មិនអាចជ្រើសតាំងប្រធានាធិបតីបាន ក្រិកត្រូវរៀបចំបោះឆ្នោតសភាមុនកាលកំណត់
លើកទីមួយ លើកទីពីរ មិនបានសម្រេច លើកទីបីនៅតែមិនបានលទ្ធផលទៀត ! បេក្ខជនប្រធានាធិបតី លោក Stavros Dimas ដែលរដ្ឋាភិបាលក្រិកបានស្នើឡើង មិនអាចប្រមូលសំឡេងសភាបានគ្រប់គ្រាន់ សម្រាប់ទទួលតំណែងជាប្រធានាធិបតីសោះ។ ជាផលវិបាក ក្រិកត្រូវបង្ខំចិត្តរៀបចំ ជាថ្មី ការបោះឆ្នោតសភាមុនកាលកំណត់។
ចុះផ្សាយនៅថ្ងៃ៖
ស្តាប់ - ០១:៤២
ស្របតាមរដ្ឋធម្មនុញ្ញក្រិក សភាមានសិទិ្ធបោះឆ្នោតបីដងសម្រាប់ផ្តល់ទំនុកដល់រដ្ឋាភិបាលក្នុងការតែងតាំងប្រធានាធិបតី។ បីដងមិនសម្រេច សភាត្រូវតែរំលាយ នៅក្នុងរយៈពេល១០ថ្ងៃ ខាងមុខ ហើយបន្ទាប់មកត្រូវរៀបចំការបោះឆ្នោតសភាមុនអាណត្តិ ពោលគឺនៅថ្ងៃ ២៥មករា ២០១៥។
ហេតុអ្វីបានជាក្រិកត្រូវធ្លាក់ខ្លួនរៀបចំការបោះឆ្នោតសភាមុនកាលកំណត់យ៉ាងដូច្នេះ ? ព្រោះជាលើកទីបីជាប់គ្នា លោក Stavros Dimas មិនអាចប្រមូលការគាំទ្រពីសមាជិកសភាបាន១៨០សំឡេងចាំបាច់សម្រាប់ឈ្នះឆ្នោត ក្លាយជាប្រធានាធិបតី។ អតីតស្នងការអឺរ៉ុប និងមានការគាំទ្រយ៉ាងខ្លាំងពីប្រធានគណៈកម្មការអឺរ៉ុប គ្មានលទ្ធភាពធ្វើឱ្យប្រសើរជាងការបោះឆ្នោតនៅជុំទីពីរ និងជុំទីមួយឡើយ។
ដូច្នេះប្រទេសក្រិកនឹងត្រូវត្រលប់ទៅបើកឆាកឃោសនានយោបាយឡើងវិញ ដែលពិតមានលក្ខណៈពុះកញ្ជ្រោលខ្លាំង និងមានការប្រកួតប្រជែងខ្លាំងរវាងគណបក្សស្តាំនិយមប្រជាធិបតេយ្យថ្មី របស់នាយករដ្ឋមន្ត្រី និងគណបក្ស ឆ្វេងជ្រុលនិយម Syriza ដែលមានប្រជាប្រិយភាពឡើងខ្លាំង នៅក្នុងការស្ទង់មតិ។
ទស្សនវិស័យនៃជោគជ័យ Syriza បក្សឆ្វេងនិយមជ្រុលរបស់លោក Alexis Tsipras ដែលសន្យាបិទបញ្ចប់នយោបាយត្បិតត្បៀត បានធ្វើឱ្យម្ចាស់បំណុលក្រិកព្រួយបារម្ភយ៉ាងខ្លាំង។ Syriza បានច្រានចោលផែនការរឹតត្បឹតថ្មី ដែលរដ្ឋាភិបាលកំពុងកាន់អំណាច និងម្ចាស់ មូលនិធិ បានស្នើឡើងសម្រាប់ឆ្នាំ២០១៥។ គណបក្សនេះ ចង់ចរចាអំពី លក្ខខណ្ឌនៃជំនួយហិរញ្ញវត្ថុ ដែលសហភាពអឺរ៉ុបនិងមូលនិធិរូបិយវត្ថុអន្តរជាតិបានព្រមព្រៀងរួចហើយ ឡើងវិញ។ គឺជាប្រធានបទដ៏រសើបបំផុត និងដែលសហភាពអឺរ៉ុបព្រឺខ្នងចាំ។ ទីផ្សារភាគហ៊ុនក្រិក គ្រាន់តែបានឮដំណឹងបោះឆ្នោតសភាមុនកាលកំណត់ភ្លាម បានធ្លាក់ថ្លៃអស់ ១១%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ