យន្តហោះរុស្ស៊ីដែលបានធ្លាក់នៅអេហ្ស៊ីបពិតជាមកពីអំពើភេរវកម្ម
ដោយរាយការណ៍ព្រឹកថ្ងៃអង្គារ ជូនលោកប្រធានាធិបតីពូទីន នាយកនៃ ស្ថាប័ន សន្តិសុខរុស្ស៊ី បានថ្លែងថា គឺមកពីការផ្ទុះនៃគ្រាប់បែកឆ្នៃ លួចលាក់ទុក ក្នុងយន្តហោះ ដែល យន្តហោះដឹកអ្នកដំណើររុស្ស៊ី បានបែកខ្ចាយជាបំណែកៗ តាំងពីក្នុងកំពស់ខ្ពស់នៃអាកាសម៉្លេះ បណ្តាលឲ្យស្លាប់គ្មានសល់ម្នាក់ទេ មនុស្សទាំង ២២៤នាក់ ដែលបានជិះក្នុងយន្តហោះនោះ។ លោកពូទីន សន្យាថា រុស្ស៊ីនឹងស្វែងរកចាប់ទាល់តែបាន ពួកដែលបានប្រព្រឹត្តភេរវកម្មនេះ ទោះវា ពួន នៅទីណាក៏ដោយ។ អាជ្ញាធររុស្ស៊ី ថែមទាំងបានប្រកាស រង្វាន់ ៥០លានដុល្លារ សម្រាប់នរណា ដែលផ្តល់ព័ត៌មាន នាំទៅចាប់ពួកភេរវជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ស្របនឹងរបាយការណ៍ លោក Alexandre Bortnikov ជានាយក ស្ថាប័នសន្តិសុខរុស្ស៊ី និងជាប្រធាន គណៈកម្មាធិការជាតិប្រឆាំងភេរវកម្ម ៖ មហន្តរាយយន្តហោះរុស្ស៊ី ធុន Airbus 321 ធ្លាក់ទៅលើដែនដីអេហ្ស៊ីប កាលពីថ្ងៃ៣១តុលា គឺពិតជាបណ្តាលមកពីភេរវកម្ម។ តាមការ ប្រមាណ នៃពួកអ្នកឯកទេស កម្លាំងផ្ទុះនៃគ្រាប់បែកឆ្នៃ លាក់ទុក ក្នុងយន្តហោះនោះ គឺស្មើនឹង ធាតុ TNT មួយគីឡូក្រាម។ មកពីការផ្ទុះតាំងពីក្នុងអាកាសកំពស់ខ្ពស់ បានជាបំណែកយន្តហោះ បែកសាច រាយលើដែនដីផ្ទៃក្រឡាធំ រាប់គ.ម.ការ៉េឯណោះ។
បន្ទាប់ពីឮរបាយការណ៍នេះ លោកប្រធានាធិបតីពូទីន បានងើបឈរ គោរពវិញ្ញាណក្ខន្ធ ពលរដ្ឋរុស្ស៊ីទាំង ២២៤ នាក ដែលបានស្លាប់ ក្នុងសោកនាដកម្មនេះ។ ងើបឈរភ្លាមភ្លែតដែរ ក៏ទាំង មន្ត្រីកំពូលៗ ដែលចូលរួមក្នុងកិច្ចប្រជុំនោះ គឺ រដ្ឋមន្ត្រីការបរទេស ,រដ្ឋមន្ត្រីការពារជាតិ នាយអគ្គសេនាធិការដ្ឋានកងទ័ពរុស្ស៊ី , នាយកស្ថាប័នសន្តិសុខជាតិ , នាយកចារកិច្ច ក្រៅប្រទេស។
លោកប្រមុខរដ្ឋរុស្ស៊ីថ្លែងថា មិនមែនជាលើកទី១ទេ ដែលរុស្ស៊ីប៉ះទង្គិចនឹងភេរវឧក្រិដ្ឋកម្ម សែន ព្រៃផ្សៃ។ រុស្ស៊ី នៅចងចាំគ្មានភ្លេចអ្វីទេ។ ខាងចំនួនអ្នកស្លាប់ ឃាតកម្ម នៅលើដែនដីស៊ីណៃ ស្ថិត ក្នុងចំណោម ឃាតកម្មបង្ហូរឈាមក្រៃលែង។ យើងមិនជូតទឹកភ្នែក ពីបេះដូងយើងឡើយ។ ទឹកភ្នែកនេះ នឹងស្ថិតនៅជាប់ជាមួយយើង។ ឧក្រិដ្ឋកម្មនេះ នៅដក់ជាប់ក្នុងសតិយើង ដោយមិន អាស្រ័យ នឹងពេលវេលាឡើយ។ យើងនឹងបើកអាក្រាតឈ្មោះពួកវា ហើយតាមរកចាប់ពួកវា ឲ្យទាល់តែបាន ទោះពួកវាពួននៅទីណាក៏ដោយ រួចមកផ្តន្ទាទោសពួកវា។ ក្នុងប្រតិបត្តិការ ស្វែងរកចាប់និង ផ្តន្ទាទោសនេះ រុស្ស៊ីក៏សង្ឃឹមលើ ការជួយជ្រោមជ្រែងពីបណ្តាមិត្តខ្លួនដែរ។
ដោយផ្ទុកផ្តាក់ឲ្យបង្កើនការវាយប្រហារទៅលើទីតាំងពួកភេរវជន លោកពូទីន សង្កត់ធ្ងន់ថា រុស្ស៊ីប្រើសិទ្ធិស្វ័យការពាររបស់ខ្លួន ដោយយោងទៅលើមាត្រា ទី៥១ នៃធម្មនុញ្ញអ.ស.ប.។
ស្ថាប័នសន្តិសុខរុស្ស៊ី បានប្រកាសរង្វាន់ធំ មិនធ្លាប់មានទេ ក្នុងប្រវត្តិខ្លួន ដល់ទៅ ៥០លាន ដុល្លារ សម្រាប់នរណា ដែលផ្តល់ព័ត៌មាន នាំទៅកាន់ការចាប់ពួកភេរវជន ដែលបានកំទេច យន្តហោះរុស្ស៊ី។
ចំណែកអាជ្ញាធរអេហ្ស៊ីប ទើបប្រកាសថា បានឃាត់ខ្លួនបុរសពីរនាក់ ជាប់សង្ស័យ ក្នុងការជួយ ពួកភេរវជន ឲ្យលួចដាក់គ្រាប់បែក ក្នុងយន្តហោះរុស្ស៊ីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ