អតីតឯកអគ្គរាជទូតកម្ពុជាប្រចាំប្រ៊ុយណេត្រូវតុលាការផ្តន្ទាទោសរឿងកិបកេងលុយរដ្ឋ
នៅព្រឹកថ្ងៃទី២៥វិច្ឆិកានេះ លោក កោ វណ្ឌី ចៅក្រមជំនុំជម្រះតុលាការក្រុងភ្នំពេញ បានសម្រេចផ្តន្ទាទោសកំបាំងមុខ លោក ណាន់ ស៊ី អតីតឯកអគ្គរាជទូតកម្ពុជា ប្រចាំប្រទេសប្រ៊ុយណេ ដោយដាក់ពន្ធនាគាររយៈពេល ៤ ឆ្នាំ។ លោក ណាន់ស៊ី ជាប់ចោទក្នុងរឿងកិបកេងលុយរដ្ឋជាង ៤ សែនដុល្លារ តាមរយៈការសាងសង់ស្ថានទូតកម្ពុជា នៅប្រទេសប្រ៊ុយណេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
សវនាការកាត់ទោសអ្នកការទូតកម្ពុជា ត្រូវបានធ្វើឡើង កាលពីថ្ងៃទី២ វិច្ឆិកា ឆ្នាំ២០១១។ រហូតដល់ព្រឹកថ្ងៃទី២៥ វិច្ឆិកា ឆ្នាំ២០១១ ចៅក្រមបានប្រកាសសេចក្តីសម្រេចផ្តន្ទាទោសកំបាំងមុខ លោក ណាន់ ស៊ី អតីតឯកអគ្គរាជទូតកម្ពុជា ប្រចាំប្រទេសប្រ៊ុយណេ ដាក់ពន្ធនាគារ ៤ ឆ្នាំ និងពិន័យជាប្រាក់ចំនួន ៨ លានរៀល។ តុលាការ ក៏បានចេញដីកា បង្គាប់ឲ្យប៉ូលិស តាមចាប់ខ្លួន លោក ណាន់ ស៊ី ផងដែរ។
លោក ណាន់ស៊ី ជាប់ចោទក្នុងរឿងកិបកេងលុយរដ្ឋជាង ៤ សែនដុល្លារ តាមរយៈការសាងសង់ស្ថានទូតកម្ពុជា នៅប្រទេសប្រ៊ុយណេ។ តុលាការបានចោទប្រកាន់លោក ណាន់ស៊ី ពីបទកេងយកផលប្រយោជន៍ដោយខុសច្បាប់ ដែលត្រូវផ្តន្ទាទោស តាមក្រមព្រហ្មទណ្ឌថ្មី។
ពាក្យបណ្តឹងក្នុងរឿងក្តីនោះ ធ្វើឡើងដោយក្រសួងការបរទេសកម្ពុជា ប្តឹងចោទប្រកាន់លោក ណាន់ ស៊ី អតីតឯកអគ្គរាជទូតកម្ពុជា ប្រចាំប្រទេសប្រ៊ុយណេ ដែលមកពីគណបក្សហ្វ៊ុនស៊ិនប៉ិច។
ក្រោយពីស្តាប់សេចក្តីសម្រេចរបស់តុលាការ នៅព្រឹកមិញ លោក គី តិច មេធាវីរបស់ក្រសួងការបរទេស បានលើកឡើងថា ការសម្រេចរបស់តុលាការ ធ្វើឡើងត្រឹមត្រូវតាមច្បាប់ ដែលលោកអាចទទួលយកបាន។ លោកមេធាវីគីតិច ក៏បានលើកឡើងពីពាក្យបណ្តឹងមួយផ្សេងទៀត ប្រឆាំងលោក ណាន់ ស៊ី ដែលជាការប្តឹងទៅកាន់តុលាការភ្នំពេញ ដើម្បីទាមទារឲ្យលោកណាន់ស៊ី សងលុយ ដែលកិបកេងជាង ៤ សែនដុល្លារ តាមរយៈការសាងសង់ស្ថានទូតកម្ពុជា នៅប្រទេសប្រ៊ុយណេ។
មិនទាន់មានអត្ថាធិប្បាយពីលោកណាន់ស៊ី ចំពោះការចោទប្រកាន់នេះនៅឡើយទេ។ រីឯលោក កែវ យ៉ា មេធាវីការពារក្តីឲ្យលោកណាន់ស៊ី ក៏មិនទាន់បញ្ចេញប្រតិកម្មចំពោះការសម្រេចរបស់តុលាការនៅឡើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ