ប៉ូលិសភូមាបំបែកបាតុកម្មប្រឆាំងនឹងការដ្ឋានរ៉ែរបស់ក្រុមហ៊ុនចិន
បាតុកម្មរបស់អ្នកភូមិ និងលោកសង្ឃភូមា ដែលតវ៉ាប្រឆាំងនឹងការដ្ឋានរ៉ែទង់ដែងរបស់ក្រុមហ៊ុនចិន ត្រូវបានប៉ូលិសបំបែក នៅព្រឹកព្រលឹមថ្ងៃព្រហស្បតិ៍នេះ។ ការបំបែកបាតុកម្មនេះ បានធ្វើឡើងតែប៉ុន្មានម៉ោងប៉ុណ្ណោះ មុនការមកដល់របស់លោកស្រីអ៊ុង សានស៊ូជី ដែលគ្រោងជួបជជែកជាមួយក្រុមបាតុករ។
ចុះផ្សាយនៅថ្ងៃ៖
ស្តាប់ - ០១:៤៨
បាតុកម្មប្រឆាំងនឹងការដ្ឋានរ៉ែនេះ គឺជាឧទាហរណ៍មួយថ្មីទៀត ដែលបង្ហាញឲ្យឃើញថា ប្រជាជនភូមា ដែលរស់នៅក្រោមរបបផ្តាច់ការយោធារាប់សិបឆ្នាំមកហើយនោះ កំពុងតែធ្វើតេស្តដែនកំណត់នៃសិទ្ធិសេរីភាពរបស់ពួកគេ នៅក្រោមរបបដឹកនាំថ្មីរបស់លោកថេន សេន។ វាក៏ជាការបង្ហាញឲ្យឃើញផងដែរ អំពីការកើនឡើងនៃចលនាប្រឆាំងទៅនឹងក្រុមហ៊ុនចិន ដែលបានពង្រីកអាជីវកម្មកាន់តែធំឡើង នៅភូមា នៅក្នុងរយៈពេលប៉ុន្មានឆ្នាំចុងក្រោយនេះ។
ក្រុមបាតុកររាប់ពាន់នាក់ បាននាំគ្នាតវ៉ាឲ្យបញ្ឈប់គម្រោងពង្រីកការដ្ឋានរ៉ែរបស់ក្រុមហ៊ុនវិនិយោគចិន ដើម្បីរង់ចាំឲ្យមានការសិក្សាអំពីផលប៉ះពាល់ខាងផ្នែកបរិស្ថាន និងផ្នែកសង្គម។ ក្រុមបាតុករបានចោទថា ការពង្រីកការដ្ឋានរ៉ែនេះបង្កឲ្យមានការរឹបអូសដីរាប់ពាន់ហិកតាពីប្រជាជន ដោយគ្មានសំណងសមរម្យ។
កាលពីថ្ងៃអង្គារ ប៉ូលិសភូមាបានដាក់បញ្ជាឲ្យបាតុករនាំគ្នាបញ្ឈប់ការតវ៉ា ក៏ប៉ុន្តែ ក្រុមបាតុករ ដែលរួមមានទាំងអ្នកភូមិ និស្សិត និងព្រះសង្ឃ បានជម្នះបន្តការតវ៉ារបស់ពួកគេតទៅទៀត។ នៅព្រឹកព្រលឹមថ្ងៃព្រហស្បតិ៍នេះ នៅម៉ោងប្រមាណជា ៣ភ្លឺ នៅក្នុងពេលដែលបាតុករកំពុងលង់លក់ក្នុងដំណេក នៅកន្លែងបាតុកម្ម ក្រុមប៉ូលិសក៏បានប្រើឡានបាញ់ទឹក និងឧស្ម័នបង្ហូរទឹកភ្នែក ចូលបំបែកបាតុកម្ម។ បើយោងតាមទីភ្នាក់ងារសារព័ត៌មានបារាំង AFP ដែលបានដក់ស្រង់សម្តីរបស់ក្រុមបាតុករ មានព្រះសង្ឃប្រមាណជា ៣០អង្គត្រូវរងរបួស ក្នុងការបង្រ្កាបបាតុកម្មនេះ ហើយព្រះសង្ឃជាច្រើនអង្គផ្សេងទៀតត្រូវបានអាជ្ញាធរចាប់ខ្លួន។
ការបំបែកបាតុកម្មនេះ បានធ្វើឡើងតែប៉ុន្មានម៉ោងប៉ុណ្ណោះ មុនដំណើរមកដល់របស់លោកស្រីអ៊ុង សានស៊ូជី ប្រមុខដឹកនាំប្រឆាំង និងជាសមាជិកសភាភូមា ដែលគ្រោងមកជួបជជែក និងស្តាប់ការតវ៉ារបស់ក្រុមបាតុករ។ បើយោងតាមមន្រ្តីគណបក្សប្រឆាំង លោកស្រីអ៊ុង សានស៊ូជីមិនបានលុបចោលដំណើរទស្សនកិច្ចនេះទេ បើទោះជាមានការបំបែកបាតុកម្ម កាលពីព្រឹកក៏ដោយ។ លោកស្រីបានចេញដំណើរតាមយន្តហោះ ពីទីក្រុងរ៉ង់ហ្គូន ទៅទីក្រុងម៉ាន់ដាឡៃ រួចហើយលោកស្រីនឹងបន្តដំណើរតាមឡាន ទៅកាន់កន្លែងបាតុកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ