នាយករដ្ឋមន្ត្រីជប៉ុនប្រឈមមុខនឹងបញ្ហាសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៤:៥២
នៅថ្ងៃអង្គារទី១៤កញ្ញាម្សិលមិញ លោកNaoto Kan ត្រូវបានគេជ្រើសរើសឲ្យបន្តដឹកនាំគណបក្សប្រជាធិបតេយ្យជប៉ុនតទៅទៀត។ ក្រោយពីបានជាប់ឆ្នោតជាប្រធានបក្សប្រជាធិបតេយ្យជប៉ុនភ្លាម លោកNaoto Kan ដែលមានសិទ្ធិបន្តតំណែងនាយករដ្ឋមន្ត្រីតទៅទៀត បានប្រកាសភ្លាមថា អាទិភាពរបស់លោកគឺកាត់បន្ថយជាបន្ទាន់បំណុលសាធារណៈ។ តើអ្វីទៅទិសដៅនយោបាយសេដ្ឋកិច្ចរបស់លោកKan ដែលបានគ្រប់គ្រងប្រទេសជប៉ុនបីខែកន្លងមកហើយ?
ការដែលលោកNaoto Kan បានជាប់ឆ្នោតជាថ្មី ជាប្រធាននៃបក្សប្រជាធិបតេយ្យជប៉ុន កាលពីម្សិលមិញ គឺជាដំណឹងល្អ។ ដំណឹងល្អ ដោយសារថាប្រសិនបើលោកIchiro Ozawa ដែលជាគូប្រជែងរបស់លោកKan ជាអ្នកបានជាប់ឆ្នោតវិញ នោះប្រទេសជប៉ុននឹងត្រូវផ្លាស់ប្តូរនាយករដ្ឋមន្ត្រីម្តងទៀត។ ចូរកុំភ្លេចថា ក្នុងអំឡុងពេលជិត៤ឆ្នាំចុងក្រោយនេះ ប្រទេសជប៉ុនបានប្តូរនាយករដ្ឋមន្ត្រី៥ដងរួចទៅហើយ បានន័យថាជាមធ្យមភាគ នាយករដ្ឋមន្ត្រីនីមួយៗ ក្តាប់អំណាចមិនបាន៨ខែល្អផង។
ម្ល៉ោះហើយ លោកKan ដែលនៅមានសិទ្ធិបន្តតំណែងជាប្រធាននៃបក្សក្តាប់អំណាច និងដែលជាស្វ័យប្រវត្ត ត្រូវបន្តកាន់តំណែងជានាយករដ្ឋមន្ត្រីតទៅទៀត មានពេលគ្រប់គ្រាន់ដើម្បីបន្តអនុវត្តនយោបាយរបស់លោក។ រីឯប្រទេសជប៉ុនវិញ ជាគោលការណ៍ នឹងអាចស្គាល់ស្ថិរភាពនយោបាយ មួយរយៈពេលវែងគ្រាន់បើដែរ ពីព្រោះការបោះឆ្នោតសភាអាណត្តិថ្មី នឹងត្រូវប្រព្រឹត្ត នៅឆ្នាំ២០១៣ ឯណោះ។
តើអ្វីទៅនយោបាយរបស់លោកNaoto Kan?
ជាបឋម គួររំឭកឡើងវិញថា កាលពីខែមិថុនាកន្លងទៅនេះ នៅពេលដែលលោក Naoto Kan ឡើងមកធ្វើជានាយករដ្ឋមន្ត្រី ពលរដ្ឋជប៉ុនភាគច្រើនបានផ្តើមមានក្តីសង្ឃឹមឡើងវិញ។ ពួកគេមានជំនឿថា លោកKan ដែលជាអតីតរដ្ឋមន្ត្រីក្រសួងហិរញ្ញវត្ថុ ច្បាស់ជាអាចដោះស្រាយចេញ បញ្ហាធំជាងគេនៅប្រទេសជប៉ុនសព្វថ្ងៃ នោះគឺបញ្ហាសេដ្ឋកិច្ច។
សេដ្ឋកិច្ចជប៉ុននៅទ្រឹងមួយកន្លែងជាង២០ឆ្នាំកន្លងមកហើយ។ ភាពទ្រឹងនៅមួយកន្លែងនេះមានលក្ខណៈកាន់តែធ្ងន់ធ្ងរ តាំងពីវិបត្តិសេដ្ឋកិច្ចសកលបានផ្តើមបោកកញ្ជ្រោក ទៅលើពិភពលោក កាលពីពីរឆ្នាំមុន។ ជាក់ស្តែង សេដ្ឋកិច្ចនៃប្រទេសបានដើរថយក្រោយ ពេញមួយឆ្នាំ២០០៨ ហើយទើបតែផ្តើមងើបក្បាលឡើងវិញនៅឆ្នាំ២០០៩-២០១០នេះប៉ុណ្ណោះ។
ជាការពិតណាស់ដែលថា បើប្រៀបទៅនឹងសេដ្ឋកិច្ចនៃបណ្តាប្រទេសប្រើបា្រស់ប្រាក់អឺរ៉ូ សេដ្ឋកិច្ចជប៉ុននៅមានថាមពលខ្លាំងជាង។ ក៏ប៉ុន្តែ បំណុលសាធារណៈរបស់រដ្ឋជប៉ុនធំណាស់ ច្រើនណាស់ ច្រើនលើសបំណុលរបស់បណ្តាប្រទេសអឺរ៉ុបទៅទៀត គឺស្មើនឹងផលិតផលដុលក្នុងស្រុកចំនួនពីរឆ្នាំ ពោលគឺប្រមាណមួយពាន់ម៉ឺនលានដុល្លារ។ មិនតែប៉ុណ្ណោះ ការអនុវត្តន៍ផែនការផ្តល់សន្ទុះសេដ្ឋកិច្ចបន្តបន្ទាប់គ្នា នារយៈពេលពីរឆ្នាំចុងក្រោយនេះ បានធ្វើឲ្យរដ្ឋជប៉ុនជំពាក់លុយកាន់តែច្រើន។
មែនទែនទៅ ពលរដ្ឋជប៉ុននិងរដ្ឋាភិបាលជប៉ុន មិនអាចមានទំនុកទុកចិត្តលើអនាគតបានទេ។ ម្យ៉ាង ចិនទើបតែបានវ៉ាឈ្នះជប៉ុន ដោយក្លាយទៅជាមហាអំណាចសេដ្ឋកិច្ចពិភពលោកទីពីរ និងម្យ៉ាងទៀត ប្រជាជនជប៉ុនមានចំនួនកាន់តែតិចទៅៗ និងមានវ័យកាន់តែចាស់ទៅៗ។
គឺនៅក្នុងពេលមួយដែលប្រទេសធ្វើមុខក្រញូវអ៊ីចឹងហើយ ដែលលោកNaoto Kan បានឡើងមកកាន់កាប់តំណែងនាយករដ្ឋមន្ត្រី កាលពីបីខែមុន។ កាលណោះ លោកKan បានថ្លែងប្រាប់ប្រជាជាតិជាអាទិ៍ថា ប្រទេសជប៉ុនត្រូវឈប់ដេកយល់សប្ត ត្រូវហ៊ានបញ្ចប់នយោបាយចាស់គំរឹលហួសសម័យ និងត្រូវតែអនុវត្តយ៉ាងក្លាហាន នយោបាយថ្មីដែលមានមូលដ្ឋានប្រាកដនិយម។
ភាពប្រាកដនិយមនឹងច្បាស់ជាតម្រូវឲ្យលោកKan បង្កើនទម្ងន់ពន្ធដារ ដើម្បីប្រមូលលុយឲ្យបានច្រើនជាងមុនយកមកបញ្ចូលក្នុងហិបរដ្ឋ និងដើម្បីកាត់បន្ថយបំណុលសាធារណៈ។ នៅក្នុងន័យនេះ លោកនាយករដ្ឋមន្ត្រីគ្រោងថា នឹងដំឡើងពន្ធដារលើគ្រឿងឧបភោគបរិភោគ គឺTVA ជាភាសាបារាំង ពី៥%ទៅឲ្យដល់១០%។ ភាពប្រាកដនិយម ក៏នឹងច្បាស់ជាតម្រូវឲ្យលោកKan បន្តអនុវត្តផែនការផ្តល់សន្ទុះសេដ្ឋកិច្ច។ ត្រង់នេះ កាលពីសប្តាហ៍មុន តាមរយៈផែនការមួយថ្មីដែលមានតម្លៃរហូតដល់ទៅជាង១ម៉ឺន ៦ពាន់លានដុល្លារ រដ្ឋាភិបាលជប៉ុនប្រាថ្នាចង់បង្កើតការងារចំនួន២០ម៉ឺនកន្លែង នៅពេលឆាប់ៗខាងមុខ។
លើសពីនេះទៅទៀត លោកនាយករដ្ឋមន្រ្តី ក៏ប្រហែលជាគ្មានជម្រើសអ្វី ក្រៅពីបន្តធ្វើអន្តរាគមន៍បញ្ចុះតម្លៃប្រាក់យ៉េនបន្តិចម្តងៗ ក្នុងគោលដៅធ្វើឲ្យផលិតផលជប៉ុនអាចប្រកួតប្រជែងនឹងផលិតផលរបស់អឺរ៉ុប និងជាពិសេសផលិតផលរបស់ចិនក្នុងទីផ្សារអាស៊ី។
យ៉ាងណាក៏ដោយ ការគ្រោងដំឡើងទ្វេដង ពន្ធដារលើគ្រឿងឧបភោគបរិភោគ អាចនឹងធ្វើឲ្យប្រជាជនរួញរាក្នុងការទិញដូរហូបចុក និងនៅទីបំផុត បង្កជាឧបសគ្គដល់កំណើនសេដ្ឋកិច្ច។ មិនតែប៉ុណ្ណោះ វិធានការនេះជាវិធានការអប្រជាប្រិយក្រៃលែង ពោលគឺវាអាចនឹងបណ្តាលឲ្យលោកនាយករដ្ឋមន្ត្រីKan បាត់បង់ប្រជាប្រិយភាពយ៉ាងលឿនរហ័ស រហូតដល់អាចបណ្តាលឲ្យលោកសុំលាលែងពីតំណែង ដូចប្រមុខរដ្ឋាភិបាលមុនៗទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ