បារំាង៖លោកហូឡង់សន្យាជំរុញឲ្យមានការយកពន្ធលើចរាចរណ៍ហិរញ្ញវត្ថុរវាងធនាគារ
ជិត ១០០ថ្ងៃមុនការរៀបចំសន្និសីទអន្តរជាតិក្នុងទីក្រុងប៉ារីសស្តីពីអាកាសធាតុ បារំាងក្នុងនាមជាប្រទេសម្ចាស់ផ្ទះបានប្រឹងប្រែងគ្រប់បែបយ៉ាងដើម្បីឲ្យសន្និសីទទទួលបានជោគជ័យ។ នៅក្នុងកិច្ចប្រជុំមួយរៀបចំនៅវិមាន Elysée នាថ្ងៃព្រហស្បតិ៍ ទី១០ កញ្ញា និងដែលមានវត្តមានអ្នកចូលរួមពីគ្រប់ស្ថាប័នចំនួន ៤០០នាក់ លោកប្រធានាធិបតីបារំាងហ្រ្វង់ស័រ ហូឡង់បានសន្យាជម្រុញឲ្យមានការយកពន្ធលើចរាចរណ៍ហិរញ្ញវត្ថុរវាងធនាគារដើម្បីចំណាយនៅក្នុងយុទ្ធនាការប្រយុទ្ធប្រឆំាងនឹងការឡើងកំដៅនៅក្នុងបរិយាកាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
គឺចាប់ពីថ្ងៃទី៣០ វិច្ឆិកាដល់ថ្ងៃទី១០ ធ្នូខាងមុខដែលបារំាងធ្វើជាម្ចាស់ផ្ទះរៀបចំសន្និសីទអន្តរជាតិស្តីពីបញ្ហាអាកាសធាតុដែលហៅកាត់ថា COP២១។ គឺនៅក្នុងន័យនេះហើយបានជាចាប់ពីពេលនេះទៅទល់នឹងថ្ងៃបើកសន្និសីទ លោកប្រធានាធិបតីបារំាងហ្រ្វង់ស័រ ហូឡង់បាននិងកំពុងជួបប្រជុំក្រុមអ្នកជំនាញ និងក្រុមអ្នកឯកទេសបារំាងផ្នែកអាកាសធាតុទំាងអស់។ ទន្ទឹមគ្នានេះ ទីកន្លែងសាធារណៈសំខាន់ៗ ពិសេសគឺវិមានប្រធានាធិបតី Elysée ត្រូវបានដាក់តំាងរូបភាពបង្កប់ដោយពណ៌បៃតងដែលតំណាងឲ្យបរិស្ថានគ្មានផ្សែងពុល។ កម្មវត្ថុរបស់បារំាងគឺចង់ឲ្យសន្និសីទអន្តរជាតិស្តីពីអាកាសធាតុទទួលបានជោគជ័យ ពោលសម្រេចឲ្យបាននូវកិច្ចព្រមព្រៀងមួយក្នុងការកាត់បន្ថយកំដៅនៅក្នុងភពផែនដី។
ថ្លែងនៅចំពោះមុខវត្តមានក្រុមអ្នកជំនាញ និងក្រុមអ្នកឯកទេសបារំាងផ្នែកអាកាសធាតុនាថ្ងៃព្រហស្បតិ៍ ទី១០ កញ្ញា លោកហូឡង់បានសន្យាជម្រុញឲ្យមានកិច្ចព្រមព្រៀងមួយស្តីពីការយកពន្ធលើចរាចរណ៍ហិរញ្ញវត្ថុរវាងធនាគារ និងធនាគារ ហើយនឹងយកប្រាក់ពន្ធមួយភាគទៅប្រើនៅក្នុងយុទ្ធនាការប្រយុទ្ធប្រឆំាងនឹងការឡើងកំដៅនៅក្នុងបរិយាកាស។ លោកហូឡង់សង្ឃឹមនឹងទទួលបានកិច្ចព្រមព្រៀងនេះជាគោលការណ៍នៅក្នុងមហាសន្និបាតរបស់ធនាគារពិភពលោក និងមូលនិធីរូបិយវត្ថុអន្តរជាតិដែលគ្រោងរៀបចំនៅក្នុងទីក្រុងលីម៉ា ប្រទេសប៉េរូពីថ្ងៃទី៩ ដល់ថ្ងៃទី១១ តុលាខាងមុខ។
កម្មវត្ថុរបស់មហាសន្និបាតធនាគារពិភពលោក និងមូលនិធីរូបិយវត្ថុអន្តរជាតិ គឺស្វែងរកប្រាក់ពីវិស័យសាធារណៈ និងឯកជនឲ្យបាន ១០០ ០០០លានដុល្លាក្នុងមួយឆ្នំាចាប់ពីឆ្នំា ២០២០ ទៅសម្រាប់យកទៅជួយប្រទេសក្រីក្រនៅក្នុងយុទ្ធនាការប្រយុទ្ធប្រឆំាងនឹងការឡើងកំដៅនៅក្នុងភពផែនដី។ លោកហូឡង់បានអះអាងថា ប្រទេសនីមួយៗត្រូវតែសន្យាឲ្យបានច្បាស់លាស់ពីការរួមចំណែករបស់ខ្លួន និងថា បារំាងត្រៀមខ្លួននឹងបន្ថែមប្រាក់លើសពីការសន្យារបស់ខ្លួន។
លោកហូឡង់បានបញ្ជាក់ថា គោលដៅសំខាន់របស់ COP២១ មិនមែនដើម្បីគុណភាពជីវិតទេ តែដើម្បីជីវិតមនុស្សលោក ភពផែនដី និងប្រព័ន្ធជីវចម្រុះ។ យោងតាមលោកហូឡង់ បើសន្និសីទនៅប៉ារីសសម្រេចបានកិច្ចព្រមព្រៀងមែន វាមិនមែនជាចំណុចដល់គោលដៅទេ តែជាចំណុចចាប់ផ្តើមនៅក្នុងយុទ្ធនាការប្រយុទ្ធប្រឆំាងនឹងការឡើងកំដៅនៅក្នុងបរិយាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ