សេចក្តីសន្និដ្ឋានទៅលើភូមិសាស្រ្តនយោបាយជប៉ុន
ចុះផ្សាយនៅថ្ងៃ៖
ស្តាប់ - ០៦:០២
នៅថ្ងៃនេះ ហ្សង់-ហ្វ្រង់ស័រ តាន់ សូមបញ្ចប់ភូមិសាស្រ្តនយោបាយនៃប្រទេសជប៉ុន ដោយសូមធ្វើសេចក្តីសន្និដ្ឋានត្រួសៗទៅលើការសិក្សាជុំវិញមហាប្រទេសអាស៊ីមួយនេះ។
ជប៉ុនបន្តធ្វើឱ្យក្រុមអ្នកសង្កេតការណ៍ចាប់អារម្មណ៍ ចាប់អារម្មណ៍ខ្លាំងឡើងៗ ពីព្រោះ
ប្រទេសអាស៊ីមួយនេះដែលជាកោះមិនបើកទ្វារចំហធំនិងទាំងស្រុងទៅរកពិភពលោកទេ ហើយក៏មិននៅឯកាតែឯកឯងទាំងស្រុងនោះដែរ។
ក្រុមអ្នកសង្កេតការណ៍ចាប់អារម្មណ៍ខ្លាំងទៅលើជប៉ុន ពីព្រោះប្រទេសនេះជាមហាអំណាចសេដ្ឋកិច្ច ប៉ុន្តែជាប្រទេសកន្តឿនយោបាយ ជាសង្គមមួយមាំទាំនិងជឿនលឿនមែនទែន តែបារម្ភខ្លាំងណាស់ចំពោះអនាគតរបស់ខ្លួន។
ជប៉ុនចោទសួរខ្លួនឯងជាយូរឆ្នាំមកហើយថា តើត្រូវប្រកាន់ជំហរបែបណានៅចំពោះមុខ
បណ្តាប្រទេសជិតខាង និងនៅក្នុងតំបន់អាស៊ីដែលបានក្លាយទៅជាប៉ូលមួយក្តៅគគុក នៅលើវិស័យភូមិសាស្រ្តនយោបាយ ជាប៉ូលមួយខ្លាំងក្លៀវក្លាគួរឱ្យទាក់ទាញ នៅលើវិស័យសេដ្ឋកិច្ច។
នៅក្នុងក្របខ័ណ្ឌនៃទំនាក់ទំនងអន្តរជាតិវិញ ជប៉ុនគ្មានជម្រើសអ្វីផ្សេងក្រៅពីយកចិត្តទុកដាក់ខ្លាំងទៅលើចំណងត្រីកោនដ៏ស្មុគស្មាញ អាមេរិក-ជប៉ុន-ចិន។ អាមេរិក ពីព្រោះ ជាសម្ព័ន្ធមិត្តចាក់ទឹកមិនលេច ជាឆត្រនុយក្លេអ៊ែរ និងជាគ្រឹះសន្តិសុខ។ ចិន ពីព្រោះជាសត្រូវធំ ជាគូប្រជែង និងជាប្រទេសជិតខាងប្រកបដោយអនុភាពខ្លាំងឡើងជាលំដាប់។
អត្តសញ្ញាណពិតប្រាកដនិងមហិច្ឆតាជាក់ស្តែង ក៏ជាកង្វល់ពីរធំៗរបស់ប្រជាជាតិជប៉ុនដែរ ត្បិតប្រវត្តិសាស្រ្តបានបង្ហាញថាជប៉ុនជាលទ្ធផលនៃសំយោគល្អឥតខ្ចោះរវាងវប្បធម៌ដើមនៃប្រទេសនិងចំហាយអរិយធម៌បរទេស និងពីព្រោះជាច្រើនដងច្រើនសា ប្រទេសអាស៊ី មួយនេះបានធ្លាក់ពីចុងកំពូលមកដល់បាតដី និងពីបាតដីឡើងទៅដល់ចុងកំពូលវិញ។
ម្ល៉ោះហើយ ដើម្បីយល់ដឹងកាន់តែច្បាស់ពីភូមិសាស្រ្តនយោបាយរបស់ជប៉ុន បន្ថែមពីលើភូមិសាស្រ្ត សេដ្ឋកិច្ចនិងនយោបាយ ចាំបាច់គេត្រូវតែស្វែងយល់ពីប្រវត្តិសាស្រ្តនិងវប្បធម៌នៃប្រទេសអាស៊ីមួយនេះ។
អស់រយៈពេលជាច្រើនសប្តាហ៍កន្លងទៅនេះ យើងបានសិក្សាយល់ដឹងពីកង្វល់របស់ថ្នាក់ដឹកនាំនិងរបស់ប្រជាពលរដ្ឋជប៉ុន ព្រមទាំងសមត្ថភាពខ្ពស់គួរឱ្យសរសើរនៃប្រជាជាតិ អាស៊ីមួយនេះក្នុងការប្រឈមមុខទប់ទល់នឹងឧបសគ្គភូមិសាស្រ្តនយោបាយធំៗ។
យ៉ាងណាក៏ដោយ អនាគតនៃប្រទេសជប៉ុនចាប់ពីពេលនេះតទៅអាស្រ័យទៅលើបញ្ហា ភូមិសាស្រ្តនយោបាយមួយចំនួនដែលយើងអាចចងក្រងជាសំណួរចំនួន១០។
សំណួរទី១៖ តើជប៉ុននឹងអាចបន្តមានវត្តមាននៅលើផែនទីពិភពលោកយូរលង់ទៅមុខទៀតដែរឬទេ ពីព្រោះប្រទេសអាស៊ីមួយនេះអាចនឹងរលត់រលាយគ្រប់ពេលវេលា
ដោយហេតុតែគ្រោះរញ្ជួយដី រលកយក្សស៊ូណាមីនិងមហន្តរាយនុយក្លេអ៊ែរ ដូចអ្វីដែលបានកើតឡើងនៅFukushima កាលពីឆ្នាំ២០១១កន្លងទៅនេះ?
សំណួរទី២៖ តើជប៉ុននឹងនៅតែពឹងពាក់អ៊ីចឹងតទៅទៀតដែរឬទេទៅលើថាមពលនិងចំណី អាហារនាំចូលសឹងទាំងស្រុងមកពីបរទេស?
សំណួរទី៣៖ តើជប៉ុននឹងអាចរំសាយបានដែរឬទេ ការប្រមូលផ្តុំប្រជាជនបែបណែនណាន់ តាន់តាប់ជ្រុលពេកដូចសព្វថ្ងៃ ដើម្បីបង្កាកុំឱ្យមានអ្នកស្លាប់ច្រើនពេក ប្រសិនបើគ្រោះ រញ្ជួយដីធំនិងសាហាវជាងគេមួយកើតឡើង?
សំណួរទី៤៖ តើជប៉ុនអាចរក្សាបានយូរលង់តទៅមុខទៀតដែរឬទេ ធនធានភូមិសាស្រ្តនយោបាយផ្ទៃក្នុងសំខាន់ៗរបស់ខ្លួន រួមមានជាអាទិ៍ ឯកភាពជាតិ សីលធម៌សមូហភាព និងរចនាសម្ព័ន្ធសង្គមដ៏មាំមួន?
សំណួរទី៥៖ តើនៅទីបំផុត រដ្ឋាភិបាលជប៉ុននឹងអាចរំដោះខ្លួនចេញពីអតីតកាល ដើម្បីសារភាពទទួលកំហុសប្រព្រឹត្តកាលសម័យមុននិងពេលសង្គ្រាមលោកលើកទី២ដែរឬទេ?
សំណួរទី៦៖ តើជប៉ុននឹងមានសមត្ថភាពដោះស្រាយបញ្ហាប្រជាជនដែរឬទេ ប្រជាជនចាស់ជរាទៅជាលំដាប់ដែលជាគ្រោះថ្នាក់សម្រាប់លទ្ធិប្រជាធិបតេយ្យ សន្ទុះសេដ្ឋកិច្ច និង
សន្តិសុខជាតិទាំងមូល។
សំណួរទី៧៖ តើសេដ្ឋកិច្ចជប៉ុននឹងអាចប្រជែងតទៅមុខទៀតបានយូរលង់ដែរឬទេជាមួយ សេដ្ឋកិច្ចនៃបណ្តាប្រទេសអាស៊ីជិតខាង ដូចយ៉ាងចិននិងកូរ៉េខាងត្បូង។
សំណួរទី៨៖ តើជប៉ុននឹងអាចចៀសវាងបានដែរឬទេ សង្គ្រាមជាមួយចិន ដោយហេតុតែ ជម្លោះទឹកដីនិងព្រំដែន ឬសង្គ្រាមរវាងចិននិងអាមេរិកដែលនឹងតម្រូវឱ្យជប៉ុនចូលជួយអាមេរិកដោយខានមិនបាន?
សំណួរទី៩៖ តើនៅទីបំផុតជប៉ុននឹងអាចចេញរួចពីសម្ព័ន្ធភាពចាក់ទឹកមិនលេចជាមួយ អាមេរិកដែរឬទេ ដើម្បីមានលទ្ធភាពកសាងទំនាក់ទំនងថ្មីជាមួយចិនបាន?
សំណួរទី១០៖ តើជប៉ុននឹងអាចដោះស្រាយបញ្ហាបំណុលដ៏ច្រើនសន្ធឹកសន្ធាប់របស់ខ្លួន បានដែរឬទេ នៅទីបំផុត?
ក្នុងខណៈនេះ គ្មានអ្នកណាអាចឆ្លើយនឹងសំណួរខាងលើឱ្យបានជាក់ច្បាស់ឡើយ។ បើសិនជាអាចដោះចំណោទទាំង១០ខាងលើបានមែននោះ ជប៉ុននឹងក្លាយជាមហាអំណាចមួយពិតប្រាកដដែលមានសេរីភាព ឥទ្ធិពល និងអធិបតេយ្យភាពធំទូលំទូលាយជាងសព្វថ្ងៃ នាអនាគតខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ