មនុស្ស៨នាក់ស្លាប់ ជាង១៨០០នាក់ចូលពេទ្យ ដោយសារសីតុណ្ហភាពក្តៅខ្លាំងនៅជប៉ុន
នៅជប៉ុន សីតុណ្ហភាពក្តៅខ្លាំងថ្ងៃសៅរ៍នេះ បានសម្លាប់មនុស្ស៨នាក់ទៀតហើយ និងធ្វើអោយមនុស្សជាង១៨០០នាក់ ត្រូវគេបញ្ជូនទៅមន្ទីរពេទ្យ។ កាលពីថ្ងៃសុក្រ ការកើនកំដៅសីតុណ្ហភាព បានធ្វើអោយមនុស្សស្លាប់៣នាក់រួចមកហើយ ហើយក៏មានជាង១២០០នាក់ទៀតដែរ ដែលបានទទួលការថែទាំព្យាបាល។ រៀងរាល់ឆ្នាំ សីតុណ្ហភាពក្តៅខ្លាំងបានធ្វើអោយប្រជាជនជប៉ុនរាប់ពាន់នាក់រងគ្រោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
ដូចថ្ងៃសុក្រដែរ សីតុណ្ហភាពក្នុងស្រុកជប៉ុន ថ្ងៃសៅរ៍នេះ បានឡើងហួសពី៣៥អង្សារ នៅតាមតំបន់ជាច្រើន។ តាមកន្លែងខ្លះ សីតុណ្ហភាពឡើងរហូតដល់៣៩អង្សារ។ ការកើនកំដៅសីតុណ្ហភាពតែងតែកើតឡើងជាធម្មតា ក្នុងរដូវនេះ។ ប៉ុន្មានថ្ងៃចុងក្រោយនេះ សីតុណ្ហភាពចេះតែកើនខ្ពស់ជាលំដាប់។ យោងតាមទីភ្នាក់ងារគ្រប់គ្រងគ្រោះមហន្តរាយជប៉ុន កាលពីសប្តាហ៍មុន ដោយសារសីតុណ្ហភាពក្តៅខ្លាំង មនុស្សជិត៣ពាន់២រយនាក់ បានត្រូវបញ្ជូនទៅមន្ទីរពេទ្យ ក្នុងនោះ ៣នាក់បានស្លាប់។
សប្តាហ៍មុននេះមួយទៀត មនុស្សជិត២ពាន់៥រយនាក់ បានទូរសព្ទសុំជំនួយសង្គ្រោះ។ ជនរងគ្រោះជាងពាក់កណ្តាល ជាមនុស្សចាស់ អាយុជាង៦៥ឆ្នាំ។ នៅជប៉ុន ប្រជាជនចំណាស់៦៥ឆ្នាំឡើងទៅ មានប្រមាណ១ភាគ៣នៃប្រជាជនសរុបជាង១២៧លាននាក់។ រៀងរាល់ឆ្នាំ ប្រជាជនជប៉ុនរាប់ពាន់នាក់ តែងរងគ្រោះដោយសារសីតុណ្ហភាពក្តៅខ្លាំង។
ការបញ្ឈប់ប្រតិករនុយក្លេអ៊ែរចំនួន៤៨ បានជំរុញអោយរដ្ឋាភិបាលជប៉ុនធ្វើការសន្សំសំចៃការប្រើប្រាស់ថាមពលក្នុងស្រុក។ ទោះយ៉ាងនេះក្តី អាជ្ញាធរជំរុញអោយមានការប្រើម៉ាស៊ីនត្រជាក់ក្នុងលក្ខណៈសមស្របផងដែរ។ ប៉ុន្តែ តាមទីកន្លែងសាធារណៈមួយចំនួន ដូចជាហាងទំនិញ រឺក៏ភោជនីយដ្ឋាន គេបើកម៉ាស៊ីនត្រជាក់ច្រើនកម្រិតខ្ពស់ហួសហេតុ រហូតធ្វើអោយអ្នកចូលទិញឥវ៉ាន់ ស្រែកថារងារ។ ដោយឡែក មនុស្សចាស់នៅស្រុកជប៉ុន មួយចំនួនមិនចង់ប្រើម៉ាស៊ីនត្រជាក់ទេ ហើយមួយចំនួនទៀត មិនចេះប្រើទៀតផង ដូច្នេះហើយ សីតុណ្ហភាពក្តៅខ្លាំងធ្វើអោយពួកគាត់ ជួបបញ្ហាខ្វះជាតិទឹកក្នុងខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ