វិបត្តិស៊ីរី៖តួអង្គសំខាន់ៗជួបប្រជុំគ្នានៅក្នុងទីក្រុងវីយែន ប្រទេសអូទ្រីស
នៅថ្ងៃសុក្រ ទី៣០ តុលានេះ កិច្ចប្រជុំស្តីពីវិបត្តិស៊ីរីបានរៀបចំជាថ្មីនៅក្នុងទីក្រុងវីយែន ប្រទេសអូទ្រីស។ កិច្ចប្រជុំពេលនេះ ជាកិច្ចប្រជុំថ្នាក់រដ្ឋមន្រ្តីការបរទេសមកពីអាមេរិក រុស្ស៊ី អារ៉ាប៊ីសាអូឌីត តួកគី ព្រមទំាងពីប្រទេសជាច្រើនផ្សេងទៀត ក្នុងនោះក៏មានអ៊ីរ៉ង់ផងដែរ។ នេះជាលើកទី១ ដែលតួអង្គអ៊ីរ៉ង់ត្រូវបានគេអញ្ជើញឲ្យចូលរួមនៅក្នុងដំណោះស្រាយឲ្យវិបត្តិស៊ីរីដែលបានអូសបន្លាយជិត ៥ឆ្នំា និងដែលបានបណ្តាលឲ្យមានមនុស្សស្លាប់ជាង ២៥ម៉ឺននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
តំាងពីវិបត្តិស៊ីរីបានផ្ទុះក្នុងខែមីនា ឆ្នំា ២០១១ មក នេះជាលើកទី១ ដែលកិច្ចប្រជុំបានចូលរួមដោយគ្រប់ភាគីពាក់ព័ន្ធទំាងអស់ ពោលមន្រ្តីការទូតមកពីបស្ចិមលោក និងមកពីតំបន់មជ្ឈិមបូព៌ា ហើយវត្តមានដែលគ្រប់គ្នាបានចាប់អារម្មណ៍ខ្លំាងនោះ គឺលោកប្រមុខការទូតអ៊ីរ៉ង់ម៉ូហាម៉ាដ យ៉ាវ៉ា ហ្សារី្វ។ តែមុននឹងផ្តើមកិច្ចប្រជុំរួមថ្ងៃនេះ គេសង្កេតឃើញមានកិច្ចប្រជុំជាលក្ខណៈទ្វេភាគីត្រូវបានរៀបចំតំាងពីយប់ថ្ងៃព្រហស្បតិ៍ ទី២៩ តុលា ពិសេសរវាងប្រមុខការទូតអាមេរិកចន ឃ៊ែរី និងសមភាគីអ៊ីរ៉ង់លោកម៉ូហាម៉ាដ យ៉ាវ៉ា ហ្សារី្វ។ លោកឃ៊ែរីបានថ្លែងថាចាប់ពីពេលនេះតទៅ អ៊ីរ៉ង់ត្រូវតែទទួលបានកន្លែងមួយនៅក្នុងកិច្ចចរចាដើម្បីស្វែងរកដំណោះស្រាយឲ្យវិបត្តិស៊ីរី។
គួរជម្រាបជូនថាកន្លងមក សហគមន៍អន្តរជាតិធ្លាប់បានរៀបចំសន្និសីទចំនួនពីរដងក្នុងទីក្រុងហ្សឺណែវ ប្រទេសស្វីសស្តីពីវិបត្តិស៊ីរី តែអ៊ីរ៉ង់មិនត្រូវបានគេហៅឲ្យចូលរួមទេ។ អ៊ីចឹងហើយបានជាគ្រប់គ្នាបានចាត់ទុកវត្តមានអ៊ីរ៉ង់ពេលនេះ ថាជាការបោះជំហានផ្លូវទូតយ៉ាងសំខាន់នៅក្នុងវិបត្តិស៊ីរី ព្រោះអ៊ីរ៉ង់ជាសម្ព័ន្ធមិត្តចាក់ទឹកមិនលេចរបស់លោកប្រធានាធិបតីស៊ីរីអាសាដ។ លោកប្រមុខការទូតរុស្ស៊ីបានបញ្ជេញប្រតិកម្មដោយសាទរថា នៅទីបំផុត គេអាចប្រមូលគ្រប់ភាគីពាក់ព័ន្ធទំាងអស់ឲ្យចូលអង្គុយនៅជុំវិញតុតែមួយ។ ចំណាប់អារម្មណ៍ដូចគ្នានេះក៏មានពីប្រមុខការទូតបារំាង និងអាល្លឺម៉ង់ដែរ។
គោលដៅនៃកិច្ចប្រជុំ គឺដើម្បីជជែកពីលទ្ធភាពក្នុងការបង្កើតរដ្ឋាភិបាលអន្តរកាលនៅស៊ីរីមួយដោយមានការចូលរួមពីគ្រប់ភាគីជម្លោះផ្ទៃក្នុងទំាងអស់។ តែអ្វីដែលកិច្ចប្រជុំត្រូវនិយាយចុះសម្រុងជាមុននោះ គឺជោគវាសនារបស់លោកប្រធានាធិបតីស៊ីរីអាសាដ។ អ្នកខ្លះយល់ថា គេត្រូវតែដកលោកអាសាដចេញពីឆាកនយោបាយស៊ីរី តែអ្នកខ្លះទៀតយល់ថា ដំណោះស្រាយស៊ីរីតាមផ្លូវណាក៏ដោយ គឺត្រូវតែមានវត្តមានលោកអាសាដដោយមិនអាចខ្វះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ