ការចំណាយប្រជាជនធ្លាក់ចុះធ្វើឲ្យសេដ្ឋកិច្ចជប៉ុនងើបមិនរួចពីរណ្ដៅបរិត្តផរណា
តួលេខរបស់រដ្ឋាភិបាលជប៉ុន ដែលបានចេញផ្សាយ នៅថ្ងៃសុក្រនេះ បង្ហាញថា ការចំណាយទូទៅរបស់ប្រជាជនជប៉ុនមានការធ្លាក់ចុះ ២,៣% នៅខែមករា ឆ្នាំ២០១២ បើធៀបនឹងខែមករា ឆ្នាំទៅមិញ។ នៅក្នុងពេលដែលការនាំចេញរបស់ជប៉ុនកំពុងជួបនឹងបញ្ហា ដោយសារតែវិបត្តិសេដ្ឋកិច្ចពិភពលោក ការថយចុះនៃការចំណាយក្នុងស្រុក គឺជាបន្ទុកមួយបន្ថែមទៀត ដែលជាឧបសគ្គដល់កំណើនសេដ្ឋកិច្ចជប៉ុន។
ចុះផ្សាយនៅថ្ងៃ៖
ស្តាប់ - ០១:៥០
អស់រយៈពេលជិត ៣ឆ្នាំហើយ ដែលជប៉ុនត្រូវប្រឈមមុខនឹងការធ្លាក់ចុះជាទូទៅនៃតម្លៃទំនិញ និងការធ្លាក់ចុះនៃការចំណាយរបស់ប្រជាជនទូទៅ ដែលបង្កជាវិបត្ត “បរិត្តផរណា”។
គួរបញ្ជាក់ថា បរិត្តផរណា គឺផ្ទុយពីអតិផរណា។ នៅពេលដែលតម្លៃទំនិញជាទូទៅមានការកើនឡើង គេហៅថា “អតិផរណា”។ ផ្ទុយទៅវិញ នៅពេលដែលតម្លៃទំនិញទូទៅធ្លាក់ចុះ គេហៅថា “បរិត្តផរណា”។
តួលេខរបស់រដ្ឋាភិបាលជប៉ុនបង្ហាញថា កាលពីខែមករា កន្លងទៅនេះ ថ្វីដ្បិតតែតម្លៃអគ្គិសនី ហ្កាស និងម្ហូបអាហារមានការកើនឡើង ក៏ប៉ុន្តែ តម្លៃផលិតផលអេឡិចត្រូនិក (ដូចជា ទូរទស្សន៍ ទូរទឹកកក កុំព្យូទ័រ ជាដើម) មានការធ្លាក់ចុះយ៉ាងខ្លាំង។ ជាលទ្ធផល បើគិតជាមធ្យម តម្លៃទំនិញទូទៅ នៅក្នុងខែមករានេះ មានការធ្លាក់ចុះ ០,១% បើប្រៀបធៀបនឹងខែមករា ឆ្នាំ២០១១កន្លងទៅ។
នៅពេលដែលតម្លៃទំនិញទូទៅបន្តធ្លាក់ចុះជាបន្តបន្ទាប់ឥតឈប់ វាធ្វើឲ្យអ្នកដែលមានគម្រោងទិញផលិតផលណាមួយ ដែលមិនមែនជារបស់ចាំបាច់បន្ទាន់ នាំគ្នាផ្អាកគម្រោងទិញនេះសិន ដោយចេះតែរំពឹងថា ទៅថ្ងៃមុខ តម្លៃទំនិញនឹងធ្លាក់ចុះកាន់តែទាបជាងថ្ងៃនេះ។ ជាលទ្ធផល ការចំណាយរបស់ប្រជាជនជាទូទៅមានការធ្លាក់ចុះ។
នៅពេលដែលការចំណាយក្នុងស្រុកធ្លាក់ចុះ ហើយការនាំទំនិញចេញទៅលក់នៅបរទេសក៏កំពុងធ្លាក់ចុះ ដោយសារតែបញ្ហាសេដ្ឋកិច្ចនៅទូទាំងពិភពលោក ទាំងអស់នេះជាឧបសគ្គដ៏ធំ ដែលរារាំងសេដ្ឋកិច្ចរបស់ជប៉ុនមិនឲ្យមានកំណើន។
ដើម្បីទប់ទល់នឹងវិបត្តិនេះ ធនាគារកណ្តាលជប៉ុនបានសន្យាថានឹងរក្សាអត្រាការប្រាក់របស់ខ្លួនឲ្យនៅទាបបំផុត គឺនៅចន្លោះ ០% ទៅ ០,១% ក្នុងមួយឆ្នាំ ដើម្បីជំរុញឲ្យមានចរាចរណ៍សាច់ប្រាក់ នៅក្នុងទីផ្សារ។ ធនាគារកណ្តាលសន្យាថានឹងបន្តនយោបាយបែបនេះ រហូតដល់ពេលដែលតម្លៃទំនិញទូទៅ កើនឡើងយ៉ាងតិច ១% ក្នុងមួយឆ្នាំ ទើប ពិចារណាអំពីការដំឡើងអត្រាការប្រាក់មកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ