បារាំងគ្រោងដាក់ច្បាប់ពិន័យអតិថិជនផ្លូវភេទ
ចុះផ្សាយនៅថ្ងៃ៖
ស្តាប់ - ០៤:០៨
ចាប់ពីថ្ងៃពុធ សម្រាប់ពេញមួយសប្តាហ៍ សភាបារាំងបាននិងកំពុងពិនិត្យមើលសំណើច្បាប់ពេស្យាចារ។ សំណើច្បាប់នេះគ្រោងនឹងដាក់ទណ្ឌកម្ម តាមរយៈការបង់ប្រាក់ពិន័យ លើគ្រប់បុគ្គល (អតិថិជន)ណាដែលទៅរកកំសាន្តស្រីពេស្យា មិនមែនពិន័យស្ត្រីពេស្យាទេ។ សមាគមស្ត្រី បានប្រកាសស្វាគមន៍គម្រោងច្បាប់នេះ ដោយឈរលើទស្សនៈសីលធម៌ និងការគោរពសិទ្ធិមនុស្ស។ ប៉ុន្តែក្នុងផ្នែកនយោបាយវិញ ដូចជាប្រធានបទសង្គមផ្សេងៗទៀតដែរ គ្មានទេជំហរស្តាំ ឬជំហរឆ្វេង ជាលក្ខណៈបក្ស គឺមានតែអ្នកគាំទ្រ និងអ្នកប្រឆាំងតែប៉ុណ្ណោះ។ តើគម្រោងច្បាប់ពេស្យាចារការពារអ្នករកស៊ីលក់ខ្លួន យ៉ាងណាខ្លះ ? និងពិន័យអតិថិជន ផ្លូវភេទ យ៉ាងដូចម្តេច ?
ការរកស៊ីផ្លូវភេទជារបរគ្មានដើមដ៏ចំណាស់ជាងគេនៅលើពិភពលោក ! នៅអឺរ៉ុប មានជាអាទិ៍ប្រទេសហូឡង់ បែលហ្សិក អាល្លឺម៉ង់ ស្វីស អូទ្រីស្ត ឬក្រិក ពេស្យាចារជារបបដែលអនុញ្ញាតដោយច្បាប់ និងការពារដោយច្បាប់។ ប៉ុន្តែនៅអឺរ៉ុបខាងជើងវិញ (ន័រវេស ស៊ុយអែត និងហ្វាំងឡង់) ការរកស៊ីផ្លូវភេទជាទង្វើហាមឃាត់ ! ចំណែកនៅក្នុងប្រទេសមួយចំនួនទៀត ដូចជាអង់គ្លេស អៀរឡង់ ប៉ូឡូញ ឆែក អេស្ប៉ាញ ព័រទុយហ្កាល់ អ៊ីតាលី និងបារាំង ពេស្យាចារជារបរស្របច្បាប់ តែមានបម្រាម និងលក្ខខណ្ឌត្រូវគោរពច្រើន។
ទោះហាមឃាត់ ឬអនុញ្ញាតដោយមានកំរិតយ៉ាងណាក្តី ក៏សកម្មភាពរកស៊ីផ្លូវភេទ នៅតែត្រូវបានគេចាត់ទុកថាជាអំពើហិង្សា និងតែងត្រូវបានឈ្មួញគេងយកចំណេញ យកធ្វើជាការជួញដូរ ដូច្នេះការប្រយុទ្ធប្រឆាំង ក៏កាន់តែតឹងរ៉ឹង ហើយគឺក្នុងន័យនេះឯងដែលរដ្ឋាភិបាលបារាំងចង់បង្កើតច្បាប់ដាក់ទណ្ឌកម្មអ្នកប្រព្រឹត្តផ្លូវភេទ ប៉ុន្តែមិនដាក់លើស្ត្រីអ្នករកស៊ីទេ គឺដាក់ទោសលើអតិថិជនអ្នកទៅរកស្រីផ្កាមាស ដោយដោះដូរជាទឹកប្រាក់។ ការទិញសេវាផ្លូវភេទ គឺជារឿងខុសច្បាប់ អាចចាត់ទុកថាជាយុទ្ធសាស្ត្រថ្មី និងដំបូង ដែលរដ្ឋាភិបាលជ្រើសរើសយកមកអនុវត្ត ដើម្បីពង្រឹងការប្រយុទ្ធប្រឆាំងនឹងការជួញដូរផ្លូវភេទ។ សម្រាប់អ្នកតាក់តែងសំណើច្បាប់ ការដាក់ទោសលើអ្នកទៅរកការសប្បាយតាមផ្លូវភេទ ដោយប្រើលុយទិញដូរ គឺដើម្បីប្តូរទស្សនវិស័យ និងការវាយតម្លៃលើស្ត្រីលក់ខ្លួន ថាមិនមែនជាជនមានទោសទេ តែជាជនរងគ្រោះ។
សំណើច្បាប់ដែលសភានឹងចាប់ផ្តើមពិនិត្យពិភាក្សានៅសប្តាហ៍នេះ គ្រោងផាកពិន័យអតិថិជនផ្លូវភេទ ជាប្រាក់ ១៥០០អឺរ៉ូ និងឡើងទ្វេដង ក្នុងករណីអតិថិជនធ្លាប់បានប្រព្រឹត្តកំហុសដដែលៗ។ កម្មសិក្សាអប់រំ នៅតាមសមាគម សហគមន៍នឹងត្រូវរៀបចំឡើង ដុចធ្វើយុទ្ធនាការឃោសនាសុវត្ថិភាពចរាចរណ៍ដូច្នោះ ដើម្បីបំផុសបំផុលគ្រប់គ្នាបានយល់ពីទណ្ឌកម្មដែលអាចធ្លាក់មកលើជនស្វែងរកល្បែងផ្លូវភេទតាមថ្នល់។
ទន្ទឹមគ្នានេះដែរ ការដាក់ទោសលើស្ត្រីពេស្យាឱ្យជាប់ពន្ធនាគារអាចដល់ពីរឆ្នាំ ពីបទទៅតោងទាក់ទាញហៅភ្ញៀវ តាមទីសាធារណៈ (ច្បាប់២០០៣) នឹងរំលាយចោល។ ពីព្រោះវិធានការនេះ បានបង្កើនគ្រោះហានិភ័យច្រើនដល់អ្នកលក់ខ្លួន ដោយបង្ខំចិត្តគេចខ្លួនទៅរកទីឆ្ងាយកំបាំងពីភ្នែកប៉ូលិស។ ទាក់ទងនឹងស្ត្រីពេស្យាផ្ទាល់តែម្តងនេះដដែល នឹងមាន ប្រព័ន្ធជួយនាំផ្លូវឱ្យស្ត្រីដើរចេញពីទីផ្សារលក់ភេទ ដោយត្រឡប់ចូលក្នុងសង្គមមនុស្សសាមញ្ញ តាមរយៈការផ្តល់វគ្គបំពាក់បំប៉នឯកទេស ផ្តល់សិទ្ធិរស់នៅក្នុងទឹកដីបារាំងជាបណ្តោះអាសន្ន និងផ្តល់ជំនួយហិរញ្ញវត្ថុ។ កញ្ចប់ថវិកាជំនួយដែលមានតម្លៃប្រមាណពី១០ ទៅ២០លានអឺរ៉ូក្នុងមួយឆ្នាំៗ។
បើនិយាយពីការរកស៊ីផ្លូវភេទ មិនមែនសំដៅតែលើស្ត្រីឈរតាមចិញ្ចើមថ្នល់ប៉ុណ្ណោះទេ។ ចំណែកដ៏សំខាន់មួយទៀត ដែលច្បាប់ត្រូវដាក់ទោសដែរនោះ គឺការរកស៊ីតាមប្រព័ន្ធអ៊ីនធឺណែត។ វេបសៃតិ៍មកពីបរទេសពិបាកនឹងបង្ខំឱ្យសម្របតាមច្បាប់បារាំង តែអ្នកផ្គត់ផ្គង់អ៊ីនធឺណែតមានកាតព្វកិច្ចទប់ស្កាត់មិនឱ្យមានសេវានេះ។ អតិថិជនប្រើប្រាស់បណ្តាញជួញដូរផ្លូវភេទតាមអ៊ីនធឺណែត អាចនឹងចាប់ដានបាន ហើយដាក់ទណ្ឌកម្ម។
គម្រោងច្បាប់នេះ បង្កើតឡើងក្នុងបំណងចង់ការពារស្ត្រី ការពារអ្នករកស៊ីផ្លូវភេទ ដែលគេចាត់ទុកថាជាអំពើហិង្សាមួយ។ ប៉ុន្តែក្រុមពេស្យាឯករាជ្យមិនសប្បាយចិត្តទេ ច្បាប់នេះអាចនឹងធ្វើភ្ញៀវរត់។ សម្រាប់សមាគមការពារការលក់ភេទ ការដាក់ទោសអតិថិជន គឺជាបង្កើនបញ្ចេញងងឹត រកស៊ីកាន់តែលាក់លៀម កាន់ហិង្សា ។ រហូតមកទល់ពេលនេះ គ្មានទេចំនួនពិតប្រាកដ អាជ្ញាធរបារាំងប៉ាន់ប្រមាណថាមានស្រីពេស្យាប្រមាណពី២ម៉ឺនទៅបួនម៉ឺននាក់ តែក្រុមសហជីពថាមានដល់ទៅជាង១០ម៉ឺននាក់។ ពួកគេភាគច្រើនជាស្ត្រី មកពីអឺរ៉ុបខាងកើតរ៉ូមានី អាហ្វ្រិកនីហ្សេរីយ៉ា ឬចិន។ ក្នុងនោះមានតែ១០ភាគរយប៉ុណ្ណោះដែលរកស៊ីដោយឯករាជ្យ។
ច្បាប់ការពារស្ត្រីពេស្យា ចុះមានគិតគូរអ្នកគ្មានដៃគូដែរឬទេ ? នេះជាសំណួរមួយដែលក្រុមបុរសមួយចំនួនបានចោទសួរ ព្រោះពេលខ្លះប៉ះពាល់ខ្លាំងណាស់ដល់សេរីភាពផ្នែកតណ្ហារបស់មនុស្ស។ តើគេត្រូវការច្បាប់សម្រាប់កំណត់ចំណង់និងសេចក្តីត្រូវការតណ្ហាដែរឬ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ