បារាំងបានសម្រេចចិត្តដកបេក្ខភាពចេញពីក្រុមប្រទេសចង់រៀបចំពិព័រណ៍សកលនៅឆ្នាំ ២០២៥
នៅក្នុងប្រទេសបារាំង លោកនាយករដ្ឋមន្រ្តី Edouard Philippe បានប្រកាសឲ្យដឹងនាថ្ងៃសៅរ៍ ទី២០ មករាថា បារាំងបានដកបេក្ខភាពចេញពីក្រុមប្រទេសប្រជែងរៀបចំការតាំងពិព័រណ៍សកលនៅឆ្នាំ ២០១៥។ ព័ត៌មានមួយនេះទើបត្រូវបានទម្លាយឲ្យដឹងដោយកាសែតថ្ងៃអាទិត្យចេញផ្សាយក្នុងថ្ងៃអាទិត្យ ទី២១ មករានេះ។
ចុះផ្សាយនៅថ្ងៃ៖
ស្តាប់ - ០២:០៣
« ខ្ញុំបានសម្រេចចិត្តមិនបន្តបេក្ខភាពរបស់បារាំងជាប្រទេសរៀបចំពិព័រណ៍សកលនៅឆ្នាំ ២០២៥ » នេះជាប្រសាសន៍របស់លោកនាយករដ្ឋមន្រ្តីបារាំងEdouard Philippe នៅក្នុងលិខិតមួយសរសេរទៅឲ្យលោក Pascal Lamy អតីតនាយកអង្គការពាណិជ្ជកម្មពិភពលោក និងបច្ចុប្បន្នជាប្រធានទទួលបន្ទុករៀបចំពិព័រណ៍បារាំងនៅឆ្នាំ ២០២៥។ នៅក្នុងលិខិតដដែលនោះ ប្រមុខរដ្ឋាភិបាលបារាំងបានសង្កត់ធ្ងន់លើរចនាសម្ព័ន្ធទន់ខ្សោយនៃគំរូសេដ្ឋកិច្ចនៅក្នុងគម្រោងរបស់បារាំង និងបន្ថែមថា នៅក្នុងបរិបទនៃការស្តារហិរញ្ញវត្ថុសាធារណៈឡើងវិញ បារាំងមិនអាចចាយលុយបន្ថែមទៀតទេ។
តាមសេណារីយ៉ូដែលបារាំងបានគុនគូរ ពិធីរៀបចំពិព័រណ៍សកលអាចនឹងមានមនុស្សចូលទស្សនាពី ៣៥ ទៅ ៤០លាននាក់ និងច្រើនបំផុត ៦៥លាននាក់។ តែនៅពេលដែលប្រទេសអ៊ីតាលីបានរៀបចំពិព័រណ៍ដូចគ្នានេះនៅទីក្រុងមីឡង់ក្នុងឆ្នាំ ២០១៥ គឺមានមនុស្សចូលទស្សនាតែប្រមាណ ២០លាននាក់ និងបានធ្វើឲ្យចំណូលធ្លាក់ពី ១ ៣០០លានអឺរ៉ូមកនៅត្រឹមតែ ៤៥៥លានអឺរ៉ូប៉ុណ្ណោះ។ នេះហើយជាបទពិសោធន៍មួយដែលបារាំងបានដកខ្លួនចេញវិញ។ ទន្ទឹមគ្នានេះ លោកប្រមុខរដ្ឋាភិបាលបារាំងក៏បានលើកឡើងពីកង្វះការចូលរួមរបស់ដៃគូឯកជន។
យ៉ាងណាក៏ដោយ ការសម្រេចចិត្តដកបេក្ខភាពបារាំងពេលនេះបានធ្វើឲ្យមានការខកចិត្ត និងភ្ញាក់ផ្អើល។ ការសម្រេចចិត្តរបស់បារាំងពេលនេះបានធ្លាក់មក ១០ខែមុននឹងការិយាល័យពិព័រណ៍អន្តរជាតិសម្រេចជ្រើសរើសយកប្រទេសណាមួយក្នុងចំណោមបេក្ខភាពទាំង ៤ប្រទេស គឺបារាំង រុស្ស៊ី ជប៉ុន និងអាស៊ែបៃហ្សង់។ តាមគម្រោង ពិព័រណ៍សកលនឹងត្រូវរៀបចំពីថ្ងៃទី១ ឧសភា ដល់ថ្ងៃទី៣១ តុលា ឆ្នាំ ២០២៥។ ទោះជាយ៉ាងនេះក្តី បារាំងកំពុងត្រៀមខ្លួនធ្វើជាម្ចាស់ផ្ទះរៀបចំល្បែងកីឡាអូឡាំពិចក្នុងឆ្នាំ ២០២៤ និងរៀបចំការប្រកួតកីឡាបាល់ឱបពិភពលោកក្នុងឆ្នាំ ២០២៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ