នាយករដ្ឋមន្ត្រីអ៊ីរ៉ាក់បំពេញទស្សនកិច្ចនៅម៉ូស្គូជាលើកទី១ បើគិតក្នុង៣ឆ្នាំចុងក្រោយ
ក្នុងក្របខ័ណ្ឌទស្សនកិច្ច ដែលចាប់ផ្តើមពីល្ងាចម្សិលមិញ លោកនាយករដ្ឋមន្ត្រី អ៊ីរ៉ាក់ Nouri Al-Maliki ថ្ងៃ៩តុលានេះ ធ្វើកិច្ចចរចាជាមួយលោកប្រមុខរដ្ឋាភិបាលរុស្ស៊ី ឌ្មីទ្រី មេដវេដេវ អំពីបញ្ហាសហប្រតិបត្តិការពាណិជ្ជកម្ម-សេដ្ឋកិច្ច រវាងប្រទេសទាំងពីរ ក្នុងនោះមានវិស័យយោធានិងថាមពល។ ហើយស្អែក គាត់នឹងទទួលជួប ដោយលោកប្រធានាធិបតីពូទីន ដែលជាអ្នកអញ្ជើញគាត់មកបំពេញទស្សនកិច្ចនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ទាក់ទងនឹងសាច់រឿងដែលមានកាសែតខ្លះនៃក្រុងម៉ូស្គូលេខថ្ងៃនេះ យោងទៅលើប្រភពមិនបញ្ចេញឈ្មោះក្នុងរដ្ឋាភិបាលអ៊ីរ៉ាក់ផ្ទាល់ ចុះផ្សាយថា ជាលទ្ធផល នៃកិច្ចចរចាអាចនឹងមានចុះកុងត្រា ទិញអាវុធពីរុស្ស៊ី ក្នុងទឹកប្រាក់ ៥.០០០លានដុល្លារអាមេរិក។
ចំណែក ក្រុមហ៊ុនរដ្ឋរុស្ស៊ីខាងលក់អាវុធទៅក្រៅ ហៅថា RosOboronExport លំអិតថា កុងត្រា ដែលគ្រោងចុះនោះ មានទឹកប្រាក់ម្តុំ ៤.៣០០លានដុល្លារ។ ក្នុងទឹកប្រាក់នេះ អ៊ីរ៉ាក់គ្រោងទិញ ពីរុស្ស៊ី គឺយន្តហោះប្រដេញធុន Mig-29M ដោយមិនបញ្ជាក់ពីចំនួនទេ, រថពាសដែក ដោយមិនបញ្ជាក់ពីចំនួនដែរ, ប្រព័ន្ធការពារដែនអាកាសចំនួន ៤២ ប្រព័ន្ធ និង ឧទ្ធម្ភាគចក្រចម្បាំងធុន Mi-28 NE ចំនួន ៣០គ្រឿង។
គួរនិយាយថា លោកនាយករដ្ឋមន្ត្រីអ៊ីរ៉ាក់ Nouri Al-Maliki ដែលបំពេញទស្សនកិច្ចជាលើកទី១ នៅរុស្ស៊ី បើគិតក្នុង៣ឆ្នាំចុងក្រោយ គឺអមដំណើរដោយរដ្ឋមន្ត្រីការពារជាតិ, រដ្ឋមន្ត្រីហិរញ្ញវត្ថុ, រដ្ឋមន្ត្រីក្រសួងប្រេងកាត ថាមពលវារីអគ្គិសនី និង ឧស្សាហកម្ម។
នេះជាទស្សនកិច្ចការងារ ប្រព្រឹត្តទៅតាមសេចក្តីអញ្ជើញនៃលោកប្រធានាធិបតីរុស្ស៊ី ពូទីន។ វិមានក្រេមឡាំងបានប្រកាសថា នៅថ្ងៃស្អែកទី១០តុលា ប្រមុខរដ្ឋរុស្ស៊ីនឹងទទួលជួបលោកនាយករដ្ឋមន្ត្រី អ៊ីរ៉ាក់ Nouri Al-Maliki ដោយនឹងលើកយកទៅពិភាក្សា គឺអំពីគម្រោងរួម របស់ប្រទេសទាំងពីរ ជាបឋមក្នុងវិស័យថាមពល ព្រមទាំង ស្ថានការណ៍នៅតំបន់ដើមបូព៌ា ជាពិសេស នៅប្រទេសស៊ីរី។
ជាការកត់សម្គាល់ ប្រទេសអ៊ីរ៉ាក់ជំនាន់មុន សម័យលោកប្រធានាធិបតីសាដាម ហ៊ូសេន តែងបានទិញអាវុធយ៉ាងច្រើនសន្ធឹកសន្ធាប់ ពីសហភាពសូវៀត ទាល់តែជំពាក់បំណុលសូវៀត ក្នុងទំហំរាប់ពាន់លានដុល្លារ បំណុលដែលក្រោយមក ត្រូវប្រទេសរុស្ស៊ីសម័យថ្មី សម្រេចចិត្ត លុបចោលទៅ។ តាមធម្មតា លុបនេះ គឺក្នុងល័ក្ខខ័ណ្ឌ ឲ្យប្រទេសដែលរួចផុតពីបំណុលចាស់ សុខចិត្តទិញអាវុធរុស្ស៊ីជាថ្មី ប៉ុន្តែ ដោយបង់លុយដល់ដៃទៅវិញ។
តាមពួកអ្នកវិភាគ បើកុងត្រាក្នុងទឹកប្រាក់ ពី៤ ទៅ ៥.០០០លានដុល្លារនឹងមានចុះមែន នោះវានឹងជួយប៉ះប៉ូវវិញ ការបាត់បង់មួយភាគធំ ដែលរងទទួលដោយក្រុមហ៊ុនរដ្ឋរុស្ស៊ី ខាងលក់អាវុធ ទៅក្រៅ បណ្តាលមកពី “បដិវត្តន៍និទាឃរដូវ” នៅលីប៊ី និងប្រទេសអារ៉ាបឯទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ