លោក François Hollande បានធ្វើសច្ចាប្រណិធានចូលកាន់មុខតំណែង ប្រធានាធិបតីបារំាង
នៅថ្ងៃអង្គារ ទី១៥ ឧសភានេះ លោក François Hollande បានធ្វើសច្ចាប្រណិធានចូលកាន់មុខតំណែងប្រធានាធិបតីនៃសាធារណរដ្ឋបារំាង។ លោក François Hollande បានជាប់ឆ្នោតជាប្រធានាធិបតីថ្មី នៅក្នុងការបោះឆ្នោតកាលពីថ្ងៃទី ៦ ឧសភាកន្លងមក។ លោក Hollande គឺជា ប្រធានាធិបតីបារំាងទី ៧នៃសាធារណរដ្ឋទី៥ និងជាប្រធានាធិបតីទី២៤នៃសាធារណរដ្ឋបារំាង។ ពិធីផ្ទេរអំណាចត្រូវបានធ្វើឡើងនៅក្នុងវិមានប្រធានាធិបតី Elysée រវាងលោក François Hollande និងលោកប្រធានាធិបតីផុតអាណត្តិ Nicolas Sarkozy ព្រមទំាងមានវត្តមានឥស្សរជន និងភ្ញៀវជាច្រើនរូបផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៤
ពិធីផ្ទេរអំណាចរវាងលោក François Hollande និងលោក Nicolas Sarkozy ត្រូវបានធ្វើឡើង ទៅតាមពិធីការរបស់សាធារណរដ្ឋបារំាង។ ប៉ុន្តែ អ្វីដែលខុសប្លែកពីលោក Nicolas Sarkozy កាលពី ៥ឆ្នំាមុន គឺថា លោក François Hollande បានសម្រេចចិត្តដើរលើកម្រាលព្រំក្រហមចូលក្នុងវិមាន Elysée តែម្នាក់ឯង ដោយមិនបាននំាទំាងគ្រួសារ ប្រពន្ធ ឬមួយក៏កូនៗ ទៅជាមួយទេ គឺខុសពីលោក Sarkozy ដែលបានដើរចូលទំាងគ្រួសារតែម្តង។ ត្រង់ចំណុចនេះ លោក François Hollande ចង់បង្ហាញប្រាប់ប្រជាពលរដ្ឋបារំាងទូទៅថា គឺលោកតែម្នាក់ឯងទេ ដែលបានជាប់ឆ្នោតជាប្រធានាធិបតី គឺមិនមែនក្រុមគ្រួសារ ឬមួយក៏មិត្តភក្តិរបស់លោកទេ។ ចំណែកភរិយា ឬមួយក៏ក្រុមគ្រួសាររបស់លោក Holande ក៏មានវត្តមានដែរ តែចំានៅខាងក្នុងជាមួយនឹងឥស្សរជន ព្រមទំាងភ្ញៀវជាច្រើននាក់ផ្សេងទៀត។ រីឯនៅក្នុងពិធីរៀបចំវិញ ក៏លោក Hollande មិនបានធ្វើឲ្យហ៊ឹកហ៊ាក់ ដូចលោក Sarkozy ដែរ។
ដូចដែលបានគ្រោងទុក លោក François Hollande បានទៅដល់វិមាន Elysée នៅប្រមាណជាម៉ោង ១០ព្រឹក និងត្រូវបានលោក Nicolas Sarkozy ចេញមកទទួលនៅខឿនជណ្តើរវិមាន Elysée។ បន្ទាប់មក ឥស្សរជនទំាងពីរនាក់បានចូលខាងក្នុងវិមាន Elysée ដើម្បីជជែកគ្នារយៈពេលប្រមាណជាកន្លះម៉ោង។ គឺជាជំនួបមួយ ទល់នឹងមួយរវាងលោក Hollande និង លោក Sarkozy ដោយគ្មានកាមេរ៉ា និងអ្នកកាសែតណាម្នាក់ត្រូវបានគេអនុញ្ញាតឲ្យចូលរួមទេ។ តើឥស្សរជនទំាងពីរនាក់បាននិយាយគ្នា ពីរឿងអ្វីខ្លះ ?
ពិតជាគ្មាននរណាម្នាក់ដឹង និងអាចដឹងបានទេ។ បើតាមមើលទៅ អាចនឹងមានសំណុំរឿងជាតិ និងអន្តរជាតិសំខាន់ៗដែលលោក Sarkozy បាននិយាយប្រាប់លោក Hollande។ បន្ទាប់ពីជំនួបនោះមក លោក Hollande ក៏បានជូនដំណើរលោក Sarkozy ឡើងឡានចេញពីវិមាន Elysée។ ក្រោយមកទៀត ពិធីធ្វើសច្ចាប្រណិធានចូលកាន់មុខតំណែងរបស់លោក Hollande បានចាប់ផ្តើម ដោយអនុវត្តទៅតាមពិធីការរបស់សាធារណរដ្ឋបារំាង រួមមាន ការប្រកាសលទ្ធផលផ្លូវការរបស់ប្រធានក្រុមប្រឹក្សាធម្មនុញ្ញ ការបង្ហាញកណ្ឋាភរណឥស្សរិយយសដែលធ្វើពីមាសសុទ្ធទម្ងន់ ៩៥២ក្រាម ក្នុងនោះ មានមេដាយមួយត្រូវបានគេឆ្លាក់ឈ្មោះរបស់លោក Hollande។
បន្ទាប់មកទៀត លោក Hollande ក៏បានថ្លែងសុន្ទរកថាលើកដំបូង ក្នុងនាមជាប្រធានាធិបតី។ នៅក្នុងសុន្ទរកថារយៈពេលខ្លី លោក Hollande បានបញ្ជាក់ពីតួនាទីរបស់ប្រធានាធិបតីក្នុងការបង្រួបបង្រួមប្រជាពលរដ្ឋបារំាងគ្រប់ស្រទាប់វណ្ណៈ ដោយគ្មានការរើសអើង។ ទន្ទឹមគ្នានេះ លោក Hollande ក៏បានទទួលស្គាល់ផងដែរ ពីបន្ទុកធ្ងន់ៗជាច្រើន ដែលប្រទេសបារំាងត្រូវប្រឈម រួមមាន ការកាត់បន្ថយប្រាក់បំណុល ការកាត់បន្ថយចំនួនអ្នកអត់ការងារធ្វើ និងការលើកស្ទួយកំណើនសេដ្ឋកិច្ច។ ក្រោយពីសុន្ទរកថានោះមក លោក Hollande បានជិះរថយន្ត តាមរុក្ខវិថី Champs-Elysée ទៅកាន់ Arc de Triomphe ដើម្បីគោរពវិញ្ញាណក្ខន្ធចំពោះយុទ្ធជនមិនស្គាល់ឈ្មោះ ដែលបានពលីជីវិតក្នុងសង្រ្គាមលោកលើកទី២។
លោក Hollande ត្រូវនិយាយជម្នះលោកស្រី Merkel
កន្លះម៉ោង ក្រោយពីការបិទបញ្ចប់ពិធីចូលកាន់មុខតំណែងប្រធានាធិបតី លោក François Hollande ត្រូវធ្វើដំណើរទៅកាន់ប្រទេសអាល្លឺម៉ង់ដើម្បីបំពេញទស្សនកិច្ចផ្លូវការលើកទីមួយនៅបរទេស។ នេះជាទំនៀមទម្លាប់មួយរវាងបារំាង និងអាល្លឺម៉ងដែលប្រមុខរដ្ឋថ្មីត្រូវផ្តើមទស្សនកិច្ចដំបូងទៅវិញ ទៅមក។ ម្យ៉ាងទៀត ដំណើរទស្សនកិច្ចនោះត្រូវតែធ្វើឡើងក្នុងថ្ងៃធ្វើសច្ចាប្រណិធានចូលកាន់តំណែងតែម្តង។
គួរជម្រាបជូនថា បារំាង និងអាល្លឺម៉ង់ ជាប្រទេសស្ថាបនិកសហភាពអឺរ៉ុប និងជាក្បាលម៉ាស៊ីនអូសទាញសហភាពអឺរ៉ុប។ ដូច្នេះ វត្តមានរបស់លោក François Hollande នៅក្នុងប្រទេសអាល្លឺម៉ង់ពេលនេះ គឺជាការសម្តែង ការគួរសម និងដើម្បីជជែកពីសំណុំរឿងសំខាន់ៗមួយចំនួន ពាក់ព័ន្ធនឹងសហភាពអឺរ៉ុប ក៏ដូចជានៅក្នុងពិភពលោក។ តែនៅចំពោះមុខ ការខ្វែងគំនិតគ្នាបានកើតមានរួចហើយ រវាងលោកប្រធានាធិបតីបារំាងថ្មី François Hollande និងលោកស្រីនាយករដ្ឋមន្រ្តីអាល្លឺម៉ង់ Angela Merkel។
បំណងប្រាថ្នារបស់លោក Hollande គឺចង់ឲ្យសហភាពអឺរ៉ុបលើកយកសន្ធិសញ្ញាថ្មីស្តីពីថវិកា ទៅជជែកជាថ្មីឡើងវិញ គឺជាសន្ធិសញ្ញាថ្មីដែលសមាជិកអឺរ៉ុបទើបបានអនុម័ត កាលពីដើមឆ្នំា ២០១២ និងដែលបានបង្ខំប្រទេសសមាជិកនីមួយៗ ឲ្យចាយវាយត្បិតត្បៀតក្នុងការកាត់បន្ថយប្រាក់បំណុល។ តែលោកស្រី Merkel មិនយល់ព្រម។ ដូច្នេះ លោក Hollande ចំាបាច់ត្រូវតែនិយាយជម្នះលោកស្រី Merkel ដែលនេះ មិនមែនជាការងាយទេ។ យ៉ាងណាក៏ដោយ ទោះបីជាថ្នាក់ដឹកនំាទំាងពីរនាក់មានការយល់ឃើញខុសគ្នាក៏ដោយ ក៏អាទិភាពមានតែមួយដូចគ្នា គឺបញ្ចប់វិបត្តិប្រាក់បំណុលនៅក្នុងតំបន់ និងផ្តល់សន្ទុះកំណើនសេដ្ឋកិច្ចឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ