រដ្ឋាភិបាលជាតិនិយមឥណ្ឌា នឹងបង្កើនល្បឿនទិញអាវុធយុទ្ធភណ្ឌ
រដ្ឋមន្ត្រីក្រសួងការពារជាតិថ្មីរបស់ឥណ្ឌា លោក អារុណ ជាលៃយ៍ (Arun Jaitley) បានប្រកាសសន្យានៅថ្ងៃអង្គារទី ២៤មិថុនា នេះ ពន្លឿនដំណើរការទិញសម្ភារៈបរិក្ខាយោធា ក្នុងខណៈដែលកិច្ចសន្យាទិញអាវុធជាច្រើនរបស់ឥណ្ឌាត្រូវជាប់គាំង ឬព្យួរទុកដោយហេតុតែរឿងអាស្រូវពុករលួយ។
ចុះផ្សាយនៅថ្ងៃ៖
ជាមួយនឹងការទទួលស្គាល់ អំពីភាពយឺតយ៉ាវក្នុងវិស័យទិញដូរអាវុធយុទ្ធភណ្ឌ រដ្ឋាភិបាលឥណ្ឌា បានសន្យាថានឹងប្រើគ្រប់មធ្យោបាយ ប្រឹងអស់សមត្ថភាព និងជ្រើសគ្រប់ច្រកទាំងអស់ ដើម្បីធ្វើយ៉ាងណាដឹកនាំដំណើរការទិញសម្ភារៈយោធា ឱ្យមានល្បឿនសមស្របទៅនឹងកាលៈទេសៈ។ កញ្ចប់ថវិកា ដ៏ក្រាសធំមួយនឹងត្រូវរក្សាទុកសម្រាប់បំរើវិស័យការពារជាតិ ដែលលោក អារុណ ជាលៃយ៍ ជារដ្ឋមន្ត្រីក្រសួងការពារជាតិ ក្រសួងហិរញ្ញវត្ថុផង នឹងស្នើសុំទៅកាន់រដ្ឋាភិបាល។ លោកសង្ឃឹមថាសំណើនេះនឹងគ្មានឧបសគ្គរាំងស្ទះទេ នៅពេលរដ្ឋាភិបាលដឹកនាំដោយក្រុមអ្នកជាតិនិយមហិណ្ឌូ បង្ហើបបង្ហាញគម្រោងថវិកាប្រចាំនៅខែកក្កដាខាងមុខ។
សម្រាប់លោករដ្ឋមន្រ្តី មានសំណុំរឿងទិញអាវុធច្រើនណាស់ នៅទើពាក់កណ្តាលផ្លូវ និងត្រូវតែសម្រេចឱ្យបាននាពេលខាងមុខដ៏ឆាប់ៗនេះ។ ឥណ្ឌាជាប្រទេសនាំចូលអាវុធ និងសម្ភារៈបរិក្ខារយោធាលេខមួយនៅលើពិភពលោក ប៉ុន្តែកិច្ចសន្យាធំៗ កំពុងរង់ចាំ តាំងពីជាច្រើនឆ្នាំ សេចក្តីសម្រេចចុងក្រោយ ជាហេតុធ្វើកងយុទ្ធពលឥណ្ឌាជួបកង្វះខាតយ៉ាងធ្ងន់ធ្ងរ។ ជាក់ស្តែងកាលពីខែមករា ឥណ្ឌាបានបង្ខំចិត្តលុបចោលកិច្ចសន្យាទិញឧទ្ធម្ភាគចក្រ១២គ្រឿងពីអ៊ីតាលី ដោយហេតុតែមានជាប់សង្ស័យពាក់ព័ន្ធនឹងរឿងអាស្រូវពុករលួយសូកប៉ាន់។
កង្វះសម្ភារៈបរិក្ខារ អាវុធយុទ្ធភណ្ឌទំនើបៗ បានធ្វើយោធាឥណ្ឌាផ្ទុះធ្លាយជាកំហឹងមិនសប្បាយចិត្តខ្លាំង ជាពិសេសក្នុងខណៈដែលនៅតាមព្រំដែន ភាពតានតឹងបានកើតជារឿយៗជាមួយប៉ាគីស្ថាន ក៏ដូចជាមួយចិន ដែលមានមហិច្ឆតាយោធារីកធំធាត់ជាលំដាប់។ ទាហានជើងទឹកវិញ បានជួបការលំបាកជាពិសេស ព្រោះមាននាវាចម្បាំងតែពាក់កណ្តាលប៉ុណ្ណោះ ក្នុងចំណោមនាវាមុជទឹក ១៤គ្រឿង អាចដំណើរការ និងមានសមត្ថភាពចេញធ្វើសកម្មភាពបានគ្រប់ពេលវេលា តាមតម្រូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ