រុស្ស៊ី អ៊ុយក្រែន និងសហភាពអឺរ៉ុបចុះកិច្ចព្រមព្រៀងមួយស្តីពីជម្លោះឧស្ម័ន
សហភាពអឺរ៉ុប អ៊ុយក្រែននិងរុស្សី ទើបចុះកិច្ចព្រមព្រៀងមួយកាលពីយប់ថ្ងៃព្រហស្បតិ៍៣០តុុលានៅទីក្រុងព្រុចសែលស្តីពីថាមពលឧស្ម័ន។ ជាឯកសារមួយដែលរ៉ាប់រងលើការបង្ហូរឧស្ម័នរុស្សីឲ្យដល់អ៊ុយក្រែន។ ចំពោះសហភាពអឺរ៉ុបគីជាវិធានការមួយដើម្បីចៀសវៀងកុំឲ្យមានវិបត្តិថាមពលឧស្ម័នកើតឡើងជាថ្មី។ ចាប់តាំងពីខែឧសភាមុនម្ល៉េះ ភាគីទាំង៣បានធ្វើការចរចាគ្នា រិះរកមធ្យោបាយ ដើម្បីបង់លុយថ្លៃឧស្ម័នរុស្ស៊ី ដែលក្រុងគៀវនៅជំពាក់ មិនទាន់សង។ហត្ថលេខីទាំងបី យល់ស្របគ្នាដែរនៅលើតម្លៃឧស្ម័នដែលរុស្ស៊ីនឹងត្រូវបញ្ជូនឲ្យដល់អ៊ុយក្រែន នៅប៉ុន្មានខែខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ហត្ថលេខីទាំងបីដែលមានសហភាពអឺរ៉ុប រុស្ស៊ីនិងអ៊ុយក្រែន បានអបអរសាទរគ្រប់គ្នាក្រោយពីបានដោះស្រាយជម្លោះឧស្ម័នរុស្ស៊ីរួចរាល់ ដោយបានបន្ទរពាកពេចន៍ដូចៗគ្នាថា “ ក្នុងរដូវត្រជាក់ខ្លាំងនៅអឺរ៉ុបនាពេលខាងមុខនេះ ពិតជាពុំមាននណាម្នាក់នឹងត្រូវប្រឈមមុខនឹងភាពរងារនោះទេ”។ ជាមួយកិច្ចព្រមព្រៀងនេះដែរ អ៊ុយក្រែន ត្រូវសន្យារ៉ាប់រងសងលុងថ្លៃឧស្ម័នរុស្ស៊ី ដើម្បីចៀសវៀងកុំឲ្យរុស្សី កាត់ផ្តាច់ ឧស្ម័នទៅសហភាពអឺរ៉ុប។
កិច្ចព្រមព្រៀមរវាងភាគីទាំង៣ខាងលើ និយាយផងដែរ ថាលុយថ្លៃឧស្ម័នរុស្ស៊ី ដែលអ៊ុយក្រែននៅជំពាក់មិនទាន់សងនោះ នឹងសងក្នុងពីរដំណាក់កាល។
ជាបឋម ក្រុងគៀវ ត្រូវសន្យាបង់លុយថ្លៃឧស្ម័នរុស្ស៊ីនៅក្នុងរយៈពេលប៉ុន្មានថ្ងៃខាងមុខដែលមានទឹកប្រាក់ប្រមាណ ១៥០០លានដុល្លារ។ ដំណាក់កាលសងលុយលើកទីពីរ ដែលមានចំនួនទឹកប្រាក់លើសលើកទីមួយតែបន្តិចបន្តួចនោះ នឹង ត្រូវធ្វើឡើងចាប់ពីពេលនេះរហូតដល់ចុងឆ្នាំនេះ។
ដំណាក់កាលសងបំណុលថ្លៃឧស្ម័នរុស្ស៊ី អ៊ុយក្រែន អាចនឹងពឹងពាក់បាន ជំនួយពីសហភាពអឺរ៉ុបនិងជំនួយរបស់មូលនិធិរូបិយវត្ថុអន្តរជាតិ។ ជាជំនួយដ៏ចាំបាច់បំផុតមួយ សំរាប់អូសទាញរុស្ស៊ីឲ្យងាកមករកតុចរចាឡើងវិញ។ ក៏ប៉ុន្តែកិច្ចព្រមព្រៀងរវាងរុស្សី-អ៊ុយក្រែននិងសហភាពអឺរ៉ុបនេះ មានកាលកំណត់-ដោយសុពលភាពវា មានរហូតដល់ខែមីនាឆ្នាំ២០១៥ប៉ុណ្ណោះ។
ជាសរុប ភាគីទាំង៣ បានដោះស្រាយគ្នារួចរាល់។
គឺថារុស្ស៊ីនឹងត្រូវគេសងលុយឧស្ម័ន ចំណែក អ៊ុយក្រែនត្រូវបង់លុយឧស្ម័នរុស្ស៊ី រីឯ សហភាពអឺរ៉ុបវិញ ក៏បានរួចខ្លួនជាថ្មីពីវិបត្តិខ្វះថាមពលឧស្ម័នសម្រាប់រដូវត្រជាក់ខាងមុខដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ