តើអតីតប្រធានាធីបតីបារាំង នីកូឡា សាកូហ្ស៊ី អាចត្រឡប់មកឡើងឆាកនយោបាយបានឬទេ ?
ចុះផ្សាយនៅថ្ងៃ៖
ស្តាប់ - ០៤:២៤
ទោះមិនបានជាប់ឆ្នោតនៅអាណត្តិទីពីរ និងទោះជាមានជាប់ចោទនៅតុលាការជាច្រើនករណីក៏ករណីក៏ដោយ ក៏លោកនីកូឡា សាកូហ្ស៊ី មិនដែលបោះបង់មហិច្ឆតាចូលល្បងក្នុងឆាកនយោបាយប្រកួតប្រជែងយកតួនាទីជាប្រធានាធិបតីបារាំងជាថ្មីទេ។ នៅថ្ងៃអង្គារទី ១៦កុម្ភៈ នេះ លោកអតីតប្រធានាធិបតីបារាំង លោក នីកូឡា សាកូហ្ស៊ី ត្រូវបានជាប់ចោទ ក្នុងសំណុំរឿងថ្មីមួយ ទាក់ទងនឹងការចំណាយខុសច្បាប់ក្នុងពេលធ្វើយុទ្ធនាការឃោសនាបោះឆ្នោត ឆ្នាំ ២០១២។ តើការជាប់រឿងក្តីនៅតុលាការអាចនឹងក្លាយជាឧបសគ្គ រាំងស្ទះដំណើរវិលត្រលប់មកកាន់សង្វៀននយោបាយដែរឬទេ ?
ឈ្មោះអតីតប្រធានាធិបតី និងជាប្រធានបក្សសាធារណរដ្ឋបច្ចប្បន្ននេះ មានចុះនៅក្នុងបញ្ជីសំណុំរឿង នៅតុលាការមិនតិចជាង៦ករណីទេ ក្នុងនោះភាគច្រើន មានជាប់ពាក់ព័ន្ធនឹងសំណុំរឿង ចំណាយខុសច្បាប់ក្នុងពេលឃោសនាបោះឆ្នោតឆ្នាំ២០១២ ឬហៅខ្លីថាសំណុំរឿង Bygmalion។
លោក នីកូឡា សាកូហ្ស៊ី ជាប្រមុខរដ្ឋដំបូងគេ ក្នុងប្រវត្តិសាស្ត្រប្រទេសបារាំង សម័យសាធារណរដ្ឋ ដែលត្រូវបានឃាត់ខ្លួននៅពេលផុតតំណែង ដល់ទៅ ១៥ម៉ោងយកទៅសួរចម្លើយនោះ ! ប៉ុន្តែនេះមិនមែនជាលើកទីមួយទេ ដែលលោក នីកូឡា សាកូហ្ស៊ី ត្រូវតុលាការចោទប្រកាន់នោះ។ កាលពីឆ្នាំ២០១៣ លោកសាកូហ្ស៊ី បានធ្លាប់ជាប់ចោទប្រើអំណាច យកចំណេញពីភាពទន់ខ្សោយរបស់មនុស្សចាស់ ជាមហាសេដ្ឋីលេខមួយរបស់បារាំង លោកស្រី បេតង់គួរម្តងរូចហើយ មុននឹងត្រូវលាងជម្រះ តុលាការដកការចោទប្រកាន់វិញ។
នៅមានសំណុំរឿងតុលាការជាច្រើនទៀត ដែលអាចបង្អាក់ផ្លូវនយោបាយ និងដែលកំពុងរង់ចាំស្វាគមន៍លោក ដូចជា សំណុំរឿងលោក នីកូឡា សាកូហ្ស៊ី ទទួលប្រាក់ឧបត្ថម្ភពីអតីតមេដឹកនាំផ្តាច់ការលីប៊ី កាដាហ្វ៊ី យកមកបម្រើប្រយោជន៍ឃោសនានយោបាយ ឆ្នាំ២០០៧ រហូតបានឈ្នះ ក្លាយជាប្រធានាធិបតី- សំណុំរឿងលក់អាវុធ ដែលមានឈ្មោះថា ការ៉ាឈី- សំណុំរឿងជម្លោះការពារផលប្រយោជន៍រវាងពាណិជ្ជករឈ្មោះ Bernard Tapie ជាមួយធនាគារ Credit Lyonnais ដែលឈ្មោះលោកសាកូហ្ស៊ីចូលទៅប្រលូកប្រលាក់ រហូតទំនងបានធ្វើឱ្យបង់បា្រក់រដ្ឋបារាំងផង។
សំណុំរឿងដែលទំនងជាមានគ្រោះខ្លាំងជាងគេមួយទៀត និងទើបធ្លាក់ប៉ះលោកនីកូឡា សាកូហ្ស៊ី នៅពេលនេះ គឺសំណុំរឿង វិក័យប័ត្របន្លំ។ សំណុំរឿងមួយនេះ បានបែកធ្លាយធ្វើឱ្យបក្សស្តាំនិយម UMP ជាបក្សប្រឆាំង បែកខ្ទាត់ខ្ចាយ ប្រធានបក្សខ្ទាតចេញតំណែង តាំងពីជាមួយឆ្នាំមកហើយ។ បក្សត្រូវខ្ទេចខ្ទាំ ទើបត្រូវបានប្រសិទ្ធិនាមថ្មី នាបច្ចុប្បន្ននេះថាជា បក្សសាធារណរដ្ឋ ដោយមានលោកនីកូឡា សាកូហ្ស៊ី ជាប្រធាន។
តួនាទីជាប្រធានបក្ស ដែលជាដំណាក់កាលចាំបាច់មួយមុននឹងឈានដល់ការឈរឈ្មោះជាបេក្ខជន ប្រធានាធិបតី សម្រាប់ឆ្នាំ២០១៧ បានសម្រេច ប៉ុន្តែឥលូវត្រូវជាប់រឿងក្តីមួយទៀត !
បន្ទាប់ត្រូវបានតុលាការចោទប្រកាន់ ពីបទពុករលួយ លោកនីកូឡា សាកូហ្ស៊ី ពេលនេះត្រូជាប់ចោទ ទាក់ទងនឹងចំណាយខុសច្បាប់ពេលឃោសនាបោះឆ្នោតប្រធានាធិបតីឆ្នាំ២០១២។ តើធ្វើម្តេចនឹងងើបមុខ ដើរចូលសង្វៀននយោបាយបានកើតទៅ ?! សកម្មជនខ្លះដែលគាំទ្រនិងស្មោះស្ម័គ្រចំពោះអតីតប្រធានាធិបតី យល់ថាវាដូចជាចៃដន្យជ្រុលដែលតុលាការធ្វើចោទប្រកាន់លោកសាកូស៊ី នៅពេលនេះ។ ការចោទប្រកាន់របស់តុលាការគ្រាន់តែជាការចាប់ផ្តើមប៉ុណ្ណោះ ដូច្នេះវាពិតជាលំបាកខ្លាំងណាស់ សម្រាប់លោកនីកូឡា សាកូហ្ស៊ី ក្នុងងើបឈរក្នុងស្ថានភាពប្រឈមបែបនេះនោះ។
ទំនុកចិត្តប្រាកដជាធ្លាក់ចុះ សម្រាប់ក្រសែភ្នែកសកម្មជនបក្ស ព្រោះអសន្តិសុខមានច្រើនជុំវិញខ្លួនលោកនីកូឡា សាកូហ្ស៊ី ពោលគឺលោកក្លាយជាបេក្ខជនមានគ្រោះភ័យច្រើនជាប់ខ្លួន អាចនឹងត្រូវតុលាការកាត់ទោស អាចនឹងជាប់ទោស ព្រោះគ្មានអភ័យឯកសិទ្ធិប្រធានាធិបតីការពារទៀតទេ។
ម្យ៉ាងវិញទៀត នៅក្នុងជួរបក្សគ្មានឥស្សរជនផ្សេងទៀត មានមហិច្ឆតាចង់ក្លាយជាប្រធានាធិបតីបារាំងទេឬ ? មាន ! ហើយពួកគេសុទ្ធតែមានប្រជាប្រិយភាពខ្ពស់ជាងលោកនីកូឡា សាកូហ្ស៊ីទៀតនាពេលនេះ។ មួយរយៈក្រោយនេះ លោកសាកូហ្ស៊ី កាន់តែឯកា សូម្បីមនុស្សជំនិតក្នុងបក្សក៏ផ្តើមព្រលែងដៃពីលោក និងសូវបង្ហាញភាពស្មោះស្ម័គ គោរពគាំទ្រដូចពីមុនទេ ព្រោះត្រូវការចង់ក្លាយជាប្រធានាធិបតីដែរ។
ដូច្នេះសំណុំរឿងតុលាការនេះ មិនមែនជាអំណោយល្អ តែជាការដាក់បន្ទុកបន្ថែម សម្រាប់លោកសាកូហ្ស៊ីទេ ក្នុងការសម្រេចបំណងក្លាយជាបេក្ខជនប្រធានាធិបតី។ បើទោះបីជាបក្សភឿនតិចតួចនៅសេសសល់ ខំបន្លំបកស្រាយសម្រួលបញ្ហាថា ការចោទប្រកាន់មិនមែនមានន័យថាជាប់ទោសទេ។ ហើយបើតាមភាសារបស់មេធាវី ការចោទប្រកាន់ ព្រោះចំណាយច្រើនខុសច្បាប់ ក្នុងពេលឃោសនាបោះឆ្នោត គ្មានអ្វីជាការធ្ងន់ធ្ងរសោះ ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ