របាយការណ៍សម្ងាត់ នៃ សន្តិសុខជាតិរុស្ស៊ី អំពីសង្គ្រាមប្រព័ន្ធផ្សព្វផ្សាយបស្ចិមលោក ប្រឆាំងរុស្ស៊ី
ចុះផ្សាយនៅថ្ងៃ៖
ស្តាប់ - ០៥:៣៦
ក្នុងសប្តាហ៍នេះ នាយក ស្ថាប័នសន្តិសុខជាតិរុស្ស៊ី FSB លោក Alexandre Bortnikov បានអញ្ជើញទៅថ្លែងក្នុងសភាឌូម៉ា ក្នុងលក្ខណៈបិទទ្វារ សម្រាប់ភ្នែកពួកអ្នកកាសែត អំពីឥទ្ធិពល ប្រព័ន្ធ ផ្សព្វផ្សាយបស្ចិមលោក មកលើនយោបាយរុស្ស៊ី ដោយប្រៀបធៀបការនេះ ទៅនឹង សង្គ្រាមព័ត៌មាន ” ។ តាមប្រភព BBC ដែលចេះច្បិចយកបាន ពីសំដីតំណាងរាស្ត្រខ្លះ ដែលបានវត្តមានស្តាប់របាយការណ៍នោះ លោក Bortnikov បានរំលឹកជាអាទិ៍ អំពី កាណាល់ទូរទស្សន៍ CNN និង កាសែត Washington Post។
មុនចាប់ផ្តើមកិច្ចប្រជុំនោះ លោកប្រធានសភាឌូម៉ា Vyacheslav Volodin បានសុំពួកអ្នកតំណាងរាស្ត្រ ឲ្យបិទទូរសព្ទដៃ ហើយក្នុងសភាឌូម៉ាផ្ទាល់ តាំងពីដើមទី រហូតដល់ចប់បទអន្តរាគមន៍ លោកនាយក សន្តិសុខជាតិរុស្ស៊ី គឺ ផ្តាច់ប្រព័ន្ធ Wi-Fi ឲ្យឈប់ដើរ។ របាយការណ៍លោកនាយក FSB Alexandre Bortnikov ឧទ្ទិសដល់ សន្តិសុខព័ត៌មាន នៅរុស្ស៊ី។
ក្រោយពីអន្តរាគមន៍របស់គាត់ ប្រធាននៃ គណៈកម្មាធិការសភា ខាងបច្ចេកវិជ្ជាព័ត៌មាន និង ទូរគមនាគមន៍ លោក Leonid Levin បានឡើងថ្លែងបញ្ចេញយោបល់។ តាមសំដី លោក Levinក្នុងរបាយការណ៍នាយកFSB សាច់រឿងគឺអំពី ហេដ្ឋារចនាសម្ព័ន្ធព័ត៌មានដែលកំពុងស្ថិតក្នុងវិបត្តិ, អំពីឧប្បត្តិហេតុពេលថ្មីៗ បណ្តាលមកពី Virus WannaCry រ៉ៅឆាន បណ្តាញ Computer , អំពី សមត្ថភាពការពាររបស់រុស្ស៊ី ទល់នឹង ការគម្រាមវាយប្រហារនៃពួក Hacker , អំពីការផលិតដោយរុស្ស៊ីផ្ទាល់ជំនួស ផលិតផលនាំចូល ក្នុងវិស័យ កម្មវិធីកុំព្យូរទ័រ , អំពីការប្រយុទ្ធទល់នឹងការផ្សព្វផ្សាយ ព័ត៌មានរបស់ អង្គការភេរវនិយម។
សេចក្តីសន្និដ្ឋាន ដែលមានធ្វើក្នុងរបាយការណ៍នោះ បញ្ជាក់ជាថ្មីម្តងទៀត ពីភាពចាំបាច់ត្រូវតែកែឲ្យ ប្រសើរ ឡើង ប្រព័ន្ធច្បាប់នៅរុស្ស៊ី ក្នុងវិស័យព័ត៌មាន”លោក Levinចង្អុលឲ្យឃើញ។
“លោកនាយក FSB Bortnikov ក៏បានរ៉ាយរ៉ាប់ជូនពួកអ្នកតំណាងរាស្ត្រ អំពីឥទ្ធិពលប្រព័ន្ធផ្សព្វផ្សាយ បស្ចិមលោក ជះ មកលើ នយោបាយរុស្ស៊ី”- ដំណឹងនេះ ត្រូវបានដំណាលឲ្យ BBCដឹង ដោយតំណាងរាស្ត្រ ៣នាក់ ដែលបាន វត្តមានក្នុងកិច្ចប្រជុំនោះ ហើយដែលសុំកុំឲ្យបញ្ចេញឈ្មោះគេ ដ្បិតលោកប្រធាន សភាឌូម៉ា បានព្រមាន ពី លក្ខណៈសម្ងាត់របស់វា។
“ក្នុងរបាយការណ៍នោះដែលបង្ហាញជូនពួកអ្នកតំណាងរាស្ត្រ មានរាយឈ្មោះប្រព័ន្ធផ្សព្វផ្សាយ ដែលតាម មតិ លោកនាយក FSB គឺរមែងចូលរួមក្នុង “ សង្គ្រាមពត៏មាន “ ប្រឆាំងរុស្ស៊ី” -រឿងនេះ ត្រូវបានបង្ហើប ទៅ BBCដោយ តំណាងរាស្ត្រពីរនាក់ ។
ក្នុងរបាយការណ៍បង្ហាញនោះ មានរំលឹកពី កាណាល់ទូរទស្សន៍ CNNនិង កាសែត Washington Post -នេះ បើតាមសំដីតំណាងរាស្ត្រម្នាក់។
លោកនាយក FSB ក៏បានរំលឹក ពី បញ្ហាព័ត៌មានបោកបញ្ឆោតហៅថា“ Fake News “ ដែលតាមសំដីគាត់ គឺ ផ្សាយហើយ ផ្សាយទៀត ដោយ ប្រព័ន្ផព្វផ្សាយខ្លះនៃលោកខាងលិច។
កាលពីមុនៗ ពួកតំណាងរាស្ត្រសភាឌូម៉ាផ្ទាល់ ធ្លាប់បានសំដែងទៅហើយ ក្តីព្រួយបារម្ភ ចំពោះការងារ Mediaបស្ចិមលោក នៅរុស្ស៊ី។ យ៉ាងណាមិញ កាលពីខែមិនា តំណាងរាស្ត្រ ខាងបក្សកាន់អំណាច” ប្រទេសរុស្ស៊ីរួមធ្លុងមួយ” លោក Constantin Zatulin បានសុំឲ្យផ្ទៀងផ្ទាត់ពិនិត្យមើល សកម្មភាព Mediaអាមេរិកាំង បែបយ៉ាង Radio Liberty , Voice of America , CNN និង ប្រព័ន្ធផ្សព្វផ្សាយអាមេរិកាំង ផ្សេង ទៀត តើសកម្មភាពគេ ឆ្លើយស្របឬទេ នឹង ការទាមទារនៃ ច្បាប់រុស្ស៊ី។ ការអំពាវនាវនេះ ជាចម្លើយតបនឹង សំណើរបស់ពួកអ្នកតំណាងរាស្ត្រអាមេរិកាំង ដែលរឹតត្បិត ការងារ នៃ កាណាល់ទូរទស្សន៍រុស្ស៊ី Russia Today និងទីភ្នាក់ងារព័ត៌មានរុស្ស៊ី Sputnik នៅ លើដែនដី សរអា។ លុះនៅខែមេសា ក្នុងសភាឌូម៉ា មានប្រព្រឹត្តទៅ កិច្ចប្រជុំពេញអង្គនៃ គណៈកម្មាធិការខាងនយោបាយព័ត៌មាន ជាទីដែលពួក អ្នកជំនាញ និងបណ្តាតំណាងរាស្ត្រ បានចោទ Radio Liberty , Voice of America ព្រមទាំង BBC ថាប៉ុនប៉ងជះ ឥទ្ធិពល មកលើលទ្ធផលនៃការបោះឆ្នោតរើសសភាឌូម៉ា នៅរុស្ស៊ី កាលពី ខែកញ្ញាឆ្នាំ ២០១៦។
ការស្រាវជ្រាវ នៃក្រុម ត្រួតពិនិត្យលើការងារប្រព័ន្ធផ្សព្វផ្សាយនៅរុស្ស៊ី បង្ហាញឲ្យឃើញថា Mediaអាមេរិកាំង ទាំងនេះ បានយកការណ៍អំពី ការបោះឆ្នោតរុស្ស៊ីនោះ តែក្នុងន័យអវិជ្ជមាន ដោយយោងជាទូទៅ ទៅលើមតិពួកប្រឆាំង , ចោទជាក្តីមន្ទិលសង្ស័យ លើលក្ខណៈប្រជាធិបតេយ្យ នៃ Mediaអាមេរិកាំងអំពី បោះឆ្នោតនៅរុស្ស៊ី ដែលតែងទិតៀនយ៉ាងសកម្ម បក្ស” ប្រទេសរុស្ស៊ីរួមធ្លុងមួយ” ហើយ ផ្លុំបំប៉នគ្មានឈប់ ” ពត៏មាន ស្តីពី អំពើពុករលួយ “ ក្នុងឋានៈ ជាចំណុច សម្គាល់ បក្សកាន់អំណាចនេះ នៅរុស្ស៊ី “។
ស្របនឹងរបាយការណ៍មួយទៀត ក្រោមចំណងជើងថា “ ឥទ្ធិពលសរអា មកលើ ស្ថានការណ៍នយោបាយ នៅរុស្ស៊ី ពេលប្រព្រឹត្តទៅ ការបោះឆ្នោតសភាឌូម៉ា ឆ្នាំ២០១៦ និង តទៅអនាគត “ មាននិយាយ ថា ៖
-សរអា បានបង្កើតជា អង្គភាពពិសេសៗ នៅតាមស្ថាប័នសម្ងាត់ប្រទេសខ្លួន និងប្រទេសសម្ព័ន្ធមិត្ត សម្រាប់ ផ្សាយព័ត៌មានប្រឈមនឹងរុស្ស៊ី។ របាយការណ៍នេះ ដែលតាក់តែងឡើងដោយ នយោបាយវិទូរុស្ស៊ីដ៏ល្បី ល្បាញ លោក Alexei Mukhin ចោទ ក្រសួងការបរទេស សរអា ថាចេះតែប៉ុនប៉ងជះឥទ្ធិពល មកលើ លទ្ធផលនៃការបោះឆ្នោតនៅរុស្ស៊ី តាមរយៈការផ្តល់ ហិរញ្ញប្បទាន មិនគ្រាន់តែ ដល់ Radio Liberty , Voice of America ព្រមទាំង BBCប៉ុណ្ណោះទេ។
គឺក្រោយពីកិច្ចប្រជុំ ខែមិនា និង មេសា នោះឯង ដែលពួកអ្នកតំណាងរាស្ត្រ បានអញ្ជើញ នាយក FSB លោក Alexandre Bortnikov ឲ្យទៅថ្លែងក្នុងសភាឌូម៉ា ក្នុងលក្ខណៈសម្ងាត់។
លោក Bortnikov តាមរយៈរបាយការណ៍ លាតត្រដាងជូនសភាឌូម៉ា បានបញ្ជាក់ ពី និក្ខេបបទ ស្តីអំពី ឥទ្ធិពល Media បស្ចិមលោក មកលើនយោបាយរុស្ស៊ី ហើយបានគាំទ្រ ដល់ រាល់ច្បាប់ណា ដែលសភាឌូម៉ា អនុម័ត សម្រាប់ធានា សន្តិសុខព័ត៌មាន របស់ប្រទេស”-នេះ ជា ការដំណាលឲ្យដឹង ដោយតំណាងរាស្ត្រ ម្នាក់ ពីក្នុងចំណោមតំណាងរាស្ត្ររុស្ស៊ី សភាឌូម៉ា ដែលបានស្តាប់ សេចក្តីរាយការណ៍ របស់ លោកនាយក FSB ក្នុងសប្តាហ៏នេះ។
សូរខ្ទរ នៃ របាយការណ៍លោកនាយក FSB ទើបនឹងញ៉ាំង គណៈកម្មាធិការខាងប្រយុទ្ធទល់នឹង ឥទ្ធិពល បរទេស ដែលមានបង្កើតឡើងពេលថ្មីៗ ក្នុងព្រឹទ្ធសភារុស្ស៊ី ឲ្យបំផុសមកជាលើកដំបូង នូវ គំនិតផ្តួចផ្តើម ដែលតម្រូវឲ្យក្រសួងយុត្តិធម៌ ផ្ទៀងផ្ទាត់ពិនិត្យថែមទៀត លើប្រព័ន្ធផ្សព្វផ្សាយរុស្ស៊ីវិញម្តង តើគេទទួលប្រាក់ ពី បរទេសឬទេ ប្រសិនបើគេជាប់សង្ស័យថា ធ្វើការ បម្រើផលប្រយោជន៍រដ្ឋដទៃសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ