ជប៉ុនមានកំណើនសេដ្ឋកិច្ច ប៉ុន្តែនៅតែគំរាមកំហែងដោយវិបត្តិអឺរ៉ុប
នៅក្នុងពេលសេដ្ឋកិច្ចពិភពលោកកំពុងដើរអូសជើង កំណើនសេដ្ឋកិច្ចរបស់ជប៉ុនបានកើនឡើងមួយភាគរយ នៅត្រីមាសទីមួយ។ កំណើនសេដ្ឋកិច្ចដែលជាផ្លែផ្កានៃការចំណាយទៅលើការសាងសង់ឡើងវិញ តំបន់ដែលរងបំផ្លាញដោយគ្រោះរញ្ជួយដី និងរលកយក្សស៊ូណាមី កាលពីខែមីនា ឆ្នាំ ២០១១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
គ្រោះថ្នាក់រលកយក្សស៊ូណាមីនៅFukushima បានធ្វើឲ្យសេដ្ឋកិច្ចជប៉ុនដើរថយក្រោយ មិនដល់មួយឆ្នាំប៉ុណ្ណោះ។ ចាប់តាំងពីត្រីមាសទីបួន ក្នុងឆ្នាំ ២០១១ កន្លងទៅ ផលិតផលក្នុងស្រុកសរុបGDP របស់ជប៉ុនបានចាប់កើនឡើងជាលំដាប់មកវិញ បើទោះជាវាកើនឡើងយ៉ាងយឺតៗក៏ដោយ។ នៅចន្លោះខែមករា និងមីនាដើមឆ្នាំនេះ ផលិតផលក្នុងស្រុកសរុបជប៉ុនបានកើនឡើងដល់៤,១ភាគរយ។ នៅក្នុងសេចក្តី ថ្លែងការណ៍ចេញផ្សាយ នៅថ្ងៃព្រហស្បតិ៍នេះ ទេសរដ្ឋមន្រ្តីជប៉ុនទទួលបន្ទុកកិច្ចការនយោបាយសេដ្ឋកិច្ច បានសាទរដំណឹងល្អនេះ និងថា សេដ្ឋកិច្ចជប៉ុននឹងបោះជំហានទៅមុខទៀត។
អ្នកជំនាញវាយតម្លៃថា ផលិតផលក្នុងស្រុកសរុបរបស់ជប៉ុន កើនឡើង ដោយមកពីប្រជាជនជប៉ុនបានចាប់ផ្តើមចាយច្រើន លើទំនិញប្រើប្រាស់។ ម្យ៉ាងទៀត រដ្ឋាភិបាលជប៉ុនបានជំរុញឲ្យការប្រើប្រាស់ក្នុងស្រុកកើនឡើង តាមរយៈផ្តល់ជំនួយដល់ប្រជាជនដែលទិញរថយន្តថ្មី ដែលមិនសូវស៊ីសាំង ឬរថយន្តដែលដើរដោយអគ្គិសនីជាដើម។
លើសពីនោះទៀត ការវិនិយោគសាធារណៈ ដែលជាប្រភពបង្កើតការងារ និងប្រាក់ចំណួល របស់ប្រជាជនបានកើនឡើងជាង៥ភាគរយ។ ការវិនិយោគសាធារណៈមានទៅបាន ដោយសាររដ្ឋសភាជប៉ុនបានអនុម័តកញ្ចប់ថវិកាប្រមាណ ២០០ពាន់លានដុល្លារ សម្រាប់ជួសជុលសាងសង់ឡើងវិញ តំបន់ភាគឦសានជប៉ុនដែលរងគ្រោះដោយរលកយក្សស៊ូណាមី។
ប៉ុន្តែ យ៉ាងណាក៏ដោយ បើតាមទេសរដ្ឋមន្រ្តីជប៉ុនខាងលើ គេមិនត្រូវអរនឹងដំណឹងល្អ រហូតភ្លេចខ្លួនទេ។ កំណើនសេដ្ឋកិច្ចជប៉ុនបានកើនឡើងមែន ប៉ុន្តែ វាអាចត្រូវគំរាមកំហែងបានគ្រប់ពេលវេលា ដោយវិបត្តិសេដ្ឋកិច្ចសកល ជាពិសេសវិបត្តិប្រាក់បំណុលនៅអឺរ៉ុប។ ជាក់ស្តែង ការនាំចេញរបស់ជប៉ុននៅដើមឆ្នាំនេះមានការកើនឡើងបន្តិចមែន ប៉ុន្តែ បើសេដ្ឋកិច្ចអឺរ៉ុបនៅតែញាំញីដោយវិបត្តិប្រទេសសមាជិក ជាពិសេសក្រិក នោះ សេដ្ឋកិច្ចជប៉ុននឹងត្រូវរងប៉ះពាល់ជាមិនខាន ព្រោះថា អឺរ៉ុបក៏ជាទីផ្សារដ៏ធំមួយរបស់ផលិតផលអេឡិចត្រូនិកជប៉ុន។ លើសពីនោះទៀត នៅមានកត្តាមួយចំនួនទៀតដែលនឹងគំរាមកំហែង ឬទាញកំណើនសេដ្ឋកិច្ចជប៉ុនឲ្យដើរថយក្រោយមកវិញ។ ទីមួយគឺការកើនឡើងតម្លៃប្រាក់យេន ដែលជាឧបសគ្គធ្វើឲ្យក្រុមហ៊ុនជប៉ុនមិនអាចនាំចេញទៅប្រកួតប្រជែងនៅទីផ្សារបរទេស។
ទីពីរទៀត ជប៉ុននៅពឹងផ្អែកច្រើនលើការនាំចូលថាមពល ដែលធ្វើឲ្យរដ្ឋបង់ខាតលុយយ៉ាងសន្ធឹកសន្ធាប់។ គួរដឹងថា ចាប់តាំងពីជប៉ុនរងគ្រោះដោយគ្រោះរញ្ជួយដី និងគ្រោះថ្នាក់នុយក្លេអ៊ែរ ជប៉ុនបានបិទរោងចក្រនុយក្លេអ៊ែរមួយចំនួនរបស់ខ្លួន និងបែរទៅរកទិញប្រេង និងឧស្ម័នពីប្រទេសខាងក្រៅ ដើម្បីយកមកផ្គត់ផ្គង់ឧស្សាហកម្មក្នុងស្រុក។ គេបារម្ភថា ការនាំចូលថាមពលពីខាងក្រៅ នឹងកើនឡើង សម្រាប់បំពេញតម្រូវការក្នុងស្រុកដែលគេរំពឹងថា នឹងកើនឡើងខ្លាំង ជាពិសេសនៅរដូវក្តៅខាងមុខ នៅពេលប្រជាជនជប៉ុនសម្រុកប្រើម៉ាស៊ីនត្រជាក់។ ថាមពលអគ្គិសនី មិនគ្រប់គ្រាន់នឹងអាចក្លាយជាឧសបគ្គ រារាំងជាថ្មី ដល់ការរីកចម្រើនសេដ្ឋកិច្ចជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ