«វប្បធម៌អន្តរាគមន៍» គួរត្រូវលុបបំបាត់ឲ្យអស់ពីសង្គម!
ចុះផ្សាយនៅថ្ងៃ៖
ស្តាប់ - ០៤:៣១
ចាប់តាំងពីប្រមុខរដ្ឋាភិបាលបានចេញបទបញ្ជាជាបន្តបន្ទាប់ ឲ្យចាត់វិធានការចំពោះជនល្មើសច្បាប់ដោយមិនរើសមុខមក កិច្ចអន្តរាគមន៍ពីសំណាក់អ្នកមានអំណាច ដើម្បីការពារកូនចៅ ឬក៏សាច់ញាតិរបស់ខ្លួន ដែលប្រព្រឹត្តខុសច្បាប់ ហាក់ដូចជាថមថយជាទូទៅ។ ប៉ុន្តែ សម្រាប់ក្រសែភ្នែកអ្នកវិភាគនិងតាមដានសង្គមកម្ពុជា «វប្បធម៌អន្តរាគមន៍» នៅតែមានដដែលប៉ុន្តែ គ្រាន់តែមិនចេញមុខចំហដូចកាលពីមុន។ ដូច្នេះ ការឈានទៅលុបបំបាត់ទាំងស្រុងនូវទម្លាប់អន្តរាគមន៍ ហើយបែរមកគោរពច្បាប់ដោយស្មើភាពគ្នា គឺជាអ្វីដែលត្រូវធ្វើឲ្យបាន ដើម្បីធ្វើឲ្យសង្គមកម្ពុជាក្លាយជានីតិរដ្ឋ។
មិនថាតែបញ្ហាតូចឬធំទេ សូម្បីតែគ្រោះថ្នាក់ចរាចរណ៍បន្តិចបន្តួចក៏អ្នកដែលមានខ្នងបង្អែកទាំងឡាយតែងទូរសព្ទ័ឆ្វាត់ឆ្វែង ដើម្បីរកអន្តរាគមន៍ ជំនួសឲ្យការដោះស្រាយតាមផ្លូវច្បាប់ដោយសន្តិវិធី។ អ្នកខ្លះទៀត សូម្បីតែខ្លួនខុសទាំងស្រុងក៏បែរទៅជារកអន្តរាគមន៍ ដើម្បីយកឈ្នះទាំងបំពានទៅលើគូទំនាស់ម្ខាងទៀត។ រីឯអ្នកមានអំណាចខ្លះក៏មិនញញើតនឹងចូលធ្វើអន្តរាគមន៍ទាំងបំពានដែរ បើទោះបីជាដឹងថា កូនចៅរបស់ខ្លួនជាអ្នកខុសក៏ដោយ។
កម្អែលនៃវប្បធម៌អន្តរាគមន៍នេះហាក់ដូចជាពិបាកលាងជម្រះឲ្យអស់ណាស់ បើទោះបីជាមានបទបញ្ជាផ្ទាល់មាត់ និងជាសាធារណៈពីប្រមុខរដ្ឋាភិបាលយ៉ាងណាក៏ដោយ។ ជារឿយៗ នៅតែមានអ្នកអាងលើខ្នងបង្អែកឲ្យជួយកាង នៅពេលដែលពួកគេត្រូវប៉ូលិសឃាត់តាមផ្លូវដោយសារតែខ្លួនមិនគោរពច្បាប់ចរាចរណ៍ ឬក៏មានបញ្ហាអ្វីផ្សេងទៀតដែលត្រូវដោះស្រាយជាមួយសមត្ថកិច្ច។ យ៉ាងណាក៏ដោយ ទម្លាប់នៃការស្វែងរកអន្តរាគមន៍ហាក់បានស្ងប់ស្ងាត់ជាងមុន រីឯអ្នកដែលចេញមុខអន្តរាគមន៍ក៏មិនសូវហ៊ានចេញមុខដោយចំហដូចកាលពីមុនពេកដែរ។ នេះសបញ្ជាក់ឲ្យឃើញពីការវិវឌ្ឍន៍ដ៏វិជ្ជមានមួយក្នុងទិសដៅឈានទៅលុបបំបាត់វប្បធម៌អន្តរាគមន៍នៅក្នុងសង្គមកម្ពុជា។
ប៉ុន្តែ ទឹកស្ងប់មិនប្រាកដថាគ្មានត្រីនោះឡើយ មានន័យថា ភាពស្ងប់ស្ងាត់នេះត្រូវគេសង្កេតឃើញជាទូទៅថាមានតែសម្បកខាងក្រៅប៉ុណ្ណោះ តែកិច្ចអន្តរាគមន៍ត្រូវគេធ្វើឡើងដោយស្ងាត់ស្ងៀមតាមខ្សែបណ្តាញដូចសំណាញ់ពីងពាងតែដដែល។ ក្នុងសង្គមកម្ពុជាបច្ចុប្បន្ន ជាទូទៅ នៅពេលដែលមានបញ្ហាអ្វីមួយកើតឡើងមិនថាបញ្ហាតូចធំ បញ្ហាផ្ទាល់ខ្លួន ឬបញ្ហាទាក់ទងនឹងប្រយោជន៍សាធារណៈនោះឡើយ មនុស្សហាក់ដូចជាគិតជាបឋមដល់ខ្នងបង្អែកដែលអាចពឹងពាក់បាន មុននឹងឈានទៅដោះស្រាយបញ្ហា ពីព្រោះថា បើមានខ្នងបង្អែកជួយធ្វើអន្តរាគមន៍ កិច្ចការទាំងឡាយច្បាស់ជានឹងដោះស្រាយបានលឿន និងចំណាយតិចទៀតផង។
មានរឿងខ្លះ គេអាចយកឈ្នះលើគូទំនាស់បាន បើទោះជាគូទំនាស់ម្ខាងទៀតមានប្រៀបខាងផ្លូវច្បាប់តែគ្មានខ្នងបង្អែក។ មានករណីខ្លះទៀតដែលគូទំនាស់ទាំងសងខាងសុទ្ធតែមានខ្នងបង្អែកដូចគ្នា ពេលនោះ ដំណោះស្រាយគឺការបំបិទរឿងចោលតែម្តងមិនឲ្យលេចឮខ្ចរខ្ចាយដល់នាយករដ្ឋមន្ត្រី បើទោះជារឿងនោះធ្ងន់ធ្ងររហូតដល់ប្រើអាវុធភ្ជង់ដាក់គ្នាក៏ដោយ។ រឿងរ៉ាវដែលឧស្សាហ៍កើតជាញឹកញាប់ដែរនោះ គឺ នៅពេលដែលកូនអ្នកធំប្រព្រឹត្តល្មើស សមត្ថកិច្ចកម្រចាត់ការបានណាស់ ដោយសារតែមានអន្តរាគមន៍ដោយស្ងាត់ៗពីក្រុមគ្រួសារ ដែលមានអំណាចលើសមត្ថកិច្ច។ ករណីបាញ់បោះសេរីក្នុងក្លឹបរាត្រីជាឧទាហរណ៍ស្រាប់។ ក្នុងករណីខ្លះទៀត ទោះបីជាមិនបាច់មានអន្តរាគមន៍ ក៏សមត្ថកិច្ចប៉ូលិសតូចតាចមិនហ៊ានលូកដៃចាត់ការតែម្តង នៅពេលដែលគេដឹងថា ជនល្មើសគឺជាកូនចៅរបស់ចៅហ្វាយនាយ ពីព្រោះតែពួកគេខ្លាចជ្រុះស័ក្តិពីលើស្មា។
ឧទាហរណ៍ទាំងនេះបានបង្ហាញឲ្យឃើញថា «វប្បធម៌អន្តរាគមន៍» ឬក៏ឥទ្ធិពលរបស់អ្នកមានអំណាចនៅតែជាឧបសគ្គដ៏រឹងមាំក្នុងការអនុវត្តគោលការណ៍ស្មើភាពគ្នាចំពោះមុខច្បាប់នៅកម្ពុជា។ បញ្ហានេះក៏ជាប្រភពនៃអយុត្តិធម៌សង្គមដ៏គ្រោះថ្នាក់ និងក៏បានធ្វើឲ្យមនុស្សបាត់បង់ការទទួលខុសត្រូវ ពីព្រោះតែអាងលើខ្នងបង្អែក។ ប្រឈមនឹងចំណោទទាំងនេះ លោកនាយករដ្ឋមន្ត្រីហ៊ុន សែន បានចេញបទបញ្ហាជាសាធារណៈជាញឹកញាប់ឲ្យសមត្ថកិច្ចចាត់ការតាមច្បាប់ដោយមិនរើសមុខ ទោះបីជាជនល្មើសជាកូនចៅអ្នកមានអំណាចប៉ុណ្ណាក៏ដោយ។ ប្រមុខរដ្ឋាភិបាលកម្ពុជាថែមទាំងបានព្រមានដកបុណ្យស័ក្តិមន្ត្រីអ្នកមានអំណាចទាំងឡាយណា ដែលចូលចិត្តធ្វើអន្តរាគមន៍ក្នុងរឿងទំនាស់នានាទៀតផង។ ប៉ុន្តែ វប្បធម៌អន្តរាគមន៍នេះនៅតែមានឥទ្ធិពលយ៉ាងខ្លាំងនៅឡើយ ដែលទាមទារឲ្យមានវិធានការបន្ថែមទៀតពីនាយករដ្ឋមន្ត្រី និងក៏ចាំបាច់ត្រូវមានការចូលរួមពីមន្ត្រីអ្នកមានអំណាចទាំងឡាយផងដែរ ដើម្បីប្រែក្លាយសង្គមកម្ពុជាពីសង្គមមួយដែលអ្នកមានឥទ្ធិពលចាំតែឈ្នះទៅជាសង្គមនីតិរដ្ឋដែលផ្តល់ក្តីសង្ឃឹមដល់អ្នកក្រីក្រតូចតាច និងគ្មានខ្នងបង្អែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ