លោកហូឡង់ និងលោកស្រីមែរកិលអំពាវនាវឲ្យមានកិច្ចព្រមព្រៀងស្តីពីអាកាសធាតុប្រកបដោយមហិច្ឆតា
លោកប្រធានាធិបតីបារំាងហ្រ្វង់ស័រ ហូឡង់ និងលោកស្រីនាយករដ្ឋមន្រ្តីអាល្លឺម៉ង់អង់ហ្កឺឡា មែរកិលបានអំពាវនាវរួមគ្នាឲ្យមានកិច្ចព្រមព្រៀងមួយស្តីពីបញ្ហាអាកាសធាតុប្រកបដោយមហិច្ឆតា និងមានការបង្ខិតបង្ខំ។ ការអំពាវនាវនេះត្រូវបានធ្វើឡើងពីទីក្រុងប៊ែរឡំាង ប្រទេសអាល្លឺម៉ង់នាឱកាសជំនួបកំពូលក្នុងគោលដៅត្រៀមសន្និសីទអន្តរជាតិស្តីពីបញ្ហាអាកាសធាតុដែលគ្រោងរៀបចំក្នុងទីក្រុងប៉ារីស ប្រទេសបារំាងនៅចុងឆ្នំា ២០១៥ នេះ។ លោកហូឡង់បានថ្លែងថា ដើម្បីអាចឲ្យសន្និសីទក្នុងទីក្រុងប៉ារីសទទួលបានជោគជ័យ គេត្រូវតែស្វែងរកការព្រមព្រៀងជាមុនបណ្តើរៗចាប់ពីពេលនេះដល់ថ្ងៃរៀបចំសន្និសីទជាផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
គឺនៅក្នុងសេចក្តីថ្លែងការណ៍រួមគ្នាដែលបារំាង និងអាល្លឺម៉ង់បានប្តេជ្ញាចិត្តប្រើគ្រប់មធ្យោបាយទំាងអស់ដើម្បីធ្វើឲ្យសន្និសីទអន្តរជាតិស្តីពីបញ្ហាអាកាសធាតុដែលគ្រោងរៀបចំនៅក្នុងទីក្រុងប៉ារីស ប្រទេសបារំាងនៅដំណាច់ឆ្នំា ២០១៥ នេះទទួលបានជោគជ័យ។ គឺជាកិច្ចព្រមព្រៀងមួយដែលប៉ារីស និងប៊ែរឡំាងចង់ឲ្យមានមហិច្ឆតា និងការបង្ខិតបង្ខំ។ លោកស្រីប្រមុខរដ្ឋាភិបាលអាល្លឺម៉ង់មែរកិលបានគូសបញ្ជាក់ដោយទទួលស្គាល់ថា ប្រទេសឧស្សាហកម្មទំាងអស់ក្នុងលោកដូចបារំាង និងអាល្លឺម៉ង់ជាអ្នកទទួលខុសត្រូវនៃការឡើងកំដៅក្នុងភពផែនដីសព្វថ្ងៃ ព្រោះគឺប្រទេសឧស្សាហកម្មទំាងអស់នោះហើយដែលបានចាក់ចោលឧស្ម័នពុលយ៉ាងច្រើនទៅក្នុងបរិយាកាសអស់រយៈពេលច្រើនឆ្នំា។ ដូច្នេះវាជាកាតព្វកិច្ចដែលទំាងអស់គ្នាត្រូវសម្រចឲ្យនូវកិច្ចព្រមព្រៀងមួយស្តីពីបញ្ហាអាកាសធាតុនាសន្និសីទអន្តរជាតិក្នុងទីក្រុងប៉ារីស នេះជាការអះអាងរបស់លោកប្រធានាធិបតីបារំាងហូឡង់។
គួរជម្រាបជូនថា លោកស្រីមែរកិល និងលោកហូឡង់បានថ្លែងក្នុងថ្ងៃទី២ នៃជំនួបកំពូលរៀបចំក្នុងទីក្រុងប៊ែរឡំាងដែលចូលរួមដោយ ៣៥ប្រទេស ព្រមទំាងអង្គការអន្តរជាតិជាច្រើនទៀត ដូចយ៉ាង Greenpeace ជាដើម។ ជំនួបកំពូលនេះបានផ្តួចផ្តើមដំបូងដោយលោកស្រីមែរកិលក្នុងឆ្នំា ២០១០ បន្ទាប់ពីសន្និសីទអន្តរជាតិស្តីពីបញ្ហាអាកាសធាតុក្នុងឆ្នំា ២០០៩ នៅប្រទេសដាណឺម៉ាកទទួលបរាជ័យ។ អង្គការការពារបរិស្ថាន និងក្រុមបាតុករអ្នកបរិស្ថានជាច្រើនបាននំាគ្នាធ្វើបាតុកម្មដោយទាមទារឲ្យមានបញ្ឈប់ការប្រើថាមពលបានពីធ្យូង និងនុយក្លេអ៊ែរ ហើយដាក់ជំនួសវិញដោយថាមពលស្អាតមិនចេះសាបសូន្យចាប់ពីពេលនេះទៅឆ្នំា ២០៥០។
លោកហូឡង់បានអះអាងថា ដើម្បីអាចឲ្យសន្និសីទអន្តរជាតិទីក្រុងប៉ារីសទទួលបានជោគជ័យ គេត្រូវតែផ្តើមជជែក និងស្វែងរកភាពចុះសម្រុងគ្នាជាបណ្តើរៗចាប់ពីពេលនេះទៅទល់នឹងថ្ងៃរៀបចំសន្និសីទ។ យោងតាមលោកហូឡង់ នៅមានប្រទេសតិចតួចណាស់ដែលបានចាត់វិធានការថ្នាក់ជាតិក្នុងការប្រយុទ្ធប្រឆំាងនឹងការឡើងកំដៅនៅក្នុងបរិយាកាស។ ក្រៅពីរឿងអាកាសធាតុ លោកហូឡង់ក៏បានចាប់អារម្មណ៍ពីលំហូរជនអន្តោប្រវេសន៍ខុសច្បាប់តាមសមុទ្រក្នុងទឹកដីអឺរ៉ុបដែរ។ លោកហូឡង់បានយល់ព្រមឲ្យប្រទេសអឺរ៉ុបទំាងអស់មានចំណែកទទួលយកជនភៀសខ្លួន តែច្រានចោលលើគំនិតនៃការកំណត់កូតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ