ហ្វ៊ុនស៊ិនប៉ិចអនុម័តគោលនយោបាយរួបរួមអ្នករាជានិយមឡើងវិញ
គណបក្សហ្វ៊ុនស៊ិនប៉ិចបានបើកអង្គសមាជវិសាមញ្ញមួយនៅព្រឹកថ្ងៃសៅរ៍ ទី២៥ ខែសីហានេះដោយបានអនុម័តគោលនយោបាយរួបរួមគណបក្សហ្វ៊ុនស៊ិនប៉ិចតែមួយឡើងវិញ។ អង្គសមាជវិសាមញ្ញនេះក៏បានសម្រេចបញ្ចូលសមាជិកថ្មីចំនួន ៦០៣ នាក់មកពីគណបក្សជាតិនិយម អតីតគណបក្ស នរោត្តម រណឬទ្ធិ ទៅក្នុងក្រុមប្រឹក្សាជាតិរបស់ខ្លួន ដែលជាការចាប់ផ្តើមនៃចលនាបង្រួបបង្រួមអ្នករាជានិយមដោយគ្មានសមាជិករាជវង្សដឹកនាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
អង្គសមាជវិសាមញ្ញរបស់គណបក្សហ្វ៊ុនស៊ិនប៉ិចកាលពីព្រឹកមិញនេះ បានអនុម័តសេចក្តីថ្លែងការណ៍រួមមួយដែលមានបីចំណុច គឺទី១៖ អនុម័តកែសម្រួលលក្ខន្តិកៈ និងបទបញ្ជាផ្ទៃក្នុង កែសម្រួលរចនាសម្ព័ន្ធដឹកនាំ និងខ្លឹមសារពិធីសារស្តីពីការបង្កើតគណៈកម្មការសម្រាប់ការរួបរួមរវាង ហ្វ៊ុនស៊ិនប៉ិច និងគណបក្សជាតិនិយម។ ទី២៖ អនុម័តបញ្ចូលសមាជិកថ្មីចំនួន ៦០៣ នាក់មកពីគណបក្សជាតិនិយមដែលទើបតែបានប្តូរឈ្មោះពីគណបក្ស នរោត្តម រណឬទ្ធិ កាលពីថ្ងៃម្សិលមិញ ទៅក្នុងក្រុមប្រឹក្សាជាតិរបស់ខ្លួន និងទី៣៖ អនុម័តគោលនយោបាយរួបរួមហ្វ៊ុនស៊ិនប៉ិចតែមួយឡើងវិញ។
អង្គសមាជនេះបានបើកធ្វើនៅទីស្នាក់ការកណ្តាលគណបក្សហ្វ៊ុនស៊ិនប៉ិច ក្នុងភូមិក្តីចាស់ សង្កាត់បាក់ខែង ខណ្ឌឫស្សីកែវ រាជធានីភ្នំពេញក្រោមអធិបតីភាពរបស់លោក កែវ ពុធរស្មី មគ្គុទ្ទេសក៍គណបក្សហ្វ៊ុនស៊ិនប៉ិច និង លោក ញ៉ឹក ប៊ុនឆៃ ប្រធានប្រតិបត្តិគណបក្ស និងមានអ្នកចូលរួមប្រមាណជា ២០០០ នាក់។ អង្គសមាជវិសាមញ្ញនេះមានគោលដៅជំរុញការរួបរួមគ្នារវាងអ្នករាជានិយមឲ្យទាន់ការបោះឆ្នោតខែកក្កដាឆ្នាំ ២០១៣ ខាងមុខ។ លោក កែវ ពុធរស្មី បានថ្លែងថា នេះគឺជាការរួបរួមគណបក្សហ្វ៊ុនស៊ិនប៉ិចឡើងវិញ បន្ទាប់ពីការបែកបាក់ដ៏ឈឺចាប់និងបានធ្វើឲ្យគណបក្សរាជានិយមធ្លាក់ចុះយ៉ាងខ្លាំងមកនោះ។
កាលពីថ្ងៃសុក្រម្សិលមិញ គណបក្ស នរោត្តម រណឬទ្ធិ ក៏បានបើកធ្វើអង្គសមាជវិសាមញ្ញមួយដែរ។ អង្គសមាជនេះបានបើកធ្វើឡើងភ្លាមៗបន្ទាប់ពីសម្តេចក្រុមព្រះ នរោត្តម រណឬទ្ធិ បានប្រកាសលាឈប់ពីនយោបាយក្រោយជម្លោះបែកបាក់ជាមួយលោកសៅ រ៉ានី។ គណបក្ស នរោត្តម រណឬទ្ធិ ក៏ត្រូវបានគេប្តូរឈ្មោះទៅជាគណបក្សជាតិនិយមវិញ ហើយលោកសៅ រ៉ានី ដែលជាគូទំនាស់ជាមួយសម្តេចក្រុមព្រះក៏ត្រូវបានអង្គសមាជជ្រើសតាំងជាប្រធានគណបក្សជាតិនិយម។
ការរួបរួមគណបក្សរាជានិយមនៅពេលនេះបានធ្វើឡើងដោយគ្មានរាជវង្សជាអ្នកដឹកនាំដូចកាលពីមុនទេ។ សម្តេចក្រុមព្រះ នរោត្តម រណឬទ្ធិ ដែលជាតួអង្គអ្នកនយោបាយលេខមុខមាត់ជាងគេក្នុងចំណោមរាជវង្ស បានលាឈប់ពីឆាកនយោបាយដោយសារជម្លោះបែកបាក់។ ស្របពេលនៃការប្រកាសរួបរួមគណបក្សរាជានិយមនៅឯភ្នំពេញ មានព័ត៌មានលេចឮថា អតីតសកម្មជនគណបក្ស នរោត្តម រណឬទ្ធិ ខេត្តកំពតជាច្រើនបានទៅចូលរួមជាមួយគណបក្សសង្គ្រោះជាតិនៃចលនាបក្សប្រឆាំងវិញ។
ប៉ុន្តែ លោក សៅ រ៉ានី ប្រធានគណបក្សជាតិនិយមបានបដិសេធព័ត៌មាននេះ។ ទាំងលោកសៅ រ៉ានី ក៏ដូចជាលោកកែវ ពុធ រស្មីដែរ សុទ្ធតែបានសម្តែងក្តីសង្ឃឹមថា ការរួបរួមគ្នានៃគណបក្សរាជានិយមនឹងទទួលបានការគាំទ្រកាន់តែច្រើននៅក្នុងការបោះឆ្នោតឆ្នាំ ២០១៣ ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ