តុលាការយោធាកាត់ទោសអតីតឧត្តមសេនីយ៍រឿងរើសទ័ពរំលំរដ្ឋាភិបាល
នៅព្រឹកថ្ងៃទី២៧តុលានេះ តុលាការយោធា បានបើកសវនាការ កាត់ទោសអតីតឧត្តមសេនីយ៍ និងបក្ខពួក សរុប ៥ នាក់ ក្នុងបទចោទប្រកាន់ជាច្រើន ពាក់ព័ន្ធនឹងការជ្រើសរើសកងទ័ពខុសច្បាប់ ដើម្បីផ្តួលរំលំរដ្ឋាភិបាលកម្ពុជា។ សេចក្តីសម្រេចលើរឿងក្តីនេះ នឹងត្រូវប្រកាស នាថ្ងៃទី៣វិច្ឆិកា។ ដោយឡែកនៅតុលាការក្រុងភ្នំពេញ នៅព្រឹកមិញ ចៅក្រមបានសម្រេចផ្តន្ទាទោសបុរស ៦ នាក់ ដាក់ពន្ធនាគារពី ១៥ ឆ្នាំ ទៅ ១៦ ឆ្នាំ ក្នុងសំណុំរឿងបង្កើតកងកម្លាំងខុសច្បាប់ ដើម្បីផ្តួលរំលំរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
បុរស ៥ នាក់ ក្នុងរឿងក្តីជ្រើសរើសកងទ័ពប្រឆាំងរដ្ឋាភិបាល រួមមានឧត្តមសេនីយ៍ត្រី លោក សាមិត្ត វិរៈ ត្រូវបានតុលាការយោធាកាត់ទោសរួមគ្នា នៅថ្ងៃព្រហស្បតិ៍ ទី២៧តុលានេះ។ តុលាការយោធាបានចោទប្រកាន់អ្នកទាំង៥ ពីបទល្មើសជាច្រើន រួមមាន ការញុះញង់ការប្រើប្រាស់ និងរក្សាទុកអាវុធខុសច្បាប់ ជ្រើសរើសកងកម្លាំងប្រដាប់អាវុធខុសច្បាប់ និងប៉ុនប៉ងផ្តួលរំលំរដ្ឋាភិបាល។
ក្នុងសវនាការ ដែលបានបញ្ចប់កាលពីប៉ុន្មានម៉ោងមុននេះ មានសាក្សីដាក់បន្ទុកចំនួន ៨ នាក់ បានចូលឆ្លើយបំភ្លឺ។ សាក្សីម្នាក់បានលើកឡើងថា បុរសជាប់ចោទទាំង៥ មានពាក់ព័ន្ធនឹងមេបក្សប្រឆាំង ដោយមានការសន្យាថា នៅពេលផ្តួលរំលំរដ្ឋាភិបាលកម្ពុជារួចហើយ អតីតឧត្តមសេនីយ៍ត្រី សាមិត្ត វិរៈ នឹងត្រូវតែងតាំងជាឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ។ រឿងក្តីនេះ នឹងត្រូវចៅក្រមតុលាការយោធាប្រកាសសេចក្តីសម្រេច នៅព្រឹកថ្ងៃទី៣វិច្ឆិកា។
ក្នុងសំណុំរឿងបង្កើតកងកម្លាំងប្រដាប់អាវុធប្រឆាំងរដ្ឋាភិបាលនេះ ចៅក្រមតុលាការក្រុងភ្នំពេញក៏ប្រកាសសាលក្រមសម្រេចផ្តន្ទាទោសបុរស ៦នាក់ ជាកម្មករ និងកសិករ ដាក់ពន្ធនាគារពី ១៥ ឆ្នាំ ទៅ ១៦ ឆ្នាំក្នុងម្នាក់ៗ។
យោងតាមចៅក្រម បុរស ទាំង៦នាក់ ដែលបានផ្តន្ទាទោសនោះ ស្ថិតក្នុងក្រុមចលនាសុវណ្ណភូមិ ដែលបានផ្តាច់ខ្លួនចេញពីចលនាមហានគរ កាលពីឆ្នាំ២០០៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ