គណបក្សឆ្វេងនិយមនាំមុខក្នុងការបោះឆ្នោតសភាបារាំងជុំទីមួយ
គណបក្សសង្គមនិយមរបស់លោក François Hollande និងគណបក្សសម្ព័ន្ធមិត្តទទួលបានសំឡេងនាំមុខគេ នៅក្នុងការបោះឆ្នោតសភាបារាំង ជុំទីមួយ កាលពីថ្ងៃអាទិត្យម្សិលមិញ ហើយអាចឈានទៅគ្រប់គ្រងរដ្ឋសភា នៅក្រោយការបោះឆ្នោតជុំទីពីរ នៅថ្ងៃអាទិត្យក្រោយ។
ចុះផ្សាយនៅថ្ងៃ៖
ស្តាប់ - ០៣:៥៧
គណបក្សសង្គមនិយម (Parti Socialiste) របស់លោកហូឡង់ និងគណបក្ស UMP របស់លោកសាកូហ្ស៊ី ទទួលបានសំឡេងប្រហាក់ប្រហែលគ្នា នៅក្នុងការបោះឆ្នោតសភាជុំទីមួយ កាលពីថ្ងៃអាទិត្យម្សិលមិញ។ គណបក្ស UMP ទទួលបានសំឡេង ៣៤,៦% ហើយគណបក្សសង្គមនិយមទទួលបាន ៣៤,៤%។ ក៏ប៉ុន្តែ បើសិនជាបូកបន្ថែមជាមួយគណបក្សបរិស្ថាន (Europe Ecologie les Verts) ដែលជាសម្ព័ន្ធមិត្ត គណបក្សរបស់ហូឡង់ទទួលបានសំឡេងរហូតដល់ទៅ ៤៦%។
អ្វីដែលគួរកត់សម្គាល់ នៅក្នុងការបោះឆ្នោតជុំទីមួយនេះ គឺអត្រាអ្នកមិនទៅបោះឆ្នោត ដែលមានរហូតដល់ទៅជិត ៤៣%។
ការបោះឆ្នោតជុំទីពីរនឹងត្រូវប្រព្រឹត្តទៅនៅថ្ងៃអាទិត្យ ១៧មិថុនាខាងមុខ។
ស្ទើរតែគ្រប់វិទ្យាស្ថានស្ទាបស្ទង់មតិទាំងអស់ នៅបារាំង បានព្យាករថា គណបក្សសង្គមនិយមនឹងទទួលបានអាសនៈចន្លោះពី ២៧៤ ទៅ ៣០៥ ហើយបើបូកបញ្ចូលជាមួយគណបក្សបរិស្ថាន គឺអាចបានរហូតដល់ពី ៣១០ ទៅ ៣៥៦អាសនៈ ក្នុងចំណោមអាសនៈសរុបទាំង ៥៧៧ នៅក្នុងរដ្ឋសភា។ ២៨៩អាសនៈ គឺជាសំឡេងភាគច្រើនដាច់ខាត ដែលគេត្រូវការ ដើម្បីបោះឆ្នោតអនុម័តច្បាប់ និងផ្តល់ ឬដកសេចក្តីទុកចិត្តពីរដ្ឋាភិបាល។
គួរបញ្ជាក់ថា នៅពេលនេះ ក្រៅពីតំណែងប្រធានាធិបតី និងនាយករដ្ឋមន្រ្តី គណបក្សសង្គមនិយមកំពុងគ្រប់គ្រងព្រឹទ្ធសភា ព្រមទាំងក្រុមប្រឹក្សាតំបន់ ខេត្ត និងក្រុងភាគច្រើន នៅទូទាំងប្រទេសបារាំង។ ប្រសិនបើនៅថ្ងៃអាទិត្យក្រោយ គណបក្សសង្គមនិយមអាចទទួលអាសនៈភាគច្រើន នៅរដ្ឋសភាមួយទៀត មានន័យថា អំណាចទាំងអស់ត្រូវស្ថិតក្រោមការគ្រប់គ្រងរបស់គណបក្សសង្គមនិយម។
គណបក្សស្តាំនិយមជ្រុល (Front National) ទទួលបានសំឡេងលំដាប់ទី៣ នៅក្នុងការបោះឆ្នោតជុំទីមួយ ហើយអាចឈានទៅឈ្នះបានអាសនៈសភាជាលើកដំបូង នៅថ្ងៃអាទិត្យក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ