រដ្ឋសភាអ៊ុយក្រែន បានលុបចោល លក្ខន្តិកៈមិនចូលបក្សសម្ព័ន្ធ
សំនើឲ្យលុបចោលច្បាប់នេះ ត្រូវបានដាក់ចេញដោយលោកប្រធានាធិបតី ប៉ូរ៉ូឆេនកូ ពីព្រោះគាត់យល់ថា វាមិនអាចធានាសន្តិសុខជាតិអ៊ុយក្រែនឡើយ។ ការលុបចោល លក្ខន្តិកៈនេះ គឺបើកផ្លូវឲ្យអ៊ុយក្រែនដាក់ពាក្យ សុំចូលជាសមាជិកបក្សសម្ព័ន្ធអូតង់តែម្តង។ ប៉ុន្តែ តាមយោបល់គាត់ មុនដំបូង ត្រូវលើកបញ្ហានេះ ទៅធ្វើ ប្រជាមតិសិន។
ចុះផ្សាយនៅថ្ងៃ៖
ស្តាប់ - ០២:១១
ជាការរំលឹក ច្បាប់ស្តីអំពី លក្ខន្តិកៈអ៊ុយក្រែនជា ប្រទេសមិនចូលបក្សសម្ព័្នន្ធ ត្រូវបាន អនុម័ត កាលពីខែមករាឆ្នាំ២០១១ ជំនាន់ប្រធានាធិបតីទី៤របស់រដ្ឋនេះ គឺលោក យ៉ានូកូវិច ដែលរុស្ស៊ីនិយម។
ប៉ុន្តែ បន្ទាប់ពីសហព័ន្ធរុស្ស៊ី បានភ្ជាប់យកទឹកដីគ្រីមេរបស់អ៊ុយក្រែនមក និងក្នុងបរិបទ នៃ ជម្លោះផ្តាច់ទឹកដី នៅប៉ែកខាងកើតអ៊ុយក្រែន ដែលតាមយោបល់ក្រុងគៀវ គឺ បង្កឡើងដោយ ម៉ូស្គូ អ៊ុយក្រែនយល់ថា លក្ខន្តិកៈមិនចូលបក្សសម្ព័ន្ធ មិនអាចធានាសន្តិសុខជាតិខ្លួនឡើយ ម៉្លោះហើយ បានជាប្រធានាធិបតីបច្ចុប្បន្នលោក ប៉ូរ៉ូឆេនកូ បានស្នើឲ្យ រដ្ឋសភាលុបចោលទៅ ស្ថានភាពមិនចូលបក្សសម្ព័ន្ធនេះ។
ជាលទ្ធផលនៃការបោះឆ្នោតម្សិលមិញ ពីក្នុងចំណោមតំណាងរាស្ត្រ ៤២៣នាក់ នៃរដ្ឋសភា មានដល់ទៅ៣០៣សំឡេង គឺលើសឆ្ងាយ ពីចំនួនសំឡេង ពាក់កណ្តាលបូកមួយ ឫ ២១២ សំឡេង ដែលទាមទារដោយច្បាប់ បានគាំទ្រដល់សំនើនេះ។
ក្នុងច្បាប់បច្ចុប្បន្នរបស់អ៊ុយក្រែន ស្តីអំពី”មូលដ្ឋាននៃសន្តិសុខជាតិអ៊ុយក្រែន” មានចែងថា ៖ សមាហរ័ណកម្ម អ៊ុយក្រែន ទៅក្នុងលំហអឺរ៉ុបផ្នែកនយោបាយ សេដ្ឋកិច្ច គតិយុត្ត គឺក្នុង គោលដៅ ប្រែអ៊ុយក្រែន ឲ្យក្លាយទៅជាសមាជិក នៃសហភាពអឺរ៉ុប និង បក្សសម្ព័ន្ធអូតង់តែម្តង នេះហើយ ជាមុខព្រួញ ជាអាទិភាព នៃនយោបាយក្រៅប្រទេសរបស់អ៊ុយក្រែន។
លោករដ្ឋមន្ត្រីការបរទេសរុស្ស៊ី ស៊ែរហ្កៃ ឡាវ៉្រូវ បានប្រតិកម្មដោយឥតបង្អែបង្អង់ឡើយថា ការលុបចោល លក្ខន្តិកៈមិនចូលបក្សសម្ព័ន្ធ របស់អ៊ុយក្រែន គឺអាចតែអូសទាញ ស្ថានការណ៍ ឲ្យរឹតតែតានតឹង ហើយ វានឹងហុចមកនូវ ផលបញ្ច្រាស់ ទៅវិញសោះ។ តាមលោកឡាវ៉្រូវ គឺជា ការ”ភាន់វិញ្ញាណទេតើ” សម្រាប់ក្រុងគៀវ ដែលយល់ថា ការលុបចោល លក្ខន្តិកៈមិនចូល បក្ស សម្ព័ន្ធ អាចជួយដោះស្រាយវិបត្តិផ្ទៃក្នុងអ៊ុយក្រែន ដែលចាក់ឫសជ្រៅទៅហើយ។
ចំណែកតំណាងរបស់រុស្ស៊ី ប្រចាំនៅអង្គការដើម្បីសន្តិសុខនិងសហប្រតិបត្តិការទ្វីបអឺរ៉ុប OSCE លោក Andrei Kelinថ្លែងថា លទ្ធផលនៃការបោះឆ្នោតម្សិលមិញ ក្នុងរដ្ឋសភាអ៊ុយក្រែន គឺ ជា ”ជំហានអមិត្តទល់នឹងរុស្ស៊ី” និងថា អ៊ុយក្រែន ដើម្បីចូលជាសមាជិកអូតង់ គឺមិនឆ្លើយស្រប ឡើយនឹងលក្ខណវិនិច្ឆ័យ របស់បក្សសម្ព័ន្ធនេះ ទោះផ្នែកនយោបាយក្តី ផ្នែកសេដ្ឋកិច្ចក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ