តុលាការបារាំងបើកសវនាការកាត់ទោសអតីតប្រធានាធិបតី Jacques Chirac
នៅថ្ងៃចន្ទ ៧ មីនា ២០១១នេះ តុលាការក្រុងប៉ារីសចាប់បើកសវនាការជំនុំជម្រះលោកហ្សាក់ ស្ហ៊ីរ៉ាក់ (Jacques Chirac) ដែលជាប់ចោទពីបទកេងបន្លំលុយរដ្ឋ បទរំលោភលើសេចក្តីទុកចិត្ត និងបទកេងយកផលប្រយោជន៍ដោយខុសច្បាប់។ បើតុលាការរកឃើញថាមានទោស លោកស៊្ហីរ៉ាក់ ប្រឈមុខនឹងការផ្តន្ទាទោសឲ្យជាប់ពន្ធនាគារ ១០ឆ្នាំ និងពិន័យជាប្រាក់ ១៥ម៉ឺនអឺរ៉ូ។
ចុះផ្សាយនៅថ្ងៃ៖
ការពន្យល់របស់សេង ឌីណា
អង្គហេតុនៃបទល្មើសបានកើតឡើងតាំងពីពេលលោកស្ហ៊ីរ៉ាក់ នៅជាអភិបាលក្រុងប៉ារីសម៉្លេះ (១៩៧៧-១៩៩៥)។ តុលាការក្រុងប៉ារីសសង្ស័យថា នៅក្នុងពេលដែលលោកស្ហ៊ីរ៉ាក់ធ្វើជាអភិបាលក្រុងប៉ារីស គាត់បានជ្រើសរើសបុគ្គលិកជាច្រើននាក់ ដែលមានតែឈ្មោះជាបុគ្គលិក ស៊ីប្រាក់ខែសាលាក្រុង ក៏ប៉ុន្តែ មិនបានបម្រើការឲ្យសាលាក្រុងពិតប្រាកដនោះទេ។ មានបុគ្គលិកខ្លះ បើកតែប្រាក់ខែ ដោយមិនមកធ្វើការ។ បុគ្គលិកខ្លះទៀតបើកប្រាក់ខែពីសាលាក្រុងប៉ារីស ប៉ុន្តែ ទៅបម្រើការឲ្យគណបក្ស RPR របស់លោកស៊្ហីរ៉ាក់ទៅវិញ។
តុលាការបានចាប់ផ្តើមបើកការស៊ើបអង្កេតលើសំណុំរឿងនេះ កាលពីឆ្នាំ១៩៩៨។ មន្រ្តីជំនិតរបស់លោកស្ហ៊ីរ៉ាក់ម្នាក់ គឺលោកអាឡាំង ហ្ស៊ុបប៉េ (Alain Jupée) ដែលពេលនោះជាអភិបាលរងក្រុងប៉ារីស ត្រូវបានតុលាការកាត់ទោសឲ្យជាប់ពន្ធនាគារ ១៤ខែ កាលពីឆ្នាំ២០០៤។ ក៏ប៉ុន្តែ នៅពេលនោះ លោកស្ហ៊ីរ៉ាក់ នៅកាន់តំណែងជាប្រធានាធិបតី (១៩៩៥-២០០៧) ទើបតុលាការមិនអាចកោះហៅគាត់មកកាត់ទោសបាន។ ក្រោយពេលដែលលោកស្ហ៊ីរ៉ាក់ផុតអាណត្តិប្រធានាធិបតី នៅឆ្នាំ២០០៧ តុលាការក្រុងប៉ារីសក៏បានចាប់ផ្តើមដំណើរក្តីនេះឡើងវិញ រហូតឈានទៅធ្វើការចោទប្រកាន់ជាផ្លូវការលើរូបលោកអតីតអភិបាល ក្រុងប៉ារីស និងអតីតប្រធានាធិបតីបារាំង នៅឆ្នាំ២០០៨។
សវនាការកាត់ទោសលោកហ្សាក់ ស៊្ហីរ៉ាក់ ត្រូវបើកធ្វើចាប់ពីថ្ងៃទី៧ មីនា ដល់ថ្ងៃទី៤ មេសា ២០១១។ ក៏ប៉ុន្តែ មេធាវីខាងចុងចោទបានដាក់ពាក្យបណ្តឹងទៅក្រុមប្រឹក្សាធម្មនុញ្ញ ដើម្បីស្នើសុំឲ្យពិនិត្យធម្មនុញ្ញភាពនៃយុត្តិសាស្រ្ត (Jurisprudence) ស្តីពីអាជ្ញាយុកាលនៃបទល្មើស។ ប្រសិនបើបណ្តឹងនេះមានមូលដ្ឋានច្បាប់ត្រឹមត្រូវ ដែលអាចទទួលយកបាន តុលាការក្រុងប៉ារីសគ្មានជម្រើសអ្វីទេ ក្រៅតែពីបញ្ជូនបណ្តឹងនេះទៅតុលាការកំពូល ដែលជាអ្នកសម្រេចថា តើត្រូវបញ្ជូនបន្តទៅក្រុមប្រឹក្សាធម្មនុញ្ញដែរឬទេ?
តុលាការកំពូលត្រូវកាត់សេចក្តីក្នុងរយៈពេល ៣ខែយ៉ាងយូរ។ ប្រសិនបើតុលាការសម្រេចបញ្ជូនបណ្តឹងនេះទៅក្រុមប្រឹក្សាធម្មនុញ្ញ ក្រុមប្រឹក្សាក៏មានពេល ៣ខែដែរ ដើម្បីកាត់សេចក្តី។
ប្រសិនបើក្រុមប្រឹក្សាធម្មនុញ្ញសម្រេចថា យុត្តិសាស្រ្តស្តីពីអាជ្ញាយុកាលនៃបទល្មើសពិតជាផ្ទុយនឹង រដ្ឋធម្មនុញ្ញមែន ដំណើរក្តីរបស់លោកហ្សាក់ ស្ហ៊ីរ៉ាក់ នឹងត្រូវបញ្ចប់។ ផ្ទុយទៅវិញ ប្រសិនបើក្រុមប្រឹក្សាធម្មនុញ្ញសម្រេចថា យុត្តិសាស្រ្តនេះមិនផ្ទុយនឹងរដ្ឋធម្មនុញ្ញទេ តុលាការក្រុងប៉ារីសនឹងអាចចាប់ផ្តើមសវនាការកាត់ទោសលោកស្ហ៊ីរ៉ាក់ ឡើងវិញបាន។
គួរបញ្ជាក់ថា ចាប់តាំងពីក្រោយសង្រ្គាមលោកលើកទី២មក លោកហ្សាក់ ស្ហ៊ីរ៉ាក់ គឺជាអតីតប្រធានាធិបតីបារាំងទីមួយ ដែលត្រូវតុលាការនាំខ្លួនយកមកកាត់ទោស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ