សំណុំរឿងបេណាឡា ៖ បក្សប្រឆាំងដាក់ញាត្តិចាប់ថ្នាក់រដ្ឋាភិបាល
ចុះផ្សាយនៅថ្ងៃ៖
ស្តាប់ - ០៤:៣១
សំណុំរឿងអតីតអង្គរក្សប្រធានាធិបតីមានចរិតហិង្សា ដែលរីករាលដាល ក្លាយជាសំណុំរឿងអាស្រូវរដ្ឋ មិនព្រមស្ងប់ស្ងាត់ទេ។ បន្ទាប់ពីមានការចោទប្រកាន់ជាផ្លូវការ សភានិងព្រឹទ្ធសភាបើកអង្កេត និងកោះហៅថ្នាក់ដឹកនាំពាក់ព័ន្ធ ជាច្រើននាក់ មកចោទសួរ នៅថ្ងៃអង្គារទី ៣១កក្កដា បក្សប្រឆាំងបានផ្តុំកម្លាំងគ្នាធ្វើញាត្តិពីរចាប់ថ្នាក់ ប្រឆាំងនឹងរដ្ឋាភិបាល។ ញាត្តិទាំងពីរមិនអាចទម្លាក់រដ្ឋាភិបាលបានមែន ប៉ុន្តែនេះជាព្រឹត្តិការណ៍ដែលពុំមានកើតមានឡើយក្នុងប្រវត្តិសាស្ត្របារាំង ក្រោមរបបដឹកនាំបែបសាធារណរដ្ឋ។
សាលប្រជុំសភា បានក្លាយជាសង្វៀនវាយប្រហារគ្នារវាងបក្សប្រឆាំងនិងប្រមុខរដ្ឋាភិបាល យ៉ាងពុះកញ្ជ្រោល។ ក្នុងនាមបក្សកាន់អំណាច លោក អេដ័រ ហ្វីលីព នាយករដ្ឋមន្ត្រីបារាំង ត្រូវប្រឈម ជាសាធារណៈ ជាលើកទីមួយ នឹងញាត្តិចាប់ថ្នាក់ ពីរ ៖ មួយជាញាត្តិរបស់បក្សប្រឆាំងជាអ្នកស្តាំនិយម (បក្សសាធារណរដ្ឋ) មួយទៀតជាញាត្តិរបស់អ្នកឆ្វេងនិយម (បក្សសង្គមនិយម បក្សកុម្មុយនិស្តនិយម និងបក្សឆ្វេងជ្រុលនិយម Insoumise)។ ញាត្តិចាប់ថ្នាក់ទាំងពីរ ជាតំណាងប្រតិកម្មរបស់បក្សប្រឆាំង ចំពោះរឿងអាស្រូវបេណេឡា អតីតអង្គរក្សរបស់ប្រធានាធិបតីម៉ាក្រុង ដែលត្រូវបានតុលាការធ្វើការចោទប្រកាន់ជាផ្លូវការហើយ ពីបទប្រព្រឹត្តអំពើហិង្សា បន្លំខ្លួនធ្វើជាប៉ូលិស ខុសតួនាទី ទៅបង្ក្រាបបាតុករកាលពីថ្ងៃទី ១ឧសភា។
ក្នុងញាត្តិរបស់អ្នកស្តាំនិយម ពួកគេបានបន្ទោសដោយចំៗ ថាប្រមុខរដ្ឋគឺជាអ្នកទទួលខុសត្រូវធំជាងគេនៅក្នុងរឿងអាស្រូវបេណេឡា និងបានទាមទារឱ្យលោកប្រធានាធិបតីចេញមុខមកពន្យល់ប្រជាពលរដ្ឋ។ ញាត្តិអ្នកស្តាំនិយម ក៏បានចោទប្រកាន់រដ្ឋាភិបាល ថាមានកំហុសដោយបណ្តោយឱ្យ ជនបេណាឡា បង្កើនអំណាច។ ទង្វើបែបនេះនឹងបន្សល់ទុកស្នាមដ៏អាក្រក់ទាំងផ្នែកនយោបាយនិងសីលធម៌ សម្រាប់ប្រធានាធិបតីបារាំង។ ខាងអ្នកឆ្វេងនិយម ដែលធ្លាប់តែប្រេះឆាប្រកាន់បក្សនិងជំហររៀងខ្លួន បានបង្ហាញសាមគ្គីភាពជាធ្លុងមួយ ជាលើកទីមួយ តាមរយៈញាត្តិតែរួមគ្នា បន្ទោសរដ្ឋាភិបាលថាកំពុងតែធ្វើច្បាប់រដ្ឋចុះខ្សោយ។ សំណុំរឿងបេណាឡា មិនមែនជាភាពមិនប្រក្រតីនៃស្ថាប័នដឹកនាំទេ តែជារបៀបដឹកនាំ របស់អ្នកកាន់អំណាច។
ញាត្តិចាប់ថ្នាក់ គឺជាអាវុធដែលបក្សប្រឆាំងតែងតែប្រើ ដើម្បីទាមទារឱ្យសភាទម្លាក់រដ្ឋាភិបាល។ ប៉ុន្តែគ្មានញាត្តិណាមួយ ត្រូវបានទទួលសំឡេងគាំទ្រភាគច្រើនដាច់ខាតនៅក្នុងសភាទេ។ ញាត្តិរបស់អ្នកស្តាំនិយម បានទទួលសំឡេងគាំទ្រ១៤៣សំឡេង និងតែ៧៤សំឡេងប៉ុណ្ណោះ សម្រាប់ញាត្តិរបស់ក្រុមអ្នកឆ្វេងនិយម។ ដើម្បីអាចទម្លាក់រដ្ឋាភិបាលបាន គេត្រូវការសំឡេងគាំទ្រញាត្តិដល់ទៅ ២៨៩សំឡេងឯណោះ។
តាមការពិត បក្សប្រឆាំងបារាំងទាំងពីរ (ក្រុមស្តាំនិយម១០៣អាសនៈ + ក្រុមឆ្វេង ៦៣អាសនៈ) ក៏បានដឹងខ្លួនជាមុន ថាគ្មានសំណាងចាប់ថ្នាក់ទម្លាក់រដ្ឋាភិបាលដែលមានសំឡេងភាគច្រើនដាច់ខាតនៅក្នុងសភាជាតិបានទេ។ ប៉ុន្តែ សម្រាប់ក្រុមបក្ស ដែលហាក់ដូច បាក់ខ្លប បាត់សំឡេងឈឹង តាំងពីជាងមួយឆ្នាំមក (តាំងពីបរាជ័យនៅក្នុងការបោះឆ្នោតប្រធានាធិបតីបារាំងខែឧសភាឆ្នាំ២០១៧មក) នេះជាឱកាសមួយ នៃលើកមុខមាត់នយោបាយ និងបង្ហាញអំពីការបង្រួបបង្រួមកម្លាំងគ្នាជាធ្លុងមួយ ក្នុងនាមជាបក្សប្រឆាំង។
ហេតុដូច្នេះហើយបានជា នៅក្នុងពេលតស៊ូមតិ នៅក្នុងសភា មុនការបោះឆ្នោតលើញាត្តិចាប់ថ្នាក់ លោកនាយករដ្ឋមន្ត្រី ឆ្លៀតវាយបកទៅលើបក្សប្រឆាំងវិញ មួយចំណុចម្តងៗ។ លោក អេដ័រ ហ្វីលីពីន បានឆ្លើយការពារលោកប្រធានាធិបតី និងបានធានាអះអាងថា គ្មានទេការកាន់អំណាចបែបរាជានិយម នៅវិមានអេលីហ្សេ ដូចដែលបក្សប្រឆាំងបានធ្វើការចោទប្រកាន់នោះទេ។ សម្រាប់លោក ហ្វីលីពីន បក្សប្រឆាំងព្រមចងសម្ព័ន្ធមេត្រីភាពគ្នា ធ្វើញាត្តិចាប់ថ្នាក់ មិនមែនក្នុងបំណងស្វែងរកការពិតនៃសំណុំរឿងបេណាឡាទេ ប៉ុន្តែជាចាប់យកសំណុំរឿងបេណាឡា មកធ្វើឧបករណ៍នយោបាយ សម្រាប់ពន្យឺតដំណើរការធ្វើកំណែទម្រង់របស់រដ្ឋាភិបាលតែប៉ុណ្ណោះ។ ឧទាហរណ៍ជាក់ស្តែង ការធ្វើកំណែទម្រង់រដ្ឋធម្មនុញ្ញ ត្រូវបានសភាផ្អាកការជជែកពិភាក្សានិងអនុម័ត ក្រោយការផ្ទុះរឿងអាស្រូវបេណេឡាបន្តិច។ លោកនាយករដ្ឋមន្ត្រីបានចាត់ទុក ញាត្តិចាប់ថ្នាក់របស់បក្សប្រឆាំងថាជាញាត្តិបិទខ្ទប់ សម្ព័ន្ធភាពជាធ្លុងមួយរបស់បក្សប្រឆាំង ជាការរួបរួមបែបឆ្លៀតឱកាស ដែលមិនអាចរារាំងការងាររដ្ឋាភិបាលបានទេ។
ទោះសម្ព័ន្ធភាពរបស់ប្រឆាំងមានទម្រង់យ៉ាងណាក៏ដោយ ក៏អ្វីដែលគេអាចចងចាំបាននៅក្នុងសំណុំរឿងអាស្រូវនេះ មានពីរ។ ទីមួយ គឺរដ្ឋាភិបាលបារាំងបានឆ្លងកាត់វិបត្តិដ៏ធ្ងន់ធ្ងរបំផុត គិតចាប់តាំងពីលោកម៉ាក្រុងបានក្លាយជាប្រធានាធិបតីមក។ ទីពីរ គឺឥទ្ធិពលនៃរឿងអាស្រូវ បានជំរុញឱ្យបក្សប្រឆាំង ដែលធ្លាប់តែនិយាយមិនត្រូវគ្នាសោះ ដុះគំនិតចេះស្រុះស្រួលគ្នាបញ្ចេញសំឡេងក្នុងខ្ទង់តែមួយ។ ប៉ុន្តែសួរថាតើការត្រូវរ៉ូវគ្នាអាចធន់បានយូរប៉ុណ្ណា ?! តើអាស្រូវបេណេឡា នឹងក្លាយជាអនុស្សាវរីយ៍អាក្រក់ ដូចដែលលោកម៉ាក្រុងបានអះអាង ឬ ក៏ជាដំបៅធ្លាយមុខរបស់លោកប្រធានាធិបតី ដូចដែលបក្សកុម្មុយនិស្តបានសន្យាឆ្កិះកកាយ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ