ការបង្កើតតំបន់ចរាចរណ៍សេរីនៅក្នុងលំហអតីតសហភាពសូវៀត
ចុះផ្សាយនៅថ្ងៃ៖
ស្តាប់ - ០៣:៤១
អង្គការនេះ ដែលមានឈ្មោះថា “សហភាពសេដ្ឋកិច្ចអឺរ៉ុបអាស៊ី” ត្រូវបានប្រកាសជាសាធារណៈមួយសប្តាហ៍មុន នៅឯក្រុងមិនស្ក៏ រដ្ឋធានីបេឡារុស។ អង្គការថ្មីនេះ ដែលមាន រុស្ស៊ី បេឡារុស កាហ្សាក់ស្ថាន ជារដ្ឋស្ថាបនិក ក្នុងថ្ងៃប្រកាសនោះឯង បានទទួល រដ្ឋអាមេនី ឲ្យ ចូលជា សមាជិកដែរ។ ទៅទល់ដំណាច់ឆ្នាំនេះ ស្របនឹងគម្រោង ក៏នឹងទទួល ឲ្យចូល ជាសមាជិកទី៥ គឺ កៀហ្ស៊ីស៊ីស្ថាន។ រដ្ឋមួយទៀត នៅតំបន់អាស៊ីកណ្តាល គឺ តាហ្ស៊ីគីស្ថាន បានសំដែងទៅហើយ នូវបំណងចូលជាសមាជិកទី៦។ មិនតែប៉ុណ្ណោះ បានចាប់ផ្តើមធ្វើ កិច្ចចរចាជាបណ្តើរៗទៅហើយ ដើម្បីចូលជាសមាជិកថ្មី នៃ សហភាពសេដ្ឋកិច្ចអឺរ៉ុបអាស៊ី គឺ វៀតណាម ឥណ្ឌា អ៊ីស្រាអែល។
អង្គការថ្មីនេះ ចូលខ្លួនទៅជំនួស “សហគមន៍សេដ្ឋកិច្ចអឺរ៉ុបអាស៊ី” ដែលបានមានអត្ថិភាព អស់១៤ឆ្នាំ នៅក្នុងលំហនៃអតីតសហភាពសូវៀត គឺពីឆ្នាំ២០០១ ដល់ ឆ្នាំ២០១៤នេះ។ អង្គការថ្មីមានឈ្មោះថា “សហភាពសេដ្ឋកិច្ចអឺរ៉ុបអាស៊ី” ពីព្រោះប្រទេសស្ថាបនិក បែបយ៉ាង រុស្ស៊ី មាន ដែនដីលាតសន្ធឹងនៅទ្វីបអឺរ៉ុបផង ទ្វីបអាស៊ីផង រីឯកាហ្សាក់ស្ថាន មានដែនដីនៅតំបន់ អាស៊ីកណ្តាល ពោលគឺ ខាងទ្វីបអាស៊ី ហើយបេឡារុស ទោះបីនៅអឺរ៉ុបខាងកើតក្តី ក៏អឺរ៉ុបដែរ។
អង្គការសេដ្ឋកិច្ចថ្មី បង្កើតឡើង ដោយឈរលើមូលដ្ឋាន នៃ សហភាពពន្ធគយ របស់ សហគមន៍សេដ្ឋកិច្ចអឺរ៉ុបអាស៊ី ស្របនឹងសន្ធិសញ្ញា ចុះកាលពីថ្ងៃ ២៩ឧសភាឆ្នាំនេះ ហើយនឹង ដាក់ឲ្យដំណើរការជាផ្លូវការ គឺក្នុង២ខែកន្លះទៀត បានន័យថា ចាប់ពីថ្ងៃទី១មករាឆ្នាំ២០១៥ទៅ។
គោលដៅចោទដោយសហភាពសេដ្ឋកិច្ចថ្មី គឺ រឹតចំណងសេដ្ឋកិច្ចរវាងប្រទេសសមាជិក សម្រាប់ធ្វើទំនើបកម្ម និង លើកសមត្ថភាពប្រជែង នៃផលិតផលគេលើទីផ្សារពិភពលោក។ ក្នុងបរិវេណសហភាពនេះ នឹងប្រព្រឹត្តទៅ ការចល័តដោយសេរី រវាងប្រទេសសមាជិក មិនគ្រាន់តែទំនិញប៉ុណ្ណោះទេ តែក៏ទាំងកម្លាំងពលករ សេវា និងដើមទុន។
ចំណុចដែលគូសបញ្ជាក់ជាឯកច្ឆន្ទ ដោយបណ្តាប្រមុខនៃរដ្ឋសមាជិកអង្គការ គឺ ថា សហភាពសេដ្ឋកិច្ចអឺរ៉ុបអាស៊ី រំលេចឲ្យឃើញពី “កម្រិតថ្មី កាន់តែខ្ពស់នៃ សមាហរ័ណកម្ម សេដ្ឋកិច្ច”។ ភាសាផ្លូវការដែលប្រើ ក្នុងសហភាពនេះ គឺភាសារុស្ស៊ី ភាសាបេឡារុស ភាសា កាហ្សាក់ ភាសាអារមេនី។
បើនិយាយពីតួលេខសម្គាល់អង្គការថ្មី ដែលរួមក្តោប៤ប្រទេសខាងលើ គឺថា សហភាព សេដ្ឋកិច្ចនេះ មានបណ្តាជន ១៧៥លាន៦សែននាក់ (លេខ៨ក្នុងលោក) មានដែនដី ២០លាន២៣០ពាន់គីឡូម៉ែត្រក្រឡា (លេខ១ក្នុងលោក) មានផលិតផលសរុបក្នុងប្រទេស បូកបញ្ចូលគ្នាទៅ គឺ ក្នុងទឹកប្រាក់ ២៩០ម៉ឺនលានដុល្លារស.រ.អា. (លេខ៦ក្នុងលោក)។ ទ្រនិចលេខទាំងនេះ មុខជាស្ទុះឡើងបង្គួរ ក្រោយពីសហភាពសេដ្ឋកិច្ចអឺរ៉ុបអាស៊ី ទទួលឲ្យ ចូល ជាសមាជិកថ្មីៗរបស់ខ្លួន បែបយ៉ាងឥណ្ឌា វៀតណាម អ៊ីស្រអែល និង ប្រទេសខ្លះនៃ ទ្វីបអាមេរិកឡាទីន។
ដោយហេតុថា សហភាពសេដ្ឋកិច្ចអឺរ៉ុបអាស៊ី ត្រូវបាន “ឡង់សេ” យ៉ាងសកម្មដោយរុស្ស៊ី បានជា មជ្ឍដ្ឋាននៅបស្ចិមលោក បកស្រាយរឿងនេះ ដោយប្រយ័ត្នប្រយែងទេតើ។
តាមការរំលឹកនៃប្រព័ន្ធផ្សព្វផ្សាយអង់គ្លេស BBC ធ្លាប់បានសំដែងក្តីព្រួយបារម្ភរបស់ រដ្ឋាភិបាល ប្រទេសខាងលិច គឺលោកស្រី ហ៊ីឡារី គ្លិនតុន កាលគាត់នៅជារដ្ឋមន្ត្រីការបរទេសស.រ.អា.។ កាលពីខែធ្នូឆ្នាំ២០១២ លោកស្រីបានថ្លែងទៅពួកអ្នកកាសែតនៅក្រុង ឌូប្លាំង ហើយថ្លែងនេះ គឺមិនយូរប៉ុន្មាន ដល់ពេលដែលគាត់ត្រូវជួបចរចា ជាមួយលោកប្រមុខការទូតរុស្ស៊ី ស៊ែរហ្គៃ ឡាវ្រ៉ូវ ។ តាមប្រសាសន៍ លោកស្រី ហ៊ីឡារី គ្លិនតុន ៖ ឥឡូវ គេកំពុងសង្កេតឃើញ ទំនោរ ឆ្ពោះទៅធ្វើ “សូវៀតូបនីយកម្ម”ឡើងវិញ ក្នុងលំហអតីតសហភាពសូវៀត។ ប្រាកដណាស់ ដែលគេដាក់ឈ្មោះផ្សេងសោះ។ គេហៅវាថា សហភាពពន្ធគយ ឬ សហភាពអឺរ៉ុបអាស៊ី ជាដើម។ ប៉ុន្តែ ចូរយើងកុំភាន់ច្រឡំឡើយ ទាក់ទងនឹងធាតុពិតនៃសាច់រឿងដែលមាន! យើងដឹង តើអ្វីជាគោលដៅ នៃអភិក្រមនេះ។ រួចយើងខិតខំស្វែងរក មធ្យោបាយឲ្យបាន ស័ក្តិសិទ្ធិ ដើម្បីពន្យឺត ឬមួយ ទប់ស្កាត់ ដំណើរការនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ