រដ្ឋាភិបាលភូមា ធ្វើការសុំទោសព្រះសង្ឃ ចំពោះអំពើហឹង្សាដែលកើតមានឡើងលើព្រះសង្ឃ
យោងតាម សារព័ត៌មានប្រចាំថ្ងៃមួយ របស់ភូមាដែលចេញផ្សាយនៅថ្ងៃសៅរ៍នេះ រដ្ឋាភិបាលភូមា បានធ្វើការសុំទោសព្រះសង្ឃ ចំពោះអំពើហឹង្សាក្នុងការបង្ក្រាបបាតុកម្មប្រឆាំង ការដ្ឋានរ៉ែ របស់ក្រុមហ៊ុនចិន កាលពីចុងខែ វិច្ឆិកាមុន ដែលបានបង្កអោយ មានព្រះសង្ឃរបួស ជិត១០០ អង្គ។ ព្រះសង្ឃជាច្រើនអង្គ បានសំដែងការស្វាគមន៍ ដល់ការសុំទោសនេះ ប៉ុន្តែ បានសុំអោយរដ្ឋាភិបាល ធ្វើការសុំទោសដោយផ្ទាល់ ចំពោះព្រះសង្ឃគ្រប់អង្គដែលរងរបួស។ នៅថ្ងៃសោរ៍នេះ មនុស្សប្រហែលជា ២០០នាក់ ធើ្វកូដកម្ម សាជាថ្មី ប្រឆាំងនឹងការបង្ក្រាបហឹង្សានេះ ក្នុងនោះមានព្រះសង្ឃ៤០អង្គចូលរួមផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៦
រដ្ឋមន្ត្រី ក្រសួងធម្មការនិងសាសនា ភូមា លោក Myint Maung បានប្រាប់កាសែតប្រចាំថ្ងៃ New Light of Myanmar របស់ភូមា នៅថ្ងៃសោរ៍នេះ ថា ព្រឹតិ្តការណ៍ដែលបណ្តាលអោយមាន ព្រះសង្ឃរបួស ៩៩អង្គ និង មនុស្ស១១ នាក់ទៀតរបួស គឺធ្វើអោយរដ្ឋាភិបាល មានការឈឺចាប់ផ្សារខ្លាំង។ លោក Myint Maung បានបន្ថែមថា រដ្ឋាភិបាល បាន សុំទោសព្រះសង្ឃដែលរងគ្រោះក្នុងអំពើបាតុកម្មកាលពីខែ វិច្ឆិកា ហើយបានបរិហារ អជ្ញាធរខ្លួន ថាគ្មានសមត្ថភាពក្នុងការងារ។
កាលពី ចុងខែវិច្ឆិកា ក្រុមបាតុកររាប់ពាន់នាក់ បាននាំគ្នាតវ៉ា ទាមទារអោយបញ្ឈប់នូវគំរោងពង្រីកការដ្ឋានរ៉ែ របស់ក្រុមហ៊ុនចិនមួយ ក្នុងស្រុក ម៉ូនីរ៉ា ស្ថិតនៅ ភាគខាងត្បូងប្រទេស ដើម្បីរង់ចាំ ការសិក្សា អំពីផ្នែកប៉ះពាល់បរិដ្ឋានជាមុនសិន។ ប៉ូលីសភូមា បានបង្ក្រាបក្រុមបាតុករ ធ្វើអោយព្រះសង្ឈច្រើនអង្គ រងរបួស។
នៅថ្ងៃសៅរ៍នេះ បាតុករ ២០០នាក់ ក្នុងនោះមានព្រះសង្ឃ ប្រហែល៤០អង្គ នឹងធ្វើបាតុកម្ម សារជាថ្មី ប្រឆាំងនឹង អំពើហឹង្សា របស់រដ្ឋអំណាចភូមា។
រូបថតព្រះសង្ឃរងរបួស កំពុងព្យាបាលលើគ្រែ ក្នុងមន្ទីរពេទ្យ បានធ្វើអោយ ប្រជាជនភូមា នឹកឃើញឡើងវិញ នូវអំពើផ្តាច់ការក្នុងរបបសឹកចាស់។ ស្ថានភាពនេះ ធ្វើអោយចោទ ជាសំណួរថា តើរដ្ឋាភិបាលភូមាថ្មី មានសមត្ថភាពគ្រប់គ្រាន់ ដែររឺទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ