បារាំងកំពុងវិលវល់រវាងសេរីភាពនៃការបញ្ចេញមតិ និងការញុះញង់ប្រកាន់ពូជសាសន៍
ចុះផ្សាយនៅថ្ងៃ៖
ស្តាប់ - ០៤:១៥
កាលពីថ្ងៃចន្ទទី ៦ មករា រដ្ឋមន្ត្រីក្រសួងមហាផ្ទៃ បានប្រើវិធានការក្តៅ ចេញសារាចរណ៍ ណែនាំដល់ចៅហ្វាយខេត្តទាំងឡាយ សម្រេចហាមឃាត់មិនឱ្យតារាកំប្លែងDieudonné ការសម្តែងសិល្បៈ ក្នុងសាលជូនសាធារណជនទេ។ ព្រោះតារាកំប្លែងរូបនេះ ល្បីខាងប្រើពាក្យពេជន៍ដែលមានលក្ខណៈរើងអើង ប្រកាន់ពូជសាសន៍ ប្រឆាំងនឹងអម្បូរសេមីត (ជាតិអារ៉ាប់ ជ្វីហ្វ-អ៊ីស្រាអែល)។ ថ្វីបើមានអភិបាលក្រុងជាបន្តបន្ទាប់បានសម្រេចហាមឃាត់ការសម្តែងរបស់សិល្បកររូបនេះ ស្របតាមសារាចររបស់ក្រសួងមហាផ្ទៃមែន ប៉ុន្តែការរិះគន់ក៏មានច្រើនក្នុងចំណោមអ្នកនយោបាយ បើឈរលើគោលការណ៍គោរពសិទ្ធិសេរីភាពនៃការបញ្ចេញមតិ។ កំប្លែង ក្លាយជានយោបាយ ! សេរីភាពនែការបញ្ចេញមតិ កំពុងប្រឈមនឹងការគោរពសិទ្ធិមនុស្ស។
"ចៅហ្វាយខេត្ត និងអភិបាលក្រុងទាំងអស់ អាចហាមឃាត់ ការសម្តែងសិល្បៈ គេមិនអាចនិយាយបានទៀតឡើងអំពីសេរីភាព សម្តីរើសអើងប្រឆាំងពូជសាសន៍ ដែលជាការម៉ាក់ងាយ រំលោភភាពថ្លៃថ្នូររបស់មនុស្ស គឺជាចំណែកមួយនាំឱ្យខូចសណ្តាប់ធ្នាប់សង្គម។" នេះហើយជាបុព្វហេតុដែលជំរុញឱ្យរដ្ឋមន្ត្រីក្រសួងមហាផ្ទៃ Manuel Valls ចេញសារាចរ ហាមឃាត់ ការសម្តែងរបស់លោក Dieudonné Mbala Mbala។ គឺមិនធ្លាប់មានទេសារាចរបែបនេះ !
តើ Dieudonné ជានរណា ? Dieudonné សញ្ជាតិបារាំង ឪពុកមានដើមកំណើតកាមឺរ៉ូន និងម្តាយជាបារាំង។ ក្លាយជាតារាកំប្លែង តាំងពីទសវត្សឆ្នាំ១៩៩០ ប៉ុន្តែគ្រាន់តែលេចមុខភ្លាម ពាក្យសម្តីកំប្លែងបែបវាយប្រហាររើសអើងពូជសាសន៍ជី្វហ្វអ៊ីស្រាអែល មានមិនខ្វះ ទាំងពាក្យសម្តី ទាំងកាយវិការ វិទ្យុនិងទូរទស្សន៍មិនដែលអញ្ជើញចូលសម្តែងឡើយ។ ឆាកឈុតកំប្លែងដែលគាត់តាក់តែងសម្តែងឡើង ជារៀងរាល់ឆ្នាំមានផ្សព្វផ្សាយតែក្នុងបណ្តាញអ៊ីនធឺណែត និងសម្តែងក្នុងរោងល្ខោនផ្ទាល់ខ្លួនប៉ុណ្ណោះ។ Dieudonné ត្រូវបានតុលាការកាត់ទោស៩ដងពីបទរើសអើងប្រឆាំងនឹងអម្បូរសេមីត។ ៧បានចប់ជាស្ថាពរ។ ហើយតារាកំប្លែងរូបនេះមិនដែលគោរពសាលក្រមម្តងណាឡើយ។
សម្រាប់លោករដ្ឋមន្ត្រី ម៉ានុយអែល វ៉ាល ដែលទាញសំអាងច្បាប់ពីរឿងក្តីកាលពី ឆ្នាំ១៩៣៣ មានឈ្មោះថា Benjamin (តុលាការសម្រេចឱ្យហាមឃាត់ការសម្តែងសិល្បៈដែលមានគ្រោះថ្នាក់ដល់សណ្តាប់ធ្នាប់សង្គម) គេមិនអាចបណ្តោយឱ្យសិល្បកររូបនេះធ្វើអ្វីហួសហេតុ បានទៀតទេ គេត្រូវតែគិតអំពីផលប៉ះពាល់ដែលបណ្តាលមកពីពាក្យពេចន៍ញុះញង់ឱ្យស្អប់ខ្ពើមប្រកាន់ពូជសាសន៍។ វិធានការនេះមិនមែនជាការបំបិទសេរីភាពផ្នែកសិល្បៈទេ។ បើតាមប្រមុខសាសនាអ៊ីស្រាអែលប្រចាំក្រុងប៉ារីស
"នេះជាវិធានការដែលធានាកុំឱ្យមានការជួបជុំដែលមានលក្ខណៈញុះញុង និងជំរុញឱ្យមានការស្អប់ខ្ពើមគ្នា។ សេចក្តីសម្រេចរបស់រដ្ឋាភិបាលនេះ គឺជាការឱ្យតម្លៃដល់អ្វីដែលជាមូលដ្ឋានគ្រិះរបស់សង្គម។ ពាក្យសម្តីដែលនាំឱ្យមានការស្អប់ខ្ពើមគ្នា ប្រកាន់ពូជសាសន៍ ត្រូវតែកុំឱ្យមានចេញពីមាត់មនុស្សមានឥទ្ធិពលក្នុងប្រព័ន្ធផ្សព្វផ្សាយព័ត៌មានមិនថាជាសិល្បករ កីឡាករ គ្រូបង្រៀន ឬអ្នកសារព័ត៌មានទេ ត្រូវតែដឹងថាពាក្យណាគួរ ពាក្យណាមិនគួរ"។
ប្រទេសបារាំង មានច្បាប់ប្រឆាំងនឹងការរើសអើងពូជសាសន៍ តាំងពីយូរយារណាស់មកហើយ។ ការការពារ ប្រឆាំងនឹងគ្រប់ទម្រង់នៃការម៉ាក់ងាយ រំលោភ រើសអើង បែងចែកពូជសាសន៍ មានចុះក្នុងសេចក្តីថ្លែងការណ៍សិទ្ធិមនុស្ស និងពលរដ្ឋ តាំងពីឆ្នាំ១៧៨៩។ ហើយដើម្បីកំណត់ទិសដៅនយោបាយ ក្នុងប្រយុទ្ធប្រឆាំងនឹងអំពើ ពាក្យសម្តីរើងអើងនេះ បារាំងបានបង្កើតគណៈកម្មការអន្តរក្រសួងដើម្បីប្រយុទ្ធប្រឆាំងនឹងការប្រកាន់ពូជសាសន៍ និងការប្រមាថប្រឆាំងអម្បូរសេមីត។ អម្បូរសេមីត គឺជាក្រុមអម្បូរជាតិអារ៉ាប់ ជាតិជ្វីហ្វ អ៊ីស្រាអែលនិងស៊ីរី។
គេនៅចងចាំបានថា រាល់ពេលដែលមានការនិយាយប៉ះពាល់ដល់អ៊ីស្លាម សង្គ្រាមប៉ាកា និងប្រតិកម្ម ការសងសឹកហិង្សាមានផ្ទុះឡើងជាស្ទើរគ្រប់ទិសទី មិនខុសគ្នានេះដែរបើនិយាយប៉ះពាល់ម៉ាក់ងាយដល់ជនជាតិអ៊ីស្រាអែល ប្រតិកម្មហូរដូចទឹក ចេញពីប្រភពកំពូលរាប់ទាំងរដ្ឋាភិបាលផង ការដាក់ទោសក៏មានជាច្រើនករណីរួចហើយដែរ។ បើតាមច្បាប់ រាល់ទង្វើញុះញង់ឱ្យមានការស្អប់ខ្ពើមប្រកាន់ពូជសាសន៍ នឹងត្រូវបង់ពិន័យរហូតដល់ ៤៥០០០អឺរ៉ូ និងជាប់ទោសក្នុងពន្ធនាគារមួយឆ្នាំ។
ក៏ប៉ុន្តែវិធានការរបស់រដ្ឋាភិបាល មិនបានទទួលការគាំទ្រជាឯកច្ឆ័ន្ទឡើយ សូម្បីតែសកម្មជនអ្នកប្រឆាំងនឹងការប្រកាន់ពូជសាសន៍ ក៏មិនបានឯកភាពនឹងសារាចរនេះដែរ។ ការហាមឃាត់មិនឱ្យអ្នកកំប្លែងឡើងឆាក សឹងថាមិនអាចទប់បានទេ ទោះអ្នកសិល្បករនោះអាក្រក់យ៉ាងណាក៏ដោយ នៅពេលណាដែលសេរីភាពនៃការបញ្ចេញមតិ ត្រូវបានធានាដោយរដ្ឋធម្មនុញ្ញ និងដោយមាត្រាទី១០នៃអនុសញ្ញាសិទ្ធិមនុស្សអឺរ៉ុបនោះ។ មេធាវីរបស់តារាកំប្លែងDieudonné ស្គាល់ច្បាប់នេះច្បាស់ណាស់ ហើយក៏ដឹងអំពីចំណុចខ្សោយនៃរឿងក្តីដែរ។ "គេអាចចោទប្រកាន់និងដាក់ទោសថាមានការប្រើពាក្យប្រកាន់ពូជសាសន៍បាន ដរាបណាឆាកឈុតកំប្លែងត្រូវបានសម្តែងសិន ប៉ុន្តែនេះឆាកមិនទាន់បើកផង ស្រាប់តែមានការហាមឃាត់ទៅហើយ គឺពិតជាអាចត្រូវចាត់ទុកថាជាការរំលោភមូលដ្ឋានគ្រឹះនៃសេរីភាពក្នុងការបញ្ចេញមតិ។" អំណះអំណាងដែលតារាDieudonné ធ្លាប់យកមកការពារខ្លួនប៉ុន្មានឆ្នាំចុងក្រោយនេះ ក្នុងតុលាការរដ្ឋបាលនិងក្រុមប្រឹក្សារដ្ឋ (តុលាការកំពូលរដ្ឋបាល) រហូតបានឈ្នះដល់ទៅ១៥ដង និងបានទទួលសំណងលួងចិត្តវិញទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ