លោក ហ៊ុនសែនស្នើលោកស៊ូបែឌីជំរុញបក្សប្រឆាំងចូលសភា
នៅក្នុងជំនួបដ៏កម្ររវាងប្រមុខរដ្ឋាភិបាលកម្ពុជា លោកហ៊ុន សែន និងលោក សូរិយាប្រាសាទ ស៊ូបែឌី អ្នករាយការណ៍ពិសេសរបស់អង្គការសហប្រជាជាតិ លោក នាយករដ្ឋមន្ត្រី បានស្នើឱ្យលោក ស៊ូបែឌី ជំរុញគណបក្សប្រឆាំងចូលប្រជុំក្នុងសភា។ ការចូលប្រជុំសភានេះ ជាច្រកតែមួយគត់ដើម្បីទម្លុះភាពទាល់ច្រកនៃស្ថានការណ៍នយោបាយនាពេលបច្ចុប្បន្ន។ គណបក្សសង្គ្រោះជាតិ ស្វាគមចំពោះសំណើរនេះ ប៉ុន្តែបក្សប្រឆាំងស្នើឱ្យមានការបោះឆ្នោតឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ដើម្បីដោះស្រាយបញ្ហាទាល់ច្រកនៃស្ថានការណ៍នយោបាយនៅកម្ពុជានាពេលបច្ចុប្បន្ន គឺមានតែការចូលរួមប្រជុំសភាពីសំណាក់គណបក្សប្រឆាំងតែប៉ុណ្ណោះ។ នេះជាសំណើររបស់លោកនាយករដ្ឋមន្ត្រីហ៊ុន សែន ទៅកាន់អ្នករាយការណ៍ពិសេសរបស់អង្គការសហប្រជាជាតិ លោក សូរិយា ប្រាសាទស៊ូបែឌី នៅក្នុងកិច្ចប្រជុំនាព្រឹកថ្ងៃពុធទី១៥ មករានេះ។
ជាកិច្ចប្រជុំដ៏កម្ររវាងលោកនាយករដ្ឋមន្ត្រីហ៊ុន សែន និងលោក ស៊ូបែឌីបន្ទាប់ពីប្រមុខរដ្ឋាភិបាលកម្ពុជាបានបដិសេធជំនួបអស់រយៈពេលពីរដងរួចមកហើយ។ ហើយជំនួបនៅព្រឹកនេះ ក៏ជាជំនួបដែលធ្វើឡើងក្រោយកម្ពុជាមានផ្ទុះអំពើហិង្សាបង្ហូរឈាម និងចំពេលដែលកម្ពុជាកំពុងតែមានភាពទាល់ច្រកនយោបាយផងដែរ។
ឆ្លើយទៅកាន់អ្នកសារព័ត៌មាននៅវិមានសន្តិភាព លោក ឱមយិន ទៀង ដែលជាសមាសភាពម្នាក់ក្នុងិចប្រជុំដែរនោះ បានដកស្រង់ប្រសាសន៍លោកនាយករដ្ឋមន្ត្រីហ៊ុន សែន ដែលឆ្លើយតបទៅសំណួរស្តីពីភាពទាល់ច្រកនៃនយោបាយនៅកម្ពុជារបស់ លោក ស៊ូបែឌីថា “បញ្ហាទាំងអស់ ទាល់តែគណបក្សសង្គ្រោះជាតិ ចូលរដ្ឋសភា ព្រោះថាកំណែទម្រង់ការបោះឆ្នោត និងការដោះស្រាយបញ្ហានយោបាយ នាពេលសព្វថ្ងៃនេះ ដែលត្រូវធ្វើចេញពីរដ្ឋសភា។
សំណើររបស់លោកនាយករដ្ឋមន្ត្រីហ៊ុន សែនបែបនេះ គឺខណៈដែលតំណាងរាស្ត្រគណបក្សប្រឆាំងបានធ្វើពហិការមិនចូលរួមប្រជុំសភាអាណត្តិទី៥រហូតមកចាប់តាំងពីសភាអាណត្តិទី៥ចាប់កំណើតនៅខែកញ្ញា។ ឆ្លើយតបទៅនឹងសំណើររបស់បក្សកាន់អំណាច់ស្តីពីការចូលរួមប្រជុំសភានេះ លោក សម រង្ស៊ីប្រធានគណបក្សសង្គ្រោះជាតិ បានថ្លែងស្វាគមន៍ចំពោះសំណើរនេះ។ ប៉ុន្តែបក្សប្រឆាំងមានសំណើរពីរសំខាន់គឺ កំណែទម្រង់ការបោះឆ្នោត និងការបោះឆ្នោតឡើងវិញ។
យ៉ាងណាក៏ដោយការស្នើទៅតំណាងអង្គការសហប្រជាជាតិឱ្យបក្សប្រឆាំងចូលប្រជុំសភាដើម្បីដោះស្រាយបញ្ហានយោបាយនាពេលបច្ចុប្បន្ននេះ គឺជាវិជ្ជមានមួយ។ តាមរយៈអ្នកនាំពាក្យនៃអង្គប្រជុំលោក ស៊ូបែឌី ក៏បានមានប្រសាសន៍យ៉ាងខ្លីថា លោក ក៏រងចាំមើលដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ