សង្គ្រាមដណ្តើមអំណាចក្នុងបក្សកំពុងក្លាយជារឿងអាស្រូវរដ្ឋ ?!
ចុះផ្សាយនៅថ្ងៃ៖
ស្តាប់ - ០៤:៤៩
សង្គ្រាមនយោបាយ សង្គ្រាមដណ្តើមអំណាចគ្នា ហែកហួរក្នុងបក្ស ក្នុងរដ្ឋាភិបាល ... មានមិនចេះមិនចេះហើយនៅប្រទេសបារាំង ! នៅចុងសប្តាហ៍នេះ រឿងអាស្រូវមួយថ្មីទៀតទើបបានផ្ទុះឡើង ដែលស្ទើរតែក្លាយទៅជារឿងអាស្រូវរដ្ឋ។ អតីតនាយករដ្ឋមន្ត្រីពីឆ្នាំ២០០៧-២០១២ លោកហ្វ្រង់ហ្វីយ៉ុង បានទៅពឹងពាក់វិមានប្រធានាធិបតី អេលីហ្សេ ឱ្យជួយកម្ចាត់គូប្រជែង លោកនីកូឡាសាកូហ្ស៊ី តាមផ្លូវតុលាការ ! នេះបើតាមអ្នកកាសែតរបស់សារព័ត៌មានឡឺម៉ុង(Le Monde) ដែលបានទម្លាយព័ត៌មានតាមរយៈការចេញលក់សៀវភៅមានចំណងជើងថា “Sarko se tue”។ តើលោកហ្វ្រង់ស័រហ្វីយ៉ុង (François Fillon) ពិតជាបានស្វែងរកអន្តរាគមន៍ខាងក្រៅដើម្បីកម្ចាត់គ្នាឯងមែនឬយ៉ាងណា ? តើនរណាជាអ្នករងផលវិបាកនៃរឿងអាស្រូវនេះខ្លាំងគេ ?
បើតាមកាសែតឯករាជ្យ ឡឺម៉ុង លោក ហ្វ្រង់ស័រហ្វីយ៉ុង (François Fillon) អតីតនាយករដ្ឋមន្ត្រីបារាំង សម័យបារាំងដឹកនាំដោយលោកនីកូឡា សាកូហ្ស៊ី ដែលបានបង្ហាញចេតនាចង់ឈរឈ្មោះធ្វើជាបេក្ខជនប្រធានាធិបតីសម្រាប់ការបោះឆ្នោតឆ្នាំ ២០១៧ បានទៅជួបអគ្គលេខាធិការវិមានប្រធានាធិបតីអេលីហ្សេ ឱ្យ បើតាមឃ្លាក្នុងសម្រង់កាសែត “វាយឱ្យប្រហារឱ្យខ្លាំងនិងឱ្យលឿន”។ វាយប្រហារឱ្យបានលឿន បានន័យថាបំបាក់ជើងលោកនីកូឡាសាកូហ្ស៊ី កុំឱ្យត្រលប់ចូលមកប្រជែងក្នុងឆាកនយោបាយវិញទាន់។
រឿងរ៉ាវបានកើតឡើង កាលពីថ្ងៃទី ២៤មិថុនា២០១៤ ពេលដែលគណបក្សស្តាំនិយម UMP ជាគណបក្សប្រឆាំង កំពុងវិលវល់ខ្លាំងនឹងវិបត្តិ Bygmalion លោកហ្វ្រង់ស័រហ្វីយ៉ុង បានស្នើសុំទទួលទានអាហារជាមួយ លោក Jean-Pierre Jouyet ដែលធ្លាប់ជារដ្ឋលេខាធិការទទួលបន្ទុកកិច្ចការអឺរ៉ុបក្រោមបង្គាប់លោក តែបច្ចុប្បន្នជាអគ្គលេខាធិការវិមានអេលីហ្សេ និងជាមនុស្សជំនិតរបស់លោកហ្វ្រង់ស័រហូឡង់ជាប្រធានាធិបតីបច្ចុប្បន្ន។ បើតាមលោកអគ្គលេខាធិការវិមានអេលីហ្សេ លោកហ្វ្រង់ស័រហ្វីយ៉ុង ងុប ខ្លាំងមិនចង់ឃើញលោក នីកូឡា សាកូហ្ស៊ី ត្រលប់មកធ្វើនយោបាយវិញ និងចង់ឱ្យលោកនីកូឡាសាកូហ្ស៊ីទទួលខុសត្រូវដោយផ្ទាល់ខ្លួនសំណុំរឿងចំណាយជ្រុលហួសហេតុពេលឃោសនាឆ្នាំ២០១២ ដែលពេលនេះជាបន្ទុករបស់បក្ស។ តុលាការចាប់ផ្តើមបើកសំណុំរឿងប្រមូលព័ត៌មានហើយតាំងពីចុងឆ្នាំ២០១៣មក ប៉ុន្តែមានសកម្មភាពយឺតមិនទាន់ចិត្ត ទើបលោក ហ្វីយ៉ុង ត្រូវការមកពឹងពាក់វិមានប្រធានាធិបតីឱ្យជួយធ្វើអន្តរាគមន៍ ជំរុញតុលាការឱ្យប្រញឹកដៃឡើង។ ប៉ុន្តែប្រព័ន្ធតុលាការជាអំណាចឯករាជ្យ ប្រធានាធិបតីមិនត្រូវការលូកដៃឡើយ ! នេះជាចម្លើយតបរបស់លោកអគ្គលេខាធិការវិមានអេលីហ្សេ ដែលកាសែតឡឺម៉ុងប្រមូលបាន។
ប៉ុន្តែបើតាមលោកហ្វីយ៉ុង ដែលបានចេញមុខការពារខ្លួនតាមគ្រប់មធ្យោបាយ បានទទួលស្គាល់ថាបានជួបបរិភោគអាហារថ្ងៃត្រង់ជាមួយអគ្គលេខាធិការវិមានអេលីហ្សេមែនតែមិនបាននិយាយពឹងពាក់អ្វី ដើម្បីប្រឆាំងនឹងលោកនីកូឡាសាកូហ្ស៊ីឡើយ។ លោកធ្វើនយោបាយយូរហើយ មិនត្រូវការឡើយប្រើល្បិចបែបនេះ ហើយលោកក៏គ្មាននិស្ស័យបែបអសីលធម៌ដែរ មនុស្សទីបីទទួលទានអាហារជាមួយអាចធ្វើជាសាក្សីបាន។ មែន ! បើតាមសាក្សី ជាបុគ្គលទីបីក្នុងជំនួបនៅតុបាយនោះ លោកហ្វីយ៉ុងមិនបាននិយាយអំពីនយោបាយ និងកាន់តែគ្មានទៀតនយោបាយផ្ទៃក្នុងបក្ស ជាមួយJean-Pierre Jouyet ដែលជាអញ្ជើញទេ។
គិតត្រឹមណេះ លោកហ្វ្រង់ស័រហ្វីយ៉ុង អាចទប់ជំហរបាន ប៉ុន្តែភាពជឿជាក់លើរូបលោក បានរបូតចេញបាត់ទៅហើយ ! ក្តីស្រមៃចង់ក្លាយជាប្រធានាធិបតីបារាំង សឹងថារលាយបាត់ដូចទឹកកកត្រូវថ្ងៃ ព្រោះមួយរយៈចុងក្រោយនេះ ការគាំទ្របេក្ខភាពលោកហ្វីយ៉ុងបានធ្លាក់ចុះជាលំដាប់ បូកជាមួយរឿងអាស្រូវនេះទៀត ដែលការពិតមិនដឹងជាយ៉ាងណា ព្រោះមានតែសម្តីទល់នឹងសម្តីប៉ុណ្ណោះ ដូច្នេះសកម្មជនបក្ស ក៏ដូចជាពលរដ្ឋបារាំងពិតជាកើតមានគំនិតសង្ស័យថាលោកហ្វីយ៉ុងអាចចងសម្ព័ន្ធភាពជាមួយសត្រូវដើម្បីកម្ចាត់គ្នាឯង។ អ្នកដែលទាញបានផលចំណេញខ្លាំងជាងគេ គឺ លោក អាឡាំង ហ្សូប៉េ (Alain Juppé) ឥស្សរជននយោបាយបក្សUMP ដែលបានប្រកាសឈរឈ្មោះជាបេក្ខជនប្រធានាធិបតី ដែលមិនសូវចេញស្តីនិងសកម្មភាពអ្វីច្រើន។ លោកនីកូឡា សាកូហ្ស៊ី ក៏អាចទាញប្រយោជន៍ខ្លះដែរពីសំណុំរឿងនេះដោយតាំងខ្លួនជាអ្នកអោបក្រសោបទោះកូនចៅខុសក្តីត្រូវក្តី តែសំណុំរឿងតុលាការអាចត្រលប់មកចាប់លោកបានគ្រប់ពេលវេលា។
ការខាតបង់ដ៏ធំមួយទៀត គឺខាងវិមានប្រធានាធិបតី។ ភាពមិនជាក់លាក់ និងមិនចេះទប់សម្តីរបស់ លោក ហ្សង់ព្យែរ ហ្ស៊ូយ៉េ អគ្គលេខាធិការវិមានអេលីហ្សេ បាននិងកំពុងរុញច្រានរដ្ឋាភិបាលដែលអប្រជាប្រិយភាពស្រាប់ ឱ្យជួបការលំបាកកាន់តែខ្លាំង។ ក្រោយពេលធ្លាយរឿងអាស្រូវនេះភ្លាម គណបក្សស្តាំនិយម បានសម្រុកវាយប្រហារអគ្គលេខាធិការវិមានប្រធានាធិបតីទ្វេឡើង និងរាលដាល បំផុសការសង្ស័យថាអាចមានបណ្តាញពិសេសក្នុងរង្វង់អេលីហ្សេ ដើម្បីការពារអំណាចប្រធានាធិបតី ឬដើម្បីធ្វើឱ្យគូប្រជែងបាត់លំនឹង។ ថ្វីបើ តុលាការបារាំង មានឯករាជ្យ ប៉ុន្តែចៀសមិនផុតពីឥទ្ធិពលតិចតួចនៃអំណាច ឬសម្ព័ន្ធភាពទេ ដូច្នេះបើមានស្លាកស្នាមអ្វីបន្តិចបន្តួចថាវិមានប្រធានាធិបតីប្រើអំណាចលើតុលាការ នោះពិតជាឱកាសប្រពៃប្រែក្លាយ រឿងអាស្រូវតូចទៅជាធំសម្រាប់ជាតិទាំងមូលហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ