឌកម្មនេះអាចបង្កើនថែមទៀត លើកនេះ គឺទល់នឹងអ្នកមុខអ្នកការរុស្ស៊ីណា ដែលបានជួយជ្រោមជ្រែងដល់ការបោះឆ្នោតនោះ។
លោកប្រធានាធិបតីរុស្ស៊ីពូទីន ធ្លាប់បានថ្លែងថា ទណ្ឌកម្មប្រៀបបានជា” កាំបិតមុខពីរ “ គឺ ប៉ះទាំងលើអ្នកដាក់ផង ទាំងលើអ្នកដែលរងទទួលផង ចំណែករុស្ស៊ីជាប្រទេសស្វ័យធានា អាចបំពេញដល់រាល់សេចក្តីត្រូវការរបស់ខ្លួន គឺដោយកម្លាំងខ្លួនផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ