បារាំង៖រឿងអាស្រូវទឹកដោះគោម្សៅសម្រាប់កូនង៉ែតមានបាក់តេរីរបស់ក្រុមហ៊ុន Lactalis កំពុងរីករាលដាលខ្លាំង
នៅក្នុងប្រទេសបារាំង រឿងអាស្រូវទឹកដោះគោម្សៅសម្រាប់កូនង៉ែតមានបាក់តេរី Salmonelle របស់មហាក្រុមហ៊ុនបារាំងមួយឈ្មោះ Lactalis បាន និងកំពុងរីករាលដាលកាន់តែខ្លាំងលើសពីព្រំដែនបារាំង។ លោក Emmanuel Besnier អគ្គនាយកក្រុមហ៊ុន Lactalis ដែលគេស្គាល់ជាអ្នកជំនួញមិនសូវចេញមុខបានថ្លែងជាលើកទី១ នៅថ្ងៃអាទិត្យ ទី១៤ មករានេះថា ប្រតិបត្តិការប្រមូលម្សៅទឹកគោដែលគេសង្ស័យមានវត្តមានបាក់តេរីមានចំនួន ១២លានកំប៉ុង និងមានជាប់ទាក់ទងនឹង ៨៣ប្រទេសក្នុងលោក។ ទន្ទឹមគ្នានេះ លោក Emmanuel ក៏បានសន្យាសងជម្ងឺចិត្តដល់គ្រួសារដែលបានរងគ្រោះដោយបញ្ហាមួយនេះ។
ចុះផ្សាយនៅថ្ងៃ៖
ស្តាប់ - ០២:០៧
តាំងពីថ្ងៃផ្ទុះរឿងអាស្រូវម្សៅទឹកដោះគោសម្រាប់កូនង៉ែតមានផ្ទុកបាក់តេរី Salmonelle របស់មហាក្រុមហ៊ុនបារាំង Lactalis មក នេះជាលើកដំបូងបង្អស់ដែលអគ្គនាយកក្រុមហ៊ុនលោក Emmanuel Besnier បានបញ្ចេញប្រតិកម្ម។ នៅក្នុងកិច្ចសន្ទនាជាមួយកាសែតថ្ងៃអាទិត្យចេញផ្សាយថ្ងៃទី១៤ មករានេះ លោក Emmanuel Besnier ដែលជាមហាសេដ្ឋីបារាំងលំដាប់ទី១១ និងជាអ្នកជំនួញលាក់មុខ មិនសូវនិយាយស្តីម្នាក់បានប្រាប់ឲ្យដឹងថា លោកយល់ពីវិបត្តិមួយនេះដែលអាចជះផលវិបាលដល់អតិថិជន ពិសេសកូនង៉ែតដែលមានអាយុក្រោម ៦ខែ។ « សម្រាប់យើង សម្រាប់ខ្ញុំ គឺជាក្តីបារម្ភធំធេងណាស់ » នេះជាការបញ្ជាក់របស់លោក Besnier។
ទន្ទឹមគ្នានេះ លោក Besnier ក៏បានបញ្ជាក់ពីការបញ្ជាឲ្យប្រមូលម្សៅទឹកដោះគោទាំងអស់ដែលផលិតនៅរោងចក្រ Craon និងដែលសរុបទាំងអស់មាន ១២លានកំប៉ុង និងមានជាប់ពាក់ព័ន្ធដល់ទៅ ៨៣ប្រទេសក្នុងលោក។ អន្តរាគមន៍ជាសាធារណៈរបស់លោក Besnier ថ្ងៃនេះបានធ្វើឡើង បន្ទាប់ពីលោកបានជួបសន្ទនាជាមួយលោករដ្ឋមន្រ្តីក្រសួងសេដ្ឋកិច្ចបារាំង Bruno Le Maire កាលពីថ្ងៃសុក្រ ទី១២ មករា។ នៅក្នុងប្រទេសបារាំង និងតាមតួលេខផ្លូវការគិតត្រឹមថ្ងៃទី៩ មករា មានកូនក្មេងចំនួន ៣២នាក់បានបានរងផលប៉ះពាល់ដោយបាក់តេរី Salmonelle បន្ទាប់ពីកូនក្មេងទាំងនោះបានផឹកទឹកគោ ឬញាំផលិផលធ្វើពីទឹកដោះគោរបស់ក្រុមហ៊ុន Lactalis។
ករណីដូចគ្នានេះត្រូវបានគេរកឃើញនៅក្នុងប្រទេសអេស្ប៉ាញ និងនៅក្នុងប្រទេសក្រិក។ រហូតមកដល់ពេលនេះ មានគ្រួសារបារាំងប្រមាណជា ១០០គ្រួសារបានដាក់ពាក្យប្តឹងក្រុមហ៊ុន Lactalis ហើយដែលលោក Besnier បានសន្យាថា លោកនឹងសងជម្ងឺចិត្តដល់គ្រួសារទាំងអស់ដែលរងគ្រោះដោយសារម្សៅទឹកដោះគោមានបាកតេរី Salmonelle។ ទន្ទឹមគ្នានេះ លោក Besnier ក៏បានសន្យាចូលរួមជាមួយរដ្ឋអំណាចបារាំងនៅក្នុងការស៊ើបអង្កេតដើម្បីស្វែងរកការពិត ពិសេសចង់ដឹងថា តើបាក់តេរី Salmonelle បានជ្រៀតចូលក្នុងរោងចក្រ Craon តាមផ្លូវណា និងថា ហេតុអ្វីបានជាម្សៅទឹកគោប្រភេទនេះនៅបន្តមានលក់នៅតាមហាង និងឳសថស្ថានខ្លះ ទោះបីជាមានការប្រកាសឲ្យឈប់លក់ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ