iCloud, Dropbox, Google Drive មានសុវត្ថិភាពសំរាប់ផ្ទុកនិងរក្សាទិន្នន័យ ឯកសារ រូបថត វីដេអូផ្ទាល់ខ្លួនដែរឬទេ ?
ចុះផ្សាយនៅថ្ងៃ៖
ស្តាប់ - ០៤:៣២
សេវាកម្មផ្ទុកឯកសារ ឬទិន្នន័យអេឡិចត្រូនិកដូចជារូបថត វីដេអូ លើអ៊ីនធ័រនែត មានដូចជា iCloud, Dropbox, Google Drive មានប្រជាប្រិយភាពខ្លាំងក្នុងពេលបច្ចុប្បន្ននេះ ដោយសារតែងាយស្រួលប្រើប្រាស់ ក្នុងការផ្ទុក រក្សា និងផ្ទេរ ឯកសារនិងទិន្នន័យ។ ប៉ុន្តែសំនួរសួរថាតើឯកសារនិងទិន្នន័យអេឡិចត្រូនិកទាំងនោះពិតជាមានសុវត្ថិភាពមែនឬ ? ព្រោះក្នុងពេលថ្មីៗនេះ របាំងសុវត្ថិភាពរបស់ iCloud នៃក្រុមហ៊ុន Apple ត្រូវបានគេរកឃើញចំនុចខ្សោយ និងដែល អនុញ្ញាតឲ្យពួក Hackers ជ្រៀតចូលក្នុងគណនេយ្យ iCloud របស់តារាស្រ្តីហូលីវូដជាច្រើន ដើម្បីទាញយកនូវរូបថតអាក្រាតរបស់តារាស្រ្តីទាំងនោះ ដើម្បីលក់ និងផ្សាយលើវិបសាយមួយចំនួនលើបណ្តាញអ៊ីនធ័រនែត ។
បើទោះជាបច្ចេកទេសដែលក្រុម Hackers ទាំងនោះបានប្រើនៅមិនទាន់អាចបញ្ជាក់ឲ្យបានប្រាកដ តែបើតាមអ្នកជំនាញខាងបច្ចេកវិទ្យាពត៌មានជាច្រើន បានឲ្យដឹងថា ក្រុមទុច្ចរិតទាំងនោះទំនងជា ឆ្លៀតឱកាសលើចំនុចខ្សោយនៃរបាំងសុវត្ថិភាពរបស់ Application « Find my iPhone » ជាស្ពានមុននឹង អាចលុកលុយចូលទៅក្នុង iCloud ព្រោះថា Application « Find my iPhone » នេះមិនមានរបាំងការពារប្រឆាំងនឹងការប៉ុនប៉ងនានាដើម្បីជ្រៀតចូលក្នុង ប្រព័ន្ធទូរស័ព្ទ iPhone នោះទេ បានសេចក្តីថាវាជាចន្លោះប្រហោងសុវត្ថិភាព ដែលអាចឲ្យគេ ព្យាយាមសាកល្បងតភ្ជាប់តាមអ៊ីនធ័រនែតទៅនឹងទូរស័ព្ទដែ iPhone តាមការបញ្ចូលលេខសំងាត់ជាច្រើនដងដោយមិនកំណត់ចំនួន ហើយក៏មិនមានរនាំងការពារទប់ស្កាត់ រារាំង ការប៉ុនបងបែបនេះក្រោយពីការសាកល្បងជាច្រើនលើកដោយមិនបានសំរេចនោះដែរ។ ដូចនេះការប៉ុនប៉ងជ្រៀតចូលក្នុងប្រព័ន្ធទូរស័ព្ទដែផ្ទាល់ខ្លួននេះ អាចនឹងងាយសំរេចបាន ប្រសិនបើលេខសំងាត់ដែលបានប្រើមានលក្ខណៈងាយស្រួល និងសាមញ្ញ។
នេះអាចជាករណីដែលបានបណ្តាលឲ្យតារាស្រ្តីហូលីវូដល្បីៗ ក្លាយជាជនរងគ្រោះក្នុងរឿងនេះ ហើយក្នុងនោះ មានដូចជាតារាសំដែង Jennifer Lawrence ដែលជាតួស្រីក្នុងរឿង X-Men, Scarlett Johansson, តារាសំដែងហូលីវូដដ៏ល្បីនិងដ៏ស្រស់ស្អាត ព្រមទាំងតារាសំដែងនិងចំរៀងស្ត្រីជាច្រើនទៀត មានដូចជា Selena Gomez, Hilary Duff, Rihanna, Vanessa Hudgens ។ល។
ចំពោះបញ្ហាប្រឈមបែបនេះ ក្រៅពីបណ្តឹងតាមផ្លូវច្បាប់ស្តីពីការរំលោភលើសិទ្ធិជីវិតឯកជនរបស់បុគ្គល សួរថាតើ មានវិធានការ ឬមធ្យោបាយអ្វី ដែលអាចឲ្យគេជៀសវាងពីបញ្ហាបែបនេះ ?
តាមការពិត វាមិនមែនជារឿងមិនល្អ ឬអសុវត្ថិភាពទាំងស្រុងទេក្នុងការប្រើប្រាស់ iCloud ព្រោះបញ្ហាដែលបានកើតឡើងជាការវាយប្រហារមានការតំរង់ទិសចំៗ និងច្បាស់លាស់ ឧទាហរណ៍ លើតារាស្រ្តី ដែលល្បីនិងមានសម្រស់ស្រស់សោភាតែម្យ៉ាង ហើយក៏មិនមែនអ្នកខាងបច្ចេកវិទ្យាពត៌មានណា ក៏អាចមានចំណេះបច្ចេកទេសប្រព្រឹត្ត បែបនេះ បាននោះទេ។ ម្យ៉ាងទៀត ភ្លាមៗនោះ ក្រោយពីបានដឹងពីបញ្ហានេះ ក្រុមហ៊ុន Apple ក៏បានចាត់ វិធានការបច្ចេកទេស ដើម្បីប៉ះប៉ូវនូវកង្វះខាតសន្តិសុខរួចស្រេចហើយដែរ ព្រមទាំងមានអន្តរាគមន៍យ៉ាងសកម្មពីFBIផងដែរក្នុងការស៊ើបអង្កេតលើករណីនេះ។ ដូច្នេះ ការបារម្ភក្នុងការប្រើប្រាស់ iCloud ក៏ត្រូវបានកាត់បន្ថយ ហើយខ្ញុំគិតថា បញ្ហាបែបនេះ វាកាន់តែមានតិច ឬសឹងតែមិនអាចកើតមានចំពោះបុគ្គលដែលជាជនសាមញ្ញធម្មតាៗ។
ទោះជាយ៉ាងណា គេក៏ត្រូវមានការប្រុងប្រយ័ត្ននិងមានវិធានការមួយចំនួនដើម្បីជៀសវាងនូវការរំខាននានាផងដែរ។ ក្នុងនោះ ខ្ញុំសូមផ្តល់ជូននូវវិធានការសាមញ្ញតែសំខាន់ ចំនួនពីរ៖ ទីមួយគឺការជ្រើសលេខសំងាត់។ វាមិនមែនជាការច្រំដែលពេកទេដែលយើងសូមរំលឹកលោកអ្នកពីការជ្រើសរើសនូវលេខសំងាត់ ព្រោះថាវាជារឿងសំខាន់ដែលថាអ្នកត្រូវជ្រើសរើសនូវលេខសំងាត់ (Password) ដែលមានសុវត្ថិភាព។ ការជ្រើសយកលេខសំងាត់ដែលផ្សំដោយអក្សរនិងលេខ ជាលេខសំងាត់ដែលមានសុវត្ថិភាពដ៏ប្រសើរ តែលេខសំងាត់ដែលមានសុវត្ថិភាពជាងគេ គឺបានពីការផ្សំរវាងអក្សរ លេខ សញ្ញាសំគាល់ពិសេស ដូចជាឧទានសញ្ញាជាដើម និងអក្សរធំ (Lettre majuscule ឬ Capital Letter)។ ការធ្វើបែបនេះ នឹងនាំឲ្យគេមានការលំបាកក្នុងការទស្សន៍ទាយលេខសំងាត់តាមប្រព័ន្ធកុំព្យូទ័រ។
ជាការពិតណាស់ថា យើងខ្លួនឯង ក៏នឹងមានការពិបាកក្នុងការចងចាំនូវលេខសំងាត់ទាំងនេះ ពិសេសនៅពេលដែលយើងមានគណនេយ្យច្រើនផ្សេងៗគ្នា ដូចជា iCloud ផ្សេង Dropbox ផ្សេង Yahoo mail ផ្សេង Gmail, Google Drive, Facebook ផ្សេង។ តែក៏វានៅតែប្រសើរជាងលេខសំងាត់ ដែលងាយស្រួលក្នុងការស្រាយដោយ ប្រព័ន្ធកុំព្យូទ័រ។
វិធានការចាំបាច់ ឬកំណត់ចំណាំចំបងទីពីរដែលសំខាន់ និងក៏ជាប្រភពនៃបញ្ហាដែរនោះ គឺ មិនត្រូវរក្សាទុកឯកសារ ឬទិន្នន័យណាដែលរសើប ក្នុងសេវាកម្មផ្ទុកឯកសារឬទិន្នន័យអេឡិចត្រូនិក លើអ៊ីនធ័រនែត ទាំងនោះទេ មិនថាចំពោះតែ iCloud Dropbox ឬ Google Drive នោះទេ។ ពិតណាស់ថា សេវាកម្មផ្ទុក និងរក្សាឯកសារនិងទិន្នន័យទាំងនេះអាចជាកន្លែងសមស្របសំរាប់ផ្ទុកនិងរក្សាដូចជាឯកសារបទចំរៀង ឬក៏ខ្សែភាពយន្តនានា ប៉ុន្តែមិនមែនជាកន្លែងដែលធានាបាន១០០%នូវសុវត្ថិភាពចំពោះពត៌មាន ឯកសារ ឬទិន្នន័យទាំងឡាយណាដែលមានលក្ខណៈរសើបនោះទេ។ ព្រោះយើងត្រូវដឹងថា ក្នុងបច្ចេកវិទ្យាពត៌មាន មិនមានសុវត្ថិភាពដាច់ខាត និងជាអចិន្ត្រៃយ៍នោះទេ ដោយសារតែបច្ចេកវិទ្យាពត៌មាន មានការប្រែប្រួល និងរីកចំរើនឥតឈប់ឈរពីមួយថ្ងៃទៅមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ