កិច្ចចរចាមួយវគ្គថ្មីនៅក្រុងមិនស្ក៏បានចប់ទៅ ដោយគ្មានលទ្ធផលជាក់លាក់
កិច្ចចរចាជុំវិញដំណោះស្រាយវិបត្តិនៅតំបន់បះបោរខាងកើតអ៊ុយក្រែនបាន ប្រព្រឹត្តទៅឡើងវិញក្នុងរដ្ឋធានីបេឡារុសថ្ងៃទី២៤ ធ្នូ ក្រោយពីអាក់ខានអស់សឹង៤ខែ។ បានចូលរួម គឺតំណាងរបស់ក្រុងគៀវ និងតំណាងរបស់ភាគីបះបោរខាងកើតអ៊ុយក្រែនដែលរុស្ស៊ីនិយម ដោយមានតំណាងរបស់ក្រុងម៉ូស្គូ និងអង្គការដើម្បីសន្តិសុខ និងសហប្រតិបត្តិការទ្វីបអឺរ៉ុប OSCE ជាអន្តរការី។ ប៉ុន្តែក្រោយពីប្រព្រឹត្តទៅអស់សឹង ៦ម៉ោងមក លុះរហូតដល់ម៉ោង ១១យប់ គេឥតបានប្រកាសឡើយអំពីកាលបរិច្ឆេទថ្មីសម្រាប់បន្តកិច្ចចរចានេះ។
ចុះផ្សាយនៅថ្ងៃ៖
ស្តាប់ - ០២:២៤
គួររំលឹកថា កិច្ចចរចាម្សិលមិញបានប្រព្រឹត្តទៅកើត គឺយោងទៅតាមលទ្ធផលនៃការសន្ទនាគ្នាតាមទូរស័ព្ទរវាងប្រមុខរដ្ឋរុស្ស៊ី ប្រធានាធិបតីបារាំង នាយករដ្ឋមន្ត្រីអាល្លឺម៉ង់ និងប្រធានាធិបតីអ៊ុយក្រែនដែលបានសម្រេចថា “ក្រុមទំនាក់ទំនងចតុភាគី”នោះខាងរកច្រកចេញឲ្យវិបត្តិនៅអ៊ុយក្រែនត្រូវជួបគ្នា២លើកទៀត គឺថ្ងៃទី២៤ ធ្នូ និងទី២៦ ធ្នូ។ ប៉ុន្តែបន្ទាប់ពីកិច្ចចរចាម្សិលមិញ គ្មានភាគីណាមួយបាននិយាយអំពីកាលបរិច្ឆេទថ្មីនៃជំនួបឡើយ។ សាច់រឿងនៃពិភាក្សាម្សិលមិញ គឺទាក់ទងនឹងការបំពេញតាមចំណុចសំខាន់ៗនៃពិធីសារ និងកិច្ចព្រមព្រៀងចុះនៅក្រុងមិនស្ក៏កាលពីជិត៤ខែមុន គឺនាថ្ងៃទី៥ កញ្ញា និយាយឲ្យចំ បញ្ហាប្តូរឈ្លើយសឹកទៅវិញទៅមក តាមរូបមន្ត « ទាំងអស់ទល់នឹងទាំងអស់ » កុំឲ្យសល់ម្នាក់ឡើយ។
ត្រង់ចំណុចនេះ តាមតួលេខនៃស្ថាប័នសន្តិសុខអ៊ុយក្រែន SBU ក្រុងគៀវត្រៀមប្រគល់ទៅឲ្យភាគីបះបោរ គឺឈ្លើយ ២២៥នាក់ក្នុងនោះ មានទាំងជាតិរុស្ស៊ីផង។ ហើយស្របនឹងប្រភពក្រុងគៀវ ជាប់នៅក្នុងកណ្តាប់ដៃពួកបះបោរ គឺមានយោធា អ្នកកាសែត ជនស្ម័គ្រចិត្ត និងមនុស្សប្រភេទផ្សេងទៀត ជាតិអ៊ុយក្រែន សរុបទៅ ម្តុំពី ៦៣០ ដល់ ៦៩០នាក់។ បញ្ហាដកសព្វាវុធធុនធ្ងន់ៗ ដែលគ្រាប់កាណុងវាមានកាលីប ចាប់ពី ១០០មីលីម៉ែត្រឡើងទៅ ហើយអាចបាញ់ដល់ចម្ងាយ៣០គ.ម. ត្រូវដកចេញពីខ្សែដែលខ័ណ្ឌដែនដីក្រោមការត្រួតត្រារបស់ភាគីបះបោរ ពីដែនដីក្រោមការត្រួតត្រារបស់កងទ័ពអ៊ុយក្រែននៃខេត្តដូណេត និងលូហ្កាន់ ម្ខាងៗទៅចម្ងាយ ១៥គ.ម.គ្រាន់នឹងបង្កើតឡើងជាតំបន់ទ្រនាប់ទទឹងដល់៣០គ.ម.។
ភាគីបះបោរទាមទារពីក្រុងគៀវឲ្យឈប់ខ្ទប់ដង្ហើមសេដ្ឋកិច្ចខេត្តបះបោរទាំងពីរនោះ គឺឲ្យបើកប្រាក់ខែ និងប្រាក់រ៉ឺត្រែតឡើងវិញ ដល់អ្នកស្រុកខេត្តទាំងពីរ ដ្បិតពេលធ្វើការ គេសុទ្ធតែបានបង់ពន្ធទៅក្នុងថវិការដ្ឋអ៊ុយក្រែនទេតើ ប្រាក់ទាំងនោះត្រូវបានក្រុងគៀវផ្តាច់ឈប់បង់តាំងពីកណ្តាលខែវិច្ឆិកាមក។ មិនតែប៉ុណ្ណោះ ភាគីបះបោរទាមទារពីក្រុងគៀវឲ្យផ្តល់នូវ”លក្ខន្តិកៈពិសេស” ដល់ខេត្តទាំងពីរ។ នៅតាមមុខព្រួញនេះ វិមានក្រេមឡាំងដែលតែងប្រកាសទទួលស្គាល់បូរណភាពដែនដីរដ្ឋអ៊ុយក្រែន យោងតាមប្រព័ន្ធផ្សព្វផ្សាយនៅរុស្ស៊ីថ្ងៃនេះបានទូន្មានខេត្តបះបោរទាំងពីរ ឲ្យធ្វើការបោះឆ្នោតថ្មីទៅលើកនេះ គឺដោយសម្របយោបល់ជាមួយក្រុងគៀវតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ