ហេតុអ្វីប្រធានាធិបតីបារាំងថ្មី លោក ម៉ាក្រុង ធ្លាក់ប្រជាប្រិយភាពលឿនជាងប្រមុខរដ្ឋមុនៗ ?
ចុះផ្សាយនៅថ្ងៃ៖
ស្តាប់ - ០៥:១៨
បវេសនកាលនយោបាយឆ្នាំថ្មីបានចាប់បើកហើយ នៅប្រទេសបារាំង ! សមាជិករដ្ឋាភិបាលរបស់លោក អេម៉ាណុយអែល ម៉ាក្រុង បានមកជួបជុំគ្នាស្តាប់បង្គាប់ប្រធានាធិបតី កាលពីថ្ងៃចន្ទ ដើម្បីត្រៀមខ្លួនចេញបំពេញការងារ និងធ្វើកំណែទម្រង់ផ្សេងៗ ដែលទំនងជាលំបាក និងតានតឹងខ្លាំងតែម្តង។ បរិយាកាសនយោបាយនិងសង្គម គ្របដណ្តប់ដោយភាពសង្ស័យ និងមិនទុកចិត្ត។ ប្រជាប្រិយភាពរបស់លោកប្រធានាធិបតីបានដាំក្បាលធ្លាក់ចុះខ្លាំងពុំធ្លាប់មាន។ តើមកពីមូលហេតុអ្វី ?
តើជាការប្រជុំការងារ ឬជាការដោះស្រាយវិបត្តិ ? ការជួបប្រជុំនៅវិមានប្រធានាធិបតី ក្រោមអធិបតីភាពរបស់លោក អេម៉ាណុយអែល ម៉ាក្រុង នៅថ្ងៃចន្ទទី ២៨សីហា ប្រព្រឹត្តទៅក្នុងបរិបទនយោបាយដ៏ស្មុគស្មាញ ព្រោះលោកទើបតែបានឡើងកាន់តំណែងប្រមាណតែជាងបីខែ ជាប្រធានាធិបតីផង និងអប្រជាប្រិយភាពផង។
ឡើងកាន់អំណាចបានជាងមួយត្រីមាស តែរូបភាពប្រធានាធិបតីម៉ាក្រុង ហាក់ដូចជាបានខូចខាតខ្លាំង ជាមួយប្រជាប្រិយភាពដាំក្បាលចុះមិនធ្លាប់មាន។ បើតាមការស្ទង់មតិ ចុះផ្សាយនៅថ្ងៃអាទិត្យទី ២៧ សីហា ២០១៧ លោកម៉ាក្រុងបានបាត់បង់ប្រជាប្រិយភាពអស់១៤%ក្នុងរយៈពេលតែមួយសីហានេះសោះ និងអស់១០% កាលពីខែកក្កដា។ ជាសរុប មានប្រជាពលរដ្ឋតែប្រមាណ៤០%ប៉ុណ្ណោះ ដែលនៅមានគំនិតសុទិដ្ឋនិយមលើរូបលោកប្រធានាធិបតី។ មានន័យថា លោក ម៉ាក្រុង គឺជាប្រធានាធិបតីដែលអប្រជាប្រិយភាពជាងគេបង្អស់ បើប្រៀបទៅនឹងប្រធានាធិបតីមុនៗ ក្នុងរយៈពេលដូចគ្នា ៖ សូម្បីតែលោក ហ្វ្រង់ស័រ ហូឡង់ ក៏មានការគាំទ្រគ្រាន់ប្រើជាង កាលពីឆ្នាំ ២០១២ (៥៤%) និងកាលពីឆ្នាំ២០០៧ លោកនីកូឡា សាកូហ្ស៊ី រក្សាប្រជាប្រិយភាពដល់ទៅ ៦៧%។
នៅក្នុងឱកាសជួបប្រជុំការងារដំបូងថ្ងៃចន្ទនេះ រដ្ឋាភិបាលត្រូវសម្រេចសម្រួចលើកម្មវិធីធ្វើកំណែទម្រង់ធំៗសំខាន់ៗ ដែលត្រូវធ្វើនៅខែខាងមុខ ដោយចាប់ផ្តើមពីកំណែទម្រង់ច្បាប់ការងារ។ សិទ្ធប្រើបញ្ជាប្រធានាធិបតី ត្រូវបង្ហាញនៅថ្ងៃព្រហស្បតិ៍ ...។ មិនដឹងថាតើថ្ងៃណាត់របស់រដ្ឋាភិបាលនេះ នឹងក្លាយទៅជាថ្ងៃណាត់ធ្វើបាតុកម្មរបស់ក្រុមសហជីពឬយ៉ាងណាទេ ! គេគ្រាន់តែដឹងជាស្រេចថាមានសហជីពធំមួយ CGT បានប្រកាសយកថ្ងៃទី ១២ កញ្ញាជាថ្ងៃប្រមូលផ្តុំតាមថ្នល់ ប្រឆាំងនឹងផែនការរដ្ឋាភិបាលរួចទៅហើយ។
ការងារលំបាកជាច្រើនផ្សេងទៀត ក៏កំពុងរង់ចាំលោកប្រធានាធិបតីនិងលោកនាយករដ្ឋមន្ត្រី ដោះស្រាយរហូតដល់ចប់ដំណាច់ឆ្នាំតែម្តង មានជាអាទិ៍ការរៀបចំគម្រោងថវិកាឆ្នាំ២០១៨ ដែលត្រូវការសន្សំប្រាក់ឱ្យបាន២០ពាន់លានអឺរ៉ូ ! នេះមិនរាប់អំពីភាពតានតឹងក្នុងវិស័យឧត្តមសិក្សា ការរៀបចំគម្រោងកំណែទម្រង់ប្រព័ន្ធធានារ៉ាប់រងអ្នកអត់ការងារធ្វើ ការផ្តល់វគ្គបំពាក់បំប៉នជំនាញ និងការចូលនិវត្តន៍ផង។ ពោលគឺរដ្ឋាភិបាលថ្មី ត្រូវបង្ហាញអំពីកញ្ចប់កំណែទម្រង់ទូទៅ ដើម្បីឆ្លុះបញ្ចាំងឱ្យឃើញអំពីភាពស៊ីចង្វាក់នៃការដឹកនាំប្រទេស និងឱ្យឃើញថារដ្ឋាភិបាលបារាំង ក្រោមការដឹកនាំរបស់ប្រធានាធិបតីម៉ាក្រុង ខុសប្លែកពីការដឹកនាំរបស់ប្រធានាធិបតីមុន។
ប៉ុន្តែនេះហើយជាបញ្ហា ! រដ្ឋាភិបាលថ្មីរបស់លោកម៉ាក្រុងនេះ ពុំទាន់មានសមត្ថភាពពន្យល់និងបង្ហាញអំពីភាពខុសប្លែកនិងសកម្មភាពទូទៅរបស់រដ្ឋាភិបាលខ្លួនជូនប្រជាពលរដ្ឋនៅឡើយទេ នាពេលនេះ។ វិធានការកែតម្រឹមថវិកា កាត់បន្ថយឱនភាពជាតិ ស្របតាមអនុសាសន៍អឺរ៉ុប កាលពីដើមអាណត្តិភា្លម ត្រូវបានបាំងជិតដោយការភាពមិនពេញចិត្តចំពោះការបង្កកកាំប្រាក់ខែអ្នករដ្ឋការ ការដំឡើងវិភាគទានសង្គម ការបញ្ចុះជំនួយផ្នែកលំនៅដ្ឋាន ជំនួយសង្គម ជំនួយសមូហភាពសាធារណៈ ...
អ្នកនាំពាក្យរដ្ឋាភិបាលផ្ទាល់ក៏បានទទួលស្គាល់ថា រដ្ឋាភិបាលផ្តល់ការពន្យល់មិនគ្រប់គ្រាន់នូវរាល់សេចក្តីសម្រេចរបស់ខ្លួន។ នៅថ្ងៃខាងមុខ រដ្ឋមន្ត្រីនិងសមាជិកសភាបក្សកាន់អំណាចទំនងជាត្រូវប្តូរសិល្ប៍វិធីមកប្រើប្រាស់ប្រព័ន្ធឃោសនាព័ត៌មានជាងមុនហើយ។ ប្រធានាធិបតីដែលកំណាញ់ពាក្យសំដីបំផុតតាំងពីឡើងកាន់អំណាចមក ក៏ប្រហែលជាត្រូវបង្ហាញមុខ ចេញយោបល់ ក្នុងពេលឆាប់ៗដែរ។
ជាងមួយថ្ងៃក្រោយជាប់ឆ្នោត លោកម៉ាក្រុង អាចវាស់វែងបានថាតើអំរែកសង្គមនិងនយោបាយបារាំងផុយស្រួយប៉ុណ្ណា។ លោកដែលតាំងខ្លួនជាអ្នកកណ្តាលនិយម មិនឆ្វេង មិនស្តាំ អាចទាក់ទាញសំលេងអ្នកខកចិត្តឱ្យបោះឆ្នោតជូនលោក នៅក្នុងសម័យបោះឆ្នោតប្រធានាធិបតីមែន ប៉ុន្តែនៅពេលបានចូលកាន់ទំនួលខុសត្រូវពិត វាមិនមែនជាងាយស្រួលឡើយ ក្នុងប្រតិបត្តិការងារតម្រូវចិត្តម្ចាស់ឆ្នោតដ៏ចម្រុះនោះ។
ហេតុដូច្នេះហើយបានជាប្រជាប្រិយភាពលោកត្រូវតែធ្លាក់ចុះខ្លាំង ហើយក្នុងរយៈពេល១៤សប្តាហ៍នេះ លោកម៉ាក្រុងអាចប្រមូលបានតែភាពសង្ស័យ មិនទុកចិត្ត និងការខកចិត្តពីសំណាក់សកម្មជនមួយភាគធំប៉ុណ្ណោះ។ លោកក៏បានទទួលស្គាល់ដោយខ្លួនឯង តាំងពីថ្ងៃជាប់ឆ្នោតភ្លាមថា ជោគជ័យរបស់លោក មួយផ្នែកគឺដោយសារពលរដ្ឋគ្មានជម្រើស។
ប៉ុន្តែជាសំណាងល្អ ប្រជាប្រិយភាពលោកមិនធ្លាក់ខ្លាំងដល់បាត ព្រោះលោកប្រមុខរដ្ឋអាចបន្តទាញប្រយោជន៍អំពីអវត្តមាននៃបក្សប្រឆាំងធំៗពីរ គឺបក្សសង្គមនិយម និងបក្សសាធារណរដ្ឋ ព្រមទាំងបក្សរណសិរ្សស្តាំជ្រុលនិយម ដែលបែកបាក់គ្នា ងើបមុខមិនរួច ក្រោយបរាជ័យនៅក្នុងសម័យបោះឆ្នោតប្រធានាធិបតី។ មានតែបក្សកុម្មុនិស្តនិយមរបស់លោក មេឡង់ស្ហុង ដែលជាបក្សនយោបាយធំលំដាប់ទីបួន ប៉ុណ្ណោះ ដែលមានមុខមានមាត់ មានសំឡេងស្រែកប្រឆាំងនឹងរដ្ឋាភិបាល ដោយបានអំពាវនាវឱ្យប្រជាពលរដ្ឋប្រមូលផ្តុំគ្នា នៅទីក្រុងប៉ារីស ថ្ងៃទី២៣កញ្ញា ប្រឆាំងនឹងកំណែទម្រង់ច្បាប់ការងារ ដែលលោកចាត់ទុកជា "រដ្ឋប្រហារសង្គម”។ នេះជាសេណារីយោដែលរដ្ឋាភិបាលចង់បញ្ចៀសឱ្យបាន ! មិនចង់ឱ្យមានបាតុកម្មរបស់សហជីពផងនិងនយោបាយផង ពីសំណាក់បក្សប្រឆាំងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ