អ៊ីរ៉ង់ស្វះស្វែងរកការគាំទ្រពីចលនាមិនចូលបក្សសម្ព័ន្ធក្នុងសំណុំរឿងនុយក្លេអ៊ែរ
រដ្ឋមន្រ្តីក្រសួងការបរទេសអ៊ីរ៉ង់បានថ្លែង នៅថ្ងៃអាទិត្យនេះថា នៅក្នុងពេលបើកធ្វើជំនួបកំពូលនៅសប្តាហ៍ក្រោយនេះ មេដឹកនាំប្រទេសក្នុងចលនាមិនចូលបក្សសម្ព័ន្ធគួរបង្ហាញជំហររួមគ្នា ប្រឆាំងនឹងទណ្ឌកម្មរបស់លោកខាងលិចមកលើអ៊ីរ៉ង់ ជុំវិញសំណុំរឿងនុយក្លេអ៊ែរ។ ជំនួបកំពូលរបស់ចលនាមិនចូលបក្សសម្ព័ន្ធ ដែលមានកម្ពុជាជាសមាជិកមួយដែរនោះ នឹងត្រូវបើកធ្វើ នៅថ្ងៃទី៣០ និង៣១សីហា នៅក្នុងប្រទេសអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០១:៥៣
ថ្លែងក្នុងពេលបើកកិច្ចប្រជុំ ដើម្បីត្រៀមរៀបចំជំនួបកំពូលចលនាមិនចូលបក្សសម្ព័ន្ធ លោកអាលី អាក្បា សាឡេហ៊ី (Ali Gakbar Salehi) រដ្ឋមន្រ្តីក្រសួងការបរទេសអ៊ីរ៉ង់ បានលើកឡើងថា ចលនាមិនចូលបក្សសម្ព័ន្ធគួរតែហ៊ានងើបឡើងប្រឈមមុខនឹងការដាក់ទណ្ឌកម្មជាឯកតោភាគីរបស់លោកខាងលិច មកលើប្រទេសណាមួយ ដែលជាសមាជិករបស់ខ្លួន។
បច្ចុប្បន្ននេះ អ៊ីរ៉ង់កំពុងទទួលរងនូវទណ្ឌកម្មពីសំណាក់ប្រទេសលោកខាងលិច ជាពិសេស ទណ្ឌកម្មលើវិស័យប្រេងកាត ដោយសារតែគេសង្ស័យថា អ៊ីរ៉ង់កំពុងអភិវឌ្ឍកម្មវិធីនុយក្លេអ៊ែរយោធា។ អ៊ីរ៉ង់វិញ តែងតែអះអាងថា កម្មវិធីនុយក្លេអ៊ែររបស់ខ្លួន គឺធ្វើឡើង ក្នុងគោលដៅស៊ីវិលតែប៉ុណ្ណោះ មិនមែន ដើម្បីផលិតអាវុធនុយក្លេអ៊ែរនោះទេ។
ឆ្លៀតក្នុងពេលធ្វើជាប្រធានចលនាមិនចូលបក្សសម្ព័ន្ធ អ៊ីរ៉ង់កំពុងតែបញ្ចុះបញ្ចូលឲ្យថ្នាក់ដឹកនាំប្រទេសក្នុងចលនានេះ បង្ហាញជំហរជាសាធារណៈ គាំទ្រអ៊ីរ៉ង់ ទល់នឹងទណ្ឌកម្មរបស់លោកខាងលិច។ នៅថ្ងៃនេះ លោកប្រមុខការទូតអ៊ីរ៉ង់បានទាំងអះអាងទៀតថា ប្រទេសក្នុងចលនាមិនចូលបក្សសម្ព័ន្ធបានគាំទ្រសិទ្ធិស្របច្បាប់របស់អ៊ីរ៉ង់ ក្នុងការអភិវឌ្ឍកម្មវិធីនុយក្លេអ៊ែរ។
នៅពេលបច្ចុប្បន្ននេះ ក្នុងចំណោមប្រទេសជាសមាជិករបស់ចលនាមិនចូលបក្សសម្ព័ន្ធ ក្រៅពីអ៊ីរ៉ង់ មានប្រទេស ៣ផ្សេងទៀត ដែលកំពុងរងទណ្ឌកម្មពីសំណាក់ប្រទេសលោកខាងលិច ក្នុងនោះ រួមមាន កូរ៉េខាងជើង រងទណ្ឌកម្មដោយមកពីកម្មវិធីនុយក្លេអ៊ែរយោធា ស៊ីរី មកពីរដ្ឋាភិបាលបានប្រើកម្លាំងបង្រ្កាបចលនាប្រឆាំង និងហ្ស៊ីមបាវ៉េ មកពីមានអំពើហិង្សាផ្នែកនយោបាយ និងការរំលោភសិទ្ធិមនុស្ស។
គួររំឭកឡើងវិញថា ចលនាមិនចូលបក្សសម្ព័ន្ធត្រូវបានបង្កើតឡើង កាលពីឆ្នាំ១៩៦១ នៅក្នុងអំឡុងសង្រ្គាមត្រជាក់ ដោយប្រទេស ដែលអះអាងថា មិនស្ថិតនៅក្នុងប្លុកអាមេរិក ហើយក៏មិនស្ថិតក្នុងប្លុកសហភាពសូវៀត។ បច្ចុប្បន្ន ចលនាមិនចូលបក្សសម្ព័ន្ធនេះមានសមាជិកសរុបចំនួន ១២០ ក្នុងនោះ ក៏មានប្រទេសកម្ពុជាមួយដែរ។ រដ្ឋាភិបាលកម្ពុជាធ្លាប់បានប្រកាសឲ្យដឹងថា លោកនាយករដ្ឋមន្រ្តីហ៊ុន សែន នឹងទៅចូលរួមជំនួបកំពូលចលនាមិនចូលបក្សសម្ព័ន្ធ នៅប្រទេសអ៊ីរ៉ង់ នៅថ្ងៃព្រហស្បតិ៍ និងថ្ងៃសុក្រ ក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ