ម៉ូស្គូទើបបានធ្វើជាម្ចាស់ផ្ទះទទួលសន្និសីទអន្តរជាតិស្តីអំពីសន្តិសុខ
ចុះផ្សាយនៅថ្ងៃ៖
សន្និសីទក្រុងម៉ូស្គូស្តីអំពីសន្តិសុខអន្តរជាតិ ហៅកាត់ថាMCIS បានប្រព្រឹត្តទៅអស់ពីរថ្ងៃ គឺ ថ្ងៃ២៦និង២៧មេសា ដោយមានការចូលរួមនៃប្រតិភូជាង៧០០នាក់មកពី៨៦ប្រទេស ក្នុងនោះ មានរដ្ឋមន្ត្រីការពារជាតិជាង២០ប្រទេស ។ សាច់រឿងគឺអំពីការគម្រាមធំៗបំផុតក្នុងលោក ជាបឋម ភេរវនិយមអន្តរជាតិក្នុងផ្ទៃនៃវិបត្តិនៅស៊ីរី ស្ថានការណ៍ខ្វះលំនឹងនៅអឺរ៉ុប បណ្តាលមកពីការពង្រីកវត្តមានយោធានៃបក្សសម្ព័ន្ធអូតង់នៅជាប់នឹង ព្រំប្រទល់រុស្ស៊ី មកពីសរអា បន្ត ដំឡើងប្រព័ន្ធខែលមីស៊ីលប្រឆាំងមីស៊ីលក្រោមលេសថា ដើម្បីប្រឈមនឹងមីស៊ីលអ៊ីរ៉ង់ និងកូរ៉េខាងជើង។
ប្រតិភូ៨៦ប្រទេសនោះដែលតំណាងឲ្យបណ្តាជន២ភាគ៣លើផែនដី នាំគ្នាចាត់ទុកជាឯកច្ឆន្ទថា គឺភេរវនិយមអន្តរជាតិដែលបច្ចុប្បន្ន ជាការគម្រាមធំបំផុតក្នុងលោក។ ហើយគេសារភាពថា តាំងពីសន្និសីទឆ្នាំមុនមក ស្ថានការណ៍ក្នុងលោកមិនទាន់វិវឌ្ឍបានប្រសើរឡើយ។ មូលហេតុមកពីមានការខ្វែងគំនិតនយោបាយ និងមកពីសកម្មភាពឯកតោភាគីនៃរដ្ឋខ្លះ។
បានមកចូលរួមក្នុងសន្និសីទក្រុងម៉ូស្គូស្តីអំពីសន្តិសុខអន្តរជាតិ ហៅកាត់ថាMCISលើកនេះ ជាលើកទី៦ គឺមានថ្នាក់ដឹកនាំនៃអង្គការអន្តរជាតិនាំមុខគេ ដែលទទួលខុសត្រូវចំពោះសន្តិសុខលើពិភពលោក បែបយ៉ាងអង្គការសហប្រជាជាតិ, អង្គការដើម្បីសន្តិសុខនិងសហប្រតិបត្តិនៅអឺរ៉ុបOSCE , អង្គការសហប្រតិបត្តិការក្រុងសៀងហៃOCS , អង្គការសន្ធិសញ្ញាស្តីអំពីសន្តិសុខរួមOTSC , សហគមន៍រដ្ឋឯករាជ្យCEI។
គោលជំហរក្រុងម៉ូស្គូចំពោះបញ្ហាសន្តិសុខក្នុងលោក ត្រូវបានលាតត្រដាងដោយរដ្ឋមន្ត្រីការបរទេស ដោយរដ្ឋមន្ត្រីការពារជាតិ ជាអ្នកចាត់ចែងសន្និសីទនេះ ដោយនាយកស្ថាប័នសន្តិសុខជាតិFSB , ដោយនាយអគ្គសេនាធិការដ្ឋានកងទ័ពរុស្ស៊ី។
ថ្លែងពីលើវេទិកាសន្និសីទ រដ្ឋមន្ត្រីការបរទេសរុស្ស៊ី លោកSerguei Lavrov មានប្រសាសន៍៖ ការវាយប្រហារពេលថ្មីៗដោយសរអាទៅលើមូលដ្ឋានទ័ពអាកាសស៊ីរី គឺជាទង្វើបំពានលើច្បាប់អន្តរជាតិ និងជាអំពើឈ្លានពានលើរដ្ឋអធិបតេយ្យដែលអូសទាញឲ្យកាន់តែសាំញ៉ាំទៅបញ្ហាដែលកំពុងចោទ ក្នុងរឿងប្រយុទ្ធទល់នឹងភេរវនិយម ដ្បិតវាច្រានឲ្យឃ្លាតកាន់តែទៅឆ្ងាយទៅ ការបង្កើតឡើងជារណសិរ្សរួមតែមួយសម្រាប់ជំនះលើអកុសលនេះ។
ចំណែករដ្ឋមន្ត្រីការពារជាតិ លោកនាយឧត្តមសេនីយ Serguei Shoigu លើកឡើងថា សកម្មភាពនោះរបស់ក្រុងវ៉ាស៊ីនតោន បានបង្កើតជាគ្រោះថ្នាក់ដល់ជីវិតពួកយោធារុស្ស៊ីដែលវត្តមាននៅស៊ីរីដើម្បីប្រយុទ្ធទល់នឹងពួកភេរវជន។ ជំហានបែបនេះរបស់សរអា បានបង្ខំរុស្ស៊ីឲ្យចាត់វិធានការបន្ថែមទៀត ឆ្ពោះទៅបង្កើនសុវត្ថិភាពក្រុមទ័ពរុស្ស៊ីក្នុងប្រទេសស៊ីរី។ ព្រមជាមួយនេះ បើសរអាដាក់ទិសកំទេចមែន អង្គការរដ្ឋអ៊ីស្លាមនៅស៊ីរី នោះរុស្ស៊ីត្រៀមគាំទ្រទាំងស្រុងដល់ការខំប្រឹងប្រែងបែបនេះ។ ស្តីអំពីទង្វើបក្សសម្ព័ន្ធអូតង់ ដែលចេះតែវាតទីតាំងខ្លួនគ្មានឈប់មកដល់ព្រំប្រទល់រុស្ស៊ីទៅហើយ រដ្ឋមន្ត្រីយោធារុស្ស៊ីថ្លែងថា សកម្មភាពម៉ូស្គូខាងពង្រឹងសមត្ថភាពការពាររបស់ខ្លួន គ្រាន់តែជាប្រតិកម្មថ្លឹងឲ្យបានស្មើ ចំពោះទង្វើនេះរបស់អូតង់។ បក្សសម្ព័ន្ធនេះចិញ្ចឹមទុកគម្រោងទទួលរដ្ឋថ្មីៗឲ្យចូលជាសមាជិក ហើយជាសក្ខីកម្ម នឹងក្លាយជារដ្ឋថ្មីបែបនេះ គឺMontenegro។ តាមពិត សក្តានុពលយោធាMontenegro គឺសឹងស្មើនឹងសូន្យ ប៉ុន្តែស្ថានភាពភូមិសាស្ត្រប្រទេសនេះ នឹងអនុញ្ញាតឲ្យអូតង់តាំងការត្រួតពិនិត្យលើតំបន់Balkansទាំងមូល។
នាយកស្ថាប័នសន្តិសុខជាតិរុស្ស៊ីFSB លោក Alexandre Bortnikov ក្នុងបទអន្តរាគមន៍ខ្លួន ចង្អុលឲ្យឃើញថា៖ ពួកមេក្លោងនៃអង្គការភេរវនិយមអន្តរជាតិធំៗ បែបយ៉ាងរដ្ឋអ៊ីស្លាមនិងរណសិរ្សអាល់ណូស្រាព្រមទាំងរចនាសម្ព័ន្ធទាំងឡាយនៅសេសសល់ពីអង្គការអាល់កៃដា ដោយយល់ដឹងក្នុងចិត្តថាពួកគេនឹងត្រូវកំទេចសាបសូន្យទៅ នៅតាមតំបន់ណាដែលគេធ្លាប់បានអាងយ៉ាង ឥឡូវបានចាប់ផ្តើមប្តូរទីកន្លែងទៅបោះទីតាំងថ្មី នៅក្នុងប្រទេសអាហ្វហ្កានីស្ថាន យេម៉ែន និងទៅជ្រៅក្នុងទ្វីបអាហ្វ្រិកតែម្តង ព្រមទាំងកំពុងគិតគូរបង្កើតឡើងជាបណ្តាញភេរវនិយមខ្នាតធំថ្មី។
រីឯលោកនាយអគ្គសេនាធិការដ្ឋានកងទ័ពរុស្ស៊ី ឧត្តមសេនីយ Valery Guerassimov បានថ្លែងថា៖ បច្ចុប្បន្ន នៅតាមបណ្តោយខ្សែព្រំប្រទល់ដែលខ័ណ្ឌប្រទេសរុស្ស៊ី ពីបណ្តាប្រទេសអូតង់ ម្ខាងៗបន្តប្រមូលផ្តុំសព្វាវុធសម្រាប់វាយលុកវាតឲ្យកាន់តែធំឡើងសមត្ថភាព អាកាសយានដ្ឋាននិងកំពង់ផែ សម្រាប់ទទួលភស្តុភារ។ ក្នុង២ឆ្នាំចុងក្រោយ នៅតាមតំបន់អឺរ៉ុបខាងកើត កម្លាំងទ័ពរួមរបស់អូតង់ បានបង្កើនសឹង២ដង លំហាត់សឹក ក្នុងគោលដៅត្រៀមប្រយុទ្ធ។ ការវាតបក្សសម្ព័ន្ធអូតង់ គឺបង្ខូចតុល្យភាពកម្លាំងនៅទ្វីបអឺរ៉ុប បង្កើនហានីភ័យនៃឧប្បត្តិហេតុយោធា។ សកម្មភាពទាំងនេះ ដក់ជាប់ដោយលក្ខណៈបង្កហេតុមែនពិត។
ជាការកត់សម្គាល់ ក្នុងថ្ងៃដែលសន្និសីទក្រុងម៉ូស្គូស្តីអំពីសន្តិសុខអន្តរជាតិធ្វើការងារខ្លួន អនុទី១នៃនាយអគ្គសេនាធិការដ្ឋានកងទ័ពរុស្ស៊ី លោកឧត្តមសេនីយ Viktor Poznikhir បានថ្លែងក្នុងសន្និសីទសារព័ត៌មានថា៖ ប្រព័ន្ធខែលមីស៊ីលប្រឆាំងមីស៊ី ដែលសរអា ដាក់ឲ្យប្រចាំការនៅទ្វីបអឺរ៉ុប និងនៅតាមនាវាចល័តក្បែរៗទឹកដីរុស្ស៊ី គឺបង្កើតជាគ្រឿងផ្សំយោធាយ៉ាងខ្លាំង ស្ថិតក្នុងរបាំង សម្រាប់លួចវាយប្រហារនឹងកាំជ្រួចមីស៊ីលនុយក្លេអ៊ែរតែម្តង មកលើប្រទេសរុស្ស៊ី។ ក្នុង១៥ឆ្នាំចុងក្រោយ សរអាបានចំណាយអស់១៣០.០០០លានដុល្លារ សម្រាប់បង្កើតប្រព័ន្ធខែលនេះ ហើយទៅទល់ឆ្នាំ២០២២ ដោយបង្កើនខ្ទង់ចំណាយនេះ ៥៥.០០០លានដុល្លារទៀត មីស៊ីលអាមេរិកាំងសម្រាប់ប្រឆាំងមីស៊ីល នឹងមានចំនួនលើសពីចំនួនក្បាលរំសេវនុយក្លេអ៊ែរប្រយុទ្ធ ដែលមានដំឡើងនៅតាមមីស៊ីលអន្តរទ្វីបរបស់រុស្ស៊ី ហើយលើសដូចមេឃនិងដី ពីកាំជ្រួចមីស៊ីលដែលអាចបាញ់ទៅតែចម្ងាយមធ្យមរបស់អ៊ីរ៉ង់និងកូរ៉េខាងជើង ដែលសរុបទៅមានមិនដល់១០ដើមផង។
ដើម្បីកុំឲ្យប្រជាជនរុស្ស៊ី ធ្លាក់ក្នុងភាពភ័យខ្លាច អនុទី១នៃប្រធានគណៈកម្មាធិការព្រឹទ្ធសភារុស្ស៊ីខាងការពារប្រទេស លោកFrants Klintsevich បានថ្លែងថា៖ សេចក្តីថ្លែងការណ៍របស់អគ្គសេនាធិការដ្ឋានកងទ័ពរុស្ស៊ី គឺជាសញ្ញាប្រាប់ទៅសរអាថា ពួកគេត្រូវតែដឹងថា រុស្ស៊ីដឹងអំពីចេតនារបស់ពួកគេហើយរុស្ស៊ីនឹងឆ្លើយបកទៅវិញយ៉ាងចាស់ដៃពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ