អ្នកស្រាវជ្រាវបារាំងប្រកាសអាសន្នថ្មីស្តីពីគ្រោះនៃការប្រើទូរស័ព្ទដៃយូរ
មិនមែនតែកុមារក្រោមអាយុ១២ឆ្នាំទេដែលរងគ្រោះព្រោះទូរស័ព្ទដៃ ! មនុស្សពេញវ័យក៏អាចប្រឈមនឹងគ្រោះថ្នាក់នេះដែរ។ បើតាមការសិក្សាស្រាវជ្រាវរបស់វិទ្យាស្ថានបារាំង ដែលបំផុសឱ្យរស់ឡើងវិញនូវការតស៊ូមតិស្តីអំពីគ្រោះថ្នាក់នៃការប្រើប្រាស់ទូរស័ព្ទដៃ “ការនិយាយទូរស័ព្ទ (ទូរស័ព្ទដៃ) លើសពី ១៥ម៉ោងក្នុងមួយខែ អាចនឹងបង្កើនគ្រោះ អភិវឌ្ឍន៍ ដុំពកក្នុងខួរក្បាល !
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
និយាយទូរស័ព្ទដៃយូរ អាចនឹងសម្រួលឱ្យឆាប់មានកើតដុំពកនៅក្នុងខួរក្បាល ស្រាលឬធ្ងន់ ! នេះជាសេចក្តីសន្និដ្ឋាននៃការសិក្សាស្រាវជ្រាវបារាំង ដែលបានរកឃើញ ថាពិតមានទំនាក់ទំនងរវាងការប្រើទូរស័ព្ទដៃនិងគ្រោះកើតដុំពកក្នុងខួរ និងដែលទើបចុះផ្សាយក្នុងទំព័រទស្សនាវដ្តីសុខភាព។
វិទ្យាស្ថានសុខភាពសាធារណៈ រោគរាតត្បាតនិងអភិវឌ្ឍន៍ នៃសកលវិទ្យាល័យក្រុងប័រដូ បានដឹកនាំការស្រាវជ្រាវ ត្រួតពិនិត្យនិងតាមដានកត្តាទាំងឡាយដែលមានពាក់ព័ន្ធនឹងបរិស្ថាន ការរស់នៅ ធ្វើការ និងការលេចចេញជាដុំពកក្នុងប្រព័ន្ធខួរមនុស្សពេញវ័យ។
បើតាមទិន្នន័យសិក្សា ពីឆ្នាំ ២០០៤ដល់ ២០០៦ ដែលប្រៀបធៀបជាមួយមនុស្សពេញវ័យគ្មានជំងឺ៨៩២នាក់ ករណីអ្នកកើតដុំសាច់ក្នុងខួរក្បាលស្រាលឬធ្ងន់ ៤៤៧នាក់ (២៥៣នាក់មាន ខួរក្បាលហើម gliomes ១៩៤នាក់មានដុំហើមក្នុងខួរក្បាល méningiome) គេឃើញអំពីទំនាក់ទំនងជាវិជ្ជមានរវាងការអភិវឌ្ឍន៍ដំណើរហើមខួរក្បាល ឬ មានដុំហើមក្នុងខួរក្បាល ចំពោះអ្នកដែលបាននិយាយទូរស័ព្ទយ៉ាងហោច ៨៩៦ម៉ោង ក្នុងមួយជីវិត ឬមានដំណើរហើមខួរក្បាលបន្ទាប់ពីបាននិយាយទូរស័ព្ទលើសពី ១៨៣៦០ដង។
ការសិក្សាមិនទាន់អាច កំណត់អំពីកំរិតគ្រោះថ្នាក់នៃការលេចដុំពក និងអំពីទំនាក់ទំនងរវាងជំងឺមហារីកខួរក្បាលនិងការប្រើប្រាស់ទូរស័ព្ទដៃបាននៅឡើយមែន ប៉ុន្តែអ្នកស្រាវជ្រាវបានគូសបញ្ជាក់ ការនិយាយទូរស័ព្ទដៃយូរ (លើសពី៨៦៩ម៉ោង) ពោលគឺ ១៥ម៉ោងក្នុងមួយខែ កន្លះម៉ោងក្នុងមួយថ្ងៃ ក្នុងរយៈពេល៥ឆ្នាំជាមធ្យម នឹងធ្វើឱ្យគ្រោះ មានដំណើរហើមខួរក្បាល ដុំពកមហារីកក្នុងខួរក្បាល ជួនកាច (glioblastome) ជួនស្លូត (oligodendrogliome)កើនពីពីរ ទៅបីដង។ ដូចគ្នានេះដែរ គ្រោះកើតដុំហើមក្នុងខួរក្បាល ដុំពកជាទូទៅស្រាលនៅស្រោមខួរ អាចនឹងកើនទ្វេដង ទៅបីដងលើសអ្នកដែលប្រើទូរស័ព្ទសមស្រប។
មានការសិក្សាច្រើនដែលនិយាយអំពីគ្រោះថ្នាក់ដ៏ចម្រូងចម្រាសនៃទូរស័ព្ទដៃ។ វិធីសាស្ត្រនៃការស្រាវជ្រាវ ក៏មិនទាន់ស៊ីចង្វាក់គ្នា។ ភាពស្មុគស្មាញមួយទៀត គឺទូរស័ព្ទដៃ ជារបកគំហើញថ្មីៗនៅឡើយ ប្តូរផ្លាស់យ៉ាងលឿនរហ័យក្នុងការកាត់បន្ថយការរលកវិទ្យុសកម្ម បានកាន់តែប្រសើរឡើង បូកផ្សំនឹងការវិវឌ្ឍន៍ យឺតនិងស្ងាត់ៗនៃដុំពកមហារីកខួរក្បាលខ្លះទៀត ទើបធ្វើឱ្យអ្នកស្រាវជ្រាវពិបាកផ្តល់ចម្លើយប្រកបដោយភាពលាក់ជាក់បានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ